76 جاسىنا قاراعان شاعىندا قازاقتىڭ كورنەكتى جازۋشىسى، ماركەستىڭ ايگىلى «ءجۇز جىلدىق جالعىزدىعىن» اۋدارعان اۋدارماشى، قالامگەر كەڭەس يۋسۋپ دۇنيەدەن وزدى. بۇل تۋرالى جۇرتشىلىققا الەۋمەتتىك جەلىدەن اقىن داۋلەتكەرەي كاپ ۇلى ەستىرتتى.

كەڭەس ءسىلامحان ۇلى يۋسۋپ (ءتۇسىپ) 1941 جىلى 30 ماۋسىمدا شىعىس قازاقستان وبلىسىنىڭ تاۆريا اۋدانىنداعى بايمۇر اۋىلىندا دۇنيەگە كەلگەن. وسكەمەن قالاسىنداعى جامبىل اتىنداعى قازاق ورتا مەكتەبىن 1958 جىلى بىتىرگەننەن كەيىن، سەمەيدەگى وزەنشىلەر ۋچيليششەسىن تامامداپ، جوعارعى ەرتىس كەمە شارۋاشىلىعىندا ەڭبەك ەتەدى. قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن بىتىرگەن. شىعىس قازاقستان وبلىستىق «كوممۋنيزم تۋى» گازەتىندە ادەبي قىزمەتكەر، ءبولىم مەڭگەرۋشىسى، «سوسياليستىك قازاقستان» گازەتىندە ادەبي قىزمەتكەر، ءبولىم مەڭگەرۋشىسى، جاۋاپتى حاتشى، «قازاقستان كوممۋنيسى» جۋرنالىنىڭ ءبولىم مەڭگەرۋشىسى، «جۇلدىز» جۋرنالىنىڭ ءبولىم مەڭگەرۋشىسى بولىپ ىستەيدى. مەملەكەتتىك باسقارۋ ورگاندارىندا جاۋاپتى قىزمەتتەر اتقاردى. قازاقستان رەسپۋبليكاسىنىڭ پرەزيدەنتى باسپا ءسوز قىزمەتىنىڭ باس ساراپشىسى بولعان.

«جالىن» باسپاسىنان «اقيقات ساپار» (1977)، «قاراشاداعى كوكتەم» (1981)، «وحاپكا پوليەۆىح سۆەتوۆ» (1983) پوۆەستەرى مەن اڭگىمەلەرىنىڭ جيناقتارى، «جەلقايىق» كىتابى («ەلوردا»، 2000) شىقتى. سونىمەن قاتار ونىڭ تەرمينولوگيا، قازاق تىلىندە ءىس جۇرگىزۋ ماسەلەلەرىنە ارنالعان «قۇجات ءتىلى» كىتابى 2001 جىلى پاۆلودار وبلىستىق «التىن ءتىل» باعدارلاماسىنىڭ اياسىندا جارىق كورىپ، «جالىن» باسپاسى ۇيىمداستىرعان جابىق بايگەنىڭ ەكىنشى جۇلدەسىن الدى.

سونداي-اق «قازاقستان» جانە «اتامۇرا» باسپالارىنان «انىقتاما سوزدىگى» (1992)، «ەكى تىلدە ءىس جۇرگىزۋ» (1994) كىتاپتارى جارىق كوردى. گ.گ.ماركەستىڭ «ءجۇز جىلدىق جالعىزدىق» رومانىن (1983)، جاس بولگار جازۋشىلارىنىڭ پوۆەستەرى مەن اڭگىمەلەرىنىڭ جيناعىن («گۇلجازيرا»، 1987) اۋدارىپ باستىردى. «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعىنىڭ يەگەرى (2000).

 «قامشى» پورتالى ۇجىمى مارقۇمنىڭ جاقىندارىنا قايعىرا كوڭىل ايتادى.