ىستامبۇل پوليسياسى جاڭا جىل ءتۇنى Reina تۇنگى كلۋبىنىڭ قوناقتارىن اتىپ تاستادى دەلىنگەن كۇدىكتىنى ۇستادى، - دەپ حابارلايدى tengrinews.kz Daily Sabah سايتىنا سىلتەمە جاساپ.

باسىلىمنىڭ مالىمەتىنشە، وزبەكستان تۋماسى ابدۋلگادير ماشاريپوۆ ارنايى وپەراسيا كەزىندە ىستامبۇلدىڭ ەسەنيۋرت اۋدانىندا ۇستالعان. ول وسىعان دەيىن تانىسىنىڭ پاتەرىندە جاسىرىنىپ كەلىپتى. تانىسى قىرعىزستان تۋماسى ەكەن. گازەت ماشاريپوۆتىڭ ۇستالعان كەزدە تۇسىرىلگەن سۋرەتىن جاريالادى، سۋرەتتەن ونىڭ جارالانعانىن كورۋگە بولادى. «ءابۋ مۇحاممەد ءال-حوراساني» دەگەن لاقاپ اتتى جامىلعان ابدۋلگادير ماشاريپوۆتى قۇرىقتاۋ كەزىندە ونىڭ 4،5 جاستاعى ۇلى دا قاسىندا بولعان.

ەسكە سالايىق، ىستامبۇلدا 1 قاڭتارعا قاراعان ءتۇنى Reina تۇنگى كلۋبىنا شابۋىل جاسالعان بولاتىن. كۇدىكتى مەكەمەگە كىرىپ كەلىپ، ادامداردى اتا باستاعان. سالدارىنان 39 ادام قازا تاپتى. تەراكت جاسادى دەلىنگەن كۇدىكتى جاسىرىنىپ ۇلگەرگەن.

تۇرىك پوليسياسى ماشاريپوۆتى ىزدەستىرۋ بارىسىندا ىستامبۇلدا 150 مىڭ دوللار قاراجات تاپقان. بۇل قاراجات، تەرگەۋدىڭ مالىمەتىنشە، تەراكت جاساعانى ءۇشىن تولەم بولۋى مۇمكىن.