«ۋاقىتشا تىركەۋ» ماسەلەسى شىققالى بەرى قازاقستانداعى حالىققا قىزمەت كورسەتۋ ورتالىقتارىندا جاپپاي قاربالاستىق باستالعانى بەلگىلى. ءتىپتى حالىققا قىزمەت كورسەتۋ ورتالىقتارىندا كىسى ءولىمى دە تىركەلدى.

ەندى تىركەلۋ ءۇشىن حقكو-دا كەزەككە تۇرۋدىڭ ازابى اياقتالادى. سەبەبى ازاماتتار ۋاقىتشا تىركەۋگە ەلەكتروندىق ۇكىمەت ارقىلى تۇرا الادى. بۇنداي قۋانىشتى جاڭالىقتى اقپارات جانە كوممۋنيكاسيالار ءمينيسترى داۋرەن ابايەۆ ءمالىم ەتتى.

«دوستار، مينيسترلىك ايتقان مەرزىمنەن ەكى اپتا بۇرىن «ەلەكتروندىق ۇكىمەت» ۆەب-پورتالىندا ازاماتتاردى ۋاقىتشا تىركەۋ قىزمەتى پيلوتتىق رەجيمدە ىسكە قوسىلدى.
ازىرشە تەستىلىك جۇمىستار ءجۇرىپ جاتقاندىقتان، تىركەۋ قىزمەتىندە كەيبىر كىدىرىستەر بولۋى مۇمكىن. بۇل ماسەلەگە تۇسىنىستىكپەن قاراۋعا شاقىرامىز.
وسى اپتانىڭ سوڭىنا دەيىن اتالعان قىزمەتكە مونيتورينگ جۇرگىزىلىپ، قاجەت بولعان جاعدايدا جەتىلدىرۋ جۇمىستارى جۇرگىزىلەدى.
تىركەۋ جونىندەگى نۇسقاۋلىقتى تومەندەگى سىلتەمەدەن كورۋگە بولادى:
http://egov.kz/cms/ru/information/help/instrukcii»، -دەپ جازدى مينيستر الەۋمەتتىك جەلىدە.