وزبەكستان مۇسىلماندارى 2017 جىلدان باستاپ ۇمرا مەن قاجىلىققا ەكىنشى رەت بارا المايتىن بولدى دەپ حابارلايدى golosislama.com، مالىمەتتىڭ قازاقشا نۇسقاسىن «قامشى» پورتالى وقىرمان نازارىنا ۇسىنادى.

مۇنداي شەشىمدى وتكەن جىلدىڭ 15 جەلتوقسانىندا ۇمرا مەن قاجىلىققا بارۋدى جوسپارلايتىن قوعامدىق كەڭەس مۇشەلەرى قابىلداعان. تارتىپكە ساي، مۇسىلماندار ءبىر جىل بۇرىن نەمەسە ون جىل بۇرىن قاجىلىققا بارعان بولسا دا، ەكىنشى رەت مەككەگە اتتانۋعا تىيىم سالىنادى.

وزبەكستاندا قاجىلىققا بارعىسى كەلەتىن ادامدار ساپارعا اتتانۋ ءۇشىن بىرنەشە جىلدار بويى ءوز كەزەگىنىڭ كەلگەنىن كۇتۋى ءتيىس. قابىلدانعان شەشىمگە بايلانىستى، 2017 جىلى كەزەگى كەلگەن ادامداردىڭ اراسىندا بۇرىن-سوڭدى قاجىلىققا بارىپ كەلگەندەر بولسا، ولار تىزىمنەن الىنىپ تاستالادى. دەگەنمەن بارلىعى ءبىر اللانىڭ قولىندا.

ءدىن ماسەلەسىنە قاتىستى كوميتەت مۇشەسى سايداكمالحون شاكيروۆ اتالمىش شەشىمگە قاتىستى مىناداي تۇسىنىك بەردى: «ولاردىڭ ورنىنا مۇلدەم قاجىلىققا بارماعان ادامدار بارادى.»

سونىمەن قاتار بۇل شەشىمنىڭ قاجىلىققا بارۋدى ۇيىمداستىرىپ، سونداعى تارتىپكە جاۋاپ بەرەتىن شەنەۋنىكتەرگە جانە مەككەگە دارىگەر، اسپاز رەتىندە باراتىن جۇمىسشىلارعا قاتىسى جوق ەكەندىگىن ايتىپ ءوتتى.

اۋدارعان: نازەركە لابيحان