«وقۋشى» تەلەشوۋىنىڭ بۇرىنعى قاتىسۋشىسى ساممەر زەرۆوس اقش پرەزيدەنتى دونالد ترامپتى قارالايتىن اقپارات تاراتقانى ءۇشىن سوتقا بەردى دەپ حابارلايدى bbc.com.

ساممەر زەرۆوس 2007 جىلى ترامپ قىزدى لوس-اندجەلەستەگى Beverly Hills قوناق ۇيىنە جۇمىسقا الۋدىڭ الدىندا سۇحباتتاسۋ ءۇشىن شاقىرعانىن ايتادى.  الايدا كەزدەسۋدە ترامپ ونى ءسۇيىپ، قۇشاقتاي باستادى دەيدى قىز.

ترامپ بارلىق ايىپتاۋلاردى جوققا شىعارىپ وتىر.

زەرۆوس بۇل اقپاراتتى ارنايى پرەسس-كونفەرەنسيادا ايتتى. ول دونالد ترامپتى «وتىرىكشتى جانە ايەلدەردى جەككورەتىن ادام» دەپ اتادى. ونىڭ سوزىنشە ترامپ ونى قورلادى.

زەرۆوستىڭ ويىنشا، دونالد ترامپ قىزدىڭ ايىپتاۋلارىن جوققا شىعارۋ ارقىلى ول تۋرالى جالعان اقپارات تاراتىپ، جىنىستىق بوپسالاۋ ارەكەتتەرى تۋرالى ارىزىن جالعان دەپ كىنا تاعىپ وتىر.

بۇعان دەيىن ول ترامپتىڭ ءوز سوزىنەن باس تارتۋىن سۇرادى. ەگەر ترامپ ءوز كىناسىن مويىنداسا ول ايىپتاردان باس  تارتاتىنىن ايتقان. الايدا اقش-تىڭ سايلانعان پرەزيدەنتى ءوز كىناسىن مويىندامادى.

كۇز ايلارىندا دونالد ترامپ پرەزيدەنتتىك سايلاۋعا تۇسكەندە بىردەن بىرنەشە ايەل ونى جىنىستىق بوپسالادى دەپ ايىپتاعان. كوبى ولارعا قوعامدىق ورىندا تيىسكەنىن ايتقان.

دونالد ترامپ ايەلدەردىڭ ايىپتاۋلارىن جالا دەپ ايتىپ، ولاردى سوتقا بەرۋگە ۋادە بەرگەن. الايدا ءالى كۇنگە دەيىن سوتقا جۇگىنبەدى.