ماڭعىستاۋ وبلىسىنداعى قالامقاس كەنىشىندە قازاقستان تاۋەلسىز كاسىپوداقتار كونفەدەراسياسىنىڭ (قتكك) جابىلۋىنا نارازى Oil Construction Company (OCC) كومپانياسىنىڭ جۇمىسشىلارى كاسىپوداقتى قايتا تىركەتۋ ءۇشىن قاڭتاردىڭ بەسىندە اشتىق جاريالاعانىن مالىمدەگەن ەدى. وسس كومپانياسى «ماڭعىستاۋمۇنايگاز» كومپانياسىنىڭ قالامقاس، جەتىباي كەنىشتەرىنە قىزمەت كورسەتەدى. ونىڭ 400-دەن استام مۇنايشىسى تاۋەلسىز كاسىپوداقتار كونفەدەراسياسىنىڭ جابىلۋىنا نارازىلىق ءبىلدىرىپ اشتىق جاريالاپ جاتىر.

وڭتۇستىك قازاقستان وبلىستىق ەكونوميكالىق سوتى 4 قاڭتاردا ادىلەت مينيسترلىگىنىڭ شاعىمى بويىنشا كەڭسەسى شىمكەنتتە ورنالاسقان قتكك-نى جابۋ تۋرالى شەشىم شىعارعان.

تاۋەلسىز كاسىپوداقتار كونفەدەراسياسى ءتورايىمى لاريسا حاركوۆا «مەن تاۋەلسىز كاسىپوداقتار كونفەدەراسياسىنىڭ جەتەكشىسى رەتىندە ءبىزدىڭ ۇيىمنىڭ جۇمىسىن توقتاتۋ جونىندەگى سوت شەشىمىن زاڭدى دەپ مويىندايمىن. تاۋەلسىز كاسىپوداقتار كونفەدەراسياسى 2016 جىلدىڭ اقپان ايىندا تىركەلگەن. «كاسىپوداقتار وداعى تۋرالى» ق ر زاڭىنىڭ 10 بابى، 2 تارماعىنا سايكەس، التى ايدىڭ ىشىندە، ياعني 2016 جىلدىڭ تامىزىنا دەيىن ءبىز قازاقستاننىڭ 9 وڭىرىندە بولىمشەلەر اشۋعا ءتيىس ەدىك. الايدا، ءبىز قاجەتتى جاقتاستارىمىزدى جيناي المادىق. سوعان قاراماستان، ادىلەت مينيسترلىگى بىزگە 2016 جىلدىڭ سوڭىنا دەيىن قوسىمشا ۋاقىت بەردى. ءبىز ونى ورىنداي المادىق. سوندىقتان، ادىلەت ورگانى ءبىزدىڭ ۇيىمنىڭ جۇمىسىن توقتاتۋ جونىندە سوتقا تالاپ ارىز بەردى. بۇل ءبىز ءۇشىن زاڭدى» دەپ مالىمدەگەن ەدى.

قتكك 2003 جىلى «ماڭعىستاۋمۇنايگاز» كومپانياسىنا قاراستى ءۇش كاسىپورىننىڭ نەگىزىندە قۇرىلعان. كاسىپوداق ۇيىمنىڭ دەرەگىنشە، ونىڭ قۇرامىندا 2100 مۇشەسى بولعان.

ازاتتىق جازعانداي، اقتاۋداعى OCC كومپانياسىنىڭ كاسىپوداقتار كەڭسەسىندە اشتىق ۇستاپ جاتقان جۇمىسشىلار قاتارىن قالامقاس پەن جەتىباي كەنىشتەرىنەن، ۆاحتالىق اۋىسىمنان كەلگەن مۇنايشىلار تولىقتىردى. ولار «نۇر وتان» پارتياسىن تالاپتارىنا قۇلاق اسۋعا شاقىرادى. ال پارتيانىڭ وبلىستاعى بولىمشەسى ونداي ارىز تۇسپەگەنىن ايتادى.

ماڭعىستاۋ وبلىسىنداعى Oil Construction Company كومپانياسىنىڭ جۇزدەگەن مۇنايشىسى رەسپۋبليكالىق تاۋەلسىز كاسىپوداقتار كونفەدەراسياسىن تىركەۋدى سۇراپ، اشتىق جاريالاعاندارىنا ەكى اپتاعا تايادى. ولاردىڭ قاتارىن قاڭتاردىڭ 17-سىنەن بەرى كومپانيا قىزمەت كورسەتەتىن قالامقاس جانە جەتىباي كەنىشتەرىنەن كەلگەن جۇزدەگەن مۇنايشى تولىقتىرىپ، العاشقىدا 90-نان استام بولعان نارازى جۇمىسشىنىڭ سانى ءقازىر 400-گە تاقادى.

اشتىق جاريالاعان وسس مۇنايشىلارى وزدەرىنىڭ «نۇر وتان» پارتياسىنىڭ مۇشەلەرى ەكەنىن ايتىپ، پارتيانىڭ وبلىستاعى فيليالىنا رەنىشتەرىن ءبىلدىردى.

ماڭعىستاۋ وبلىسى پروكۋرورى ورىنباسارى ەرجان بەردىبەكوۆ ازاتتىققا بۇل ماسەلەگە بايلانىستى كوممەنتاريي بەرمەدى. ول ۇيىمداستىرۋ ءبولىمىنىڭ پروكۋرورى ايبەك مۇناتوۆ ارقىلى رەسمي حات جولداۋدى سۇرادى. ماڭعىستاۋ وبلىسى اكىمىنىڭ مىنەتىن ۋاقىتشا اتقارۋشى سۇيىندىك الداشيەۆ تا «جينالىستان قولى بوساماعاندىقتان» كوممەنتاريي بەرگەن جوق.

ەسكە سالا كەتەتىن بولساق، 6 جىل بۇرىن جاڭاوزەن قالاسىنداعى مۇنايشىلاردىڭ ەڭبەك داۋىنا بيلىك قۇلاق اسپاي، سالدارىنان جەتى اي بويى ەرەۋىل جاساعان مۇنايشىلار مەن كۇشتىك قۇرىلىمدار اراسىنداعى قاقتىعىستان 16 بەيبىت تۇرعىن قازا تاپقان ەدى.