ۋنيۆەرسيادا كەزىندە اۋىر جاراقات العان سپورتشىلار اۋرۋحاناعا تىكۇشاقپەن جەتكىزىلەدى دەپ حابارلايدى almaty.tv. اۋە كولىكتەرى اسا ءقاۋىپتى سپورت تۇرلەرىنەن سايىس وتەتىن ءۇش نىسانعا كەزەكشىلىك ەتەدى. اتاپ ايتقاندا - مەدەۋ، تاباعان تاۋلى ايماقتارى مەن الماتى ارەنادا زارداپ شەككەندەر، نەبارى 15 مينۋتتا اۋرۋحاناعا اكەلىنىپ، شۇعىل كومەككە يە بولادى.

ءدۇبىرلى دودا كەزىندە اۋىر جاراقات العان ناۋقاستارعا شۇعىل كومەك № 7ء-شى جانە 4ء-شى قالالىق اۋرۋحانالاردا كورسەتىلەدى. ول ءۇشىن قوس اۋرۋحانانىڭ بازاسىندا  ارنايى تىكۇشاق قوناتىن الاڭ جاسالدى. جوسپار بويىنشا جەدەل-جاردەم كولىگى تىكۇشاقپەن جەتكىزىلگەن ناۋقاستى كۇتىپ الىپ، بىردەن اۋرۋحانانىڭ قابىلداۋ بولىمشەسىنە جەتكىزەدى. ول نەبارى 2 مينۋت ۋاقىتتى الادى.

№ 4ء-شى قالالىق اۋرۋحانانىڭ قابىلداۋ بولىمىنە جەتكىزىلگەن ناۋقاستى ءبىر مەزەتتە بىرنەشە دارىگەر قاراپ، كومەك كورسەتەدى. ولارعا كوبىنەسە اياق-قولى سىنىپ، باسىنان جاراقات العان اۋىر حالدەگى ادامدار تۇسەدى. سوندىقتان قۇرامىندا تراۆماتولوگ، حيرۋرگ، تەراپيەۆت، نيەۆراپوتولوگ سىندى ماماندار بار ارنايى توپ ساقاداي ساي دايىندىق ۇستىندە. اق حالاتتىلار قولدان كەلگەن كومەكتەرىن كورسەتۋ ءۇشىن كۇندىز-تۇنى تىنباي قىزمەت ەتۋگە دايىن.

«قىسقى ازيادا ويىنى كەزىندە بىزدە تراۆما العان ناۋقاستار بولعان. قانشا ەكەنى سانى ەسىمدە جوق. مەنىڭ وزىمدە جاعداي بولدى. ءبىزدىڭ اۋرۋحاناعا مونعوليانىڭ سپورتشىسى  سول ويىن كەزىندە حوككەي وينايدى ەكەن، سول ويىن كەزىندە جاراقات العان تىزەسىنەن. سونى ءبىزدىڭ اۋرۋحاناعا الىپ كەلدى، ءبىز تولىعىمەن تەكسەردىك، تىزەسىنىڭ بايلانىمىڭ ۇزىلگەنىن انىقتادىق. سول تۋرالى سپورتشىعا ءتۇسىندىرىپ ايتتىق. سپورتشى بىزگە وپەراسيا جاساۋعا كەلىسىم بەردى، ءبىز وپەراسياسىن جاساپ وسى جەردەن شىعارىپ جىبەردىك»، - دەدى  الماتى قالاسى №4 قالالىق كلينيكالىق اۋرۋحاناسىنىڭ جەدەل جاراقات ءبولىمىنىڭ مەڭگەرۋشىسى مەيرامبەك جۇماعۇلوۆ.

ۋنيۆەرسيادانى وتكىزۋگە دارىگەرلەر ساقاداي ساي. قاجەتتى مەديسينالىق قۇرال-جابدىقپەن جانە دارى-دارمەكپەن قامتاماسىز ەتىلگەن كەزەكشى جەدەل مەديسينالىق كومەك بريگاداسى بارلىق 9 سپورت نىسانىندا دا جۇمىس ىستەيتىن بولادى. جاڭادان الىنعان 40 جەدەل جاردەم كولىگى شۇعىل، دەرەۋ جانە قاجەتتى مەديسينالىق كومەك كورسەتۋگە دايىن تۇرادى. سپورتتىق سايىستار وتەتىن اۋماقتاردا 150-دەن استام جەدەل كومەك كورسەتەتىن اق حالاتتىلار بولادى.

«ۋنيۆەرسيادانى وتكىزۋ اياسىندا مينيسترلىك الماتى قالاسىنىڭ اكىمشىلىگىمەن بىرگە قاتىسۋشىلارعا شارا بارىسىندا جانە توقتاعان ورنىندا ۋاقتىلى، ساپالى مەديسينالىق كومەك كورسەتۋ ماسەلەلەرىن پىسىقتادى. جالپى مەديسينالىق كومەك كورسەتۋ ستاسيونارلىق تۇردە كورسەتىلەتىن بولادى، جەدەل-جاردەم تۇرىندە كورسەتىلەتىن بولادى. سونداي-اق مەديسينالىق پۋنكتتەردىڭ قىزمەتتەرى ۇيىمداستىرىلاتىن بولادى. بۇگىنگى تاڭدا قاجەتتى دايارلىق تولىق اياقتالدى دەسەك بولادى»، - دەدى ق ر الەۋمەتتىك دامۋ جانە دەنساۋلىق ساقتاۋ ءمينيسترى تامارا دۇيسەنوۆا.

جارىس كەزىندە كومەك كورسەتەتىن جەدەل-جاردەم قىزمەتكەرلەرىنىڭ بارلىعى كوزگە ەرەكشە تۇسەتىن، ارنايى كيىم ۇلگىسىمەن قامتاماسىز ەتىلگەن. ولاردىڭ بارلىعى دا الا جازداي اعىلشىن تىلىنەن ءدارىس ءوتىپ، جاتتىعىپتى.