«تۇرسىن الاگوزوۆ باياندى باقىتىن تاپتى» اتتى ماقالا جاريالانعاننان كەيىن رەداكسيامىزعا ءوزىن تاڭشولپان احمەتوۆا دەپ تانىستىرعان زەينەتتەگى ۇستاز حابارلاستى. ول قازاق قىزدارىن بايان ەسەنتايەۆادان ۇلگى الماۋعا شاقىرىپ، ب ا ق ناسيحاتتاۋدى دوعارۋدى ۇسىنىپ، بارشا قازاق قىزدارىن ءومىردى كورگەن انا، ايەل، ۇستاز رەتىندە ءوز اقىل، كەڭەسىن ايتتى. سونىمەن قاتار باياننىڭ بۇرىنعى كۇيەۋى باقىتبەك ەسەنتايەۆتىڭ تۇرمەدەن بوساپ شىعۋىنا ۇلەس قوسۋعا شاقىردى.

«مەن ءتورت بالانىڭ اناسىمىن. ۇلدى ۇياعا، قىزدى قياعا قوندىردىم. زەينەتتەگى ۇستازبىن. 60-قا كەلسەم دە الەۋمەتتىك جەلىلەردە وتىرىپ، عالامتوردان جاڭالىقتارمەن تانىسىپ وتىرامىن. سوڭعى كەزدەرى ب ا ق بەلگىلى پروديۋسەر بايان ەسەنتايەۆانىڭ جەكە ومىرىنە قاتىستى اقپاراتتار ءجيى شىعاتىن بولدى. حالىق ونى قىزۋ تالقىلاپ جاتقاننان كەيىن، مەن دە ءوز پىكىرىمدى بىلدىرۋگە بەل بۋدىم» دەپ ءسوزىن باستادى تاڭشولپان احمەتوۆا.

قازاقستاندا بايان ەسەنتايەۆانىڭ ءداۋىرى ءجۇرىپ تۇرعانىن جانە قازاقستاندىق قىز، كەلىنشەكتەر ودان ۇلگى الاتىنىنا ىشتەي نالىيتىنىن جەتكىزدى.

«قانداي ادام ءوز ازاماتىن تەمىر تورعا قاتاڭ تۇزەتۋ مەكەمەسىنە 9 جىلعا توعىتىپ، وزگەنىڭ دە وتباسىن بۇزىپ، باسقا ەركەكپەن جۇرەدى؟! بۇل قازاق حالقىنىڭ مادەنيەتىنە، تاربيەسىنە جات. قازاق حالقى اتام زاماننان ەر ازاماتىن قۇرمەتتەگەن حالىق. بىزدە ايەل زاتى ەركەكتەردەن ءبىر ساتى تومەن تۇرۋ كەرەك دەگەن تۇسىنىك بار. سوندىقتان وتباسىن بۇزباۋعا ارەكەتتەنۋ كەرەك» دەپ ءوز اقىلىن ايتتى.

بۇعان دەيىن بايان ەسەنتايەۆا ب ا ق بىرىنە سۇحبات بەردى. وندا باقىتبەك ەسەنتايەۆتىڭ جاقسى جار، كەرەمەت اكە بولعانىن ايتقان ەدى. 60 جاستاعى تاڭشولپان اپاي ەسەنتايەۆانىڭ كۇيەۋى 9 جىلعا قامالماۋى كەرەك ەدى دەگەن پىكىردە.

«بايان ەسەنتايەۆا جۋرناليستەرگە بەرگەن سۇحباتىندا كۇيەۋىنىڭ بارلىق جاعدايدى جاساپ وتىرعانى، بۇعان دەيىن بايان تەك ءوز ىسىمەن عانا ارالاسىپ، ءۇي قىزمەتشىلەرىنە جالاقىسىن بەرۋ، مەكتەپتىڭ اقشاسىن تولەۋ ت.ب ىستەرمەن مۇلدە باس قاتىرماعانىن ايتادى. ياعني ونىڭ جاقسى جار بولعانىن كورۋگە بولادى. سوندىقتان ماسەلەنىڭ انىق-قانىعىن انىقتاپ، كۇيەۋىنىڭ جازاسىن جەڭىلدەتۋ كەرەك دەپ ەسەپتەيمىن» دەيدى تاڭشولپان اپاي.

سونىمەن قاتار 4 بالانىڭ اناسى بايان ەسەنتايەۆانىڭ كۇيەۋىنە قاتىستى ىستە تەك ءبىر جاقتى عانا پىكىر ايتىلدى دەگەن ويدا ەكەنىن دە جەتكىزدى.

«2016 جىلدىڭ جاز ايىندا بايان ەسەنتايەۆانىڭ باسىنان وتكەرگەن اۋىر جاعدايىنان كەيىن سۇحبات بەردى. بارلىق ب ا ق بولعان وقيعانى تەك باياننىڭ ايتۋىمەن عانا جاريالادى. ال باقىتبەكتىڭ پىكىرىن بىلگەن ەشكىم بولمادى. بايان ەسەنتايەۆا وزىنە ىڭعايلى جانە ءوزىن ۇتىمدى كورسەتەتىن تۇستارىن عانا ايتاتىنى انىق».

60 جاسار زەينەتتەگى ۇستاز، 4 بالانىڭ اناسى، نەمەرە ءسۇيىپ وتىرعان اق شاشتى اجە جانە قازاق ايەلى رەتىندە بايان ەسەنتايەۆانى ناسيحاتتاماۋعا جانە ودان ۇلگى الماۋعا  شاقىردى.