ب ا ق تۋرالى زاڭ جوباسىنان بلوگەرلەردى تىركەۋ جونىندەگى نورما الىنىپ تاستالادى. بۇل تۋرالى ق ر اقپارات جانە كوممۋنيكاسيالار ءمينيسترى داۋرەن ابايەۆ ءوزىنىڭ فەيسبۋكتەگى پاراقشاسىندا حابارلادى.
"قىمباتتى دوستار، ءبىزدىڭ مينيسترلىك اقپارات جانە كوممۋنيكاسيالار ماسەلەلەرىنە قاتىستى زاڭ جوباسى بويىنشا ءتۇرلى الاڭداردا قوعامدىق تالقىلاۋ وتكىزۋدە. بۇل پروسەسكە ساراپشىلار مەن جۋرناليستەر جانە ازاماتتىق سەكتور تارتىلۋدا.
تالقىلاۋدىڭ بارلىق كەزەڭىندە قاتىسۋشىلار ايرىقشا نازار اۋدارعان نورمالاردىڭ ءبىرى جاسىرىن پىكىر قالدىرۋشىلاردىڭ الدىن الۋ (دەانونيميزاسيا) ماسەلەسى بولدى. اتاپ ايتۋ كەرەك، بۇل نورما تروللينگكە، تەكسەرىلمەگەن اقپاراتتاردى تاراتۋ مەن ارانداتۋعا، ەكسترەميزمدى ناسيحاتتاۋ مەن الەۋمەتتىك جانجالدارعا شاقىرۋعا قارسى كۇرەسكە باعىتتالعان ەدى.
سونىمەن قاتار، جۇمىس توبى وتىرىستارىنىڭ شەڭبەرىندە ساراپشىلار مەن جۋرناليستەر تاراپىنان بلوگەرلەردى تىركەۋ ۇسىنىسىنا قاتىستى دا كوپتەگەن ەسكەرتپەلەر ءتۇستى.
ءبىز بۇل نورمادا جەلىدەگى تانىمال قولدانۋشىلاردىڭ باق-پەن تەڭەستىرىلۋىن جانە بۇل پروسەستىڭ ەرىكتى تۇردە اتقارىلۋىن قامتاماسىز ەتۋدى كوزدەگەن بولاتىنبىز.
مينيسترلىك بارىنشا اشىقتىقتى ۇستانعاندىقتان جانە قوعامنىڭ ءاربىر ۇسىنىسىن ەسكەرۋدى ءجون كورگەندىكتەن، بۇگىن جوعارىدا اتالعان نورمالاردى زاڭ جوباسىنان الىپ تاستاۋ جونىندە شەشىم قابىلداندى."، - دەپ جازدى مينيستر.
پىكىر قالدىرۋ