بۇل تۋرالى كەشە، 19 قاڭتاردا ايماق باسشىسى نۇرلان نوعايەۆتىڭ جىلىوي اۋدانىنا جۇمىس ساپارى كەزىندە بەلگىلى بولدى. ساپار بارىسىندا ايماق باسشىسى ءماجىلىس وتكىزىپ، وبلىستاعى جىلۋ بەرۋ ماۋسىمىنىڭ بارىسىن تالقىلادى. جيىنعا وبلىستىڭ كوممۋنالدىق شارۋاشىلىعىنا جاۋاپتى قىزمەتكەرلەر قاتىستى.

ماجىلىستە وبلىس تۇرعىندارىنىڭ جەكە قازاندىقتاردى قاۋىپسىزدىك ەرەجەلەرىن ساقتاماي پايدالانىپ وتىرعانى ءسوز بولدى. ماسەلەن، جىلىوي اۋدانىندا جەكە قازاندىقتىڭ 1858 پاتەردە جاعىلىپ وتىرعانى، ءبىراق سولاردىڭ 50ء-ىنىڭ عانا ءقاۋىپسىز ەكەنى ايتىلدى. مۇنداي جاۋاپسىزدىقتىڭ سالدارىنان بىلتىر وبلىستا 41 ادام گازدان ۋلانىپ، ءبىر كىسى قازا بولعان. 

ءار اۋدان ەرەكشەلىكتەرىن ەسكەرىپ ماسەلەنى رەتتەۋدىڭ وزىنشە جولدارىن ۇسىندى. ماسەلەن، جىلىوي اۋدانىنىڭ اكىمى تۇرعىنداردان ەرەجەنى ساقتاۋدى تالاپ ەتەمىز، بولماسا ولاردى ورتالىق جىلۋ جۇيەسىنە قوسامىز دەسە، ماحامبەت اۋدانى اكىمدىگى ماسەلەنى ءبىر توپ پاتەرگە ورتاق قازاندىق ورناتۋ ارقىلى رەتتەيمىز دەدى.

ماجىلىستە ايتىلعان تاعى ءبىر ماسەلە تۇرعىنداردىڭ قازاندىقتارىن تەكسەرتۋدەن قاشاتىندىعى بولدى.

"اتىراۋ قالاسىنداعى بالىقشى اۋدانىندا تۇرعىنداردىڭ كوبى ارتىق جۇمىستان قاشىپ، ەسىكتەرىن اشپايدى. سول سەبەپتى، قازاندىقتاردى تولىق تەكسەرىپ شىعا الماي وتىرمىز"، - دەدى اتىراۋ قالالىق كوممۋنالدىق شارۋاشىلىق ءبولىمىنىڭ باسشىسى سەرىكباي قازييەۆ.

ايماق باسشىسى نۇرلان نوعايەۆ قازاندىقتار ماسەلەسىن كەلەسى جىلىتۋ ماۋسىمىنا دەيىن شەشۋ كەرەكتىگىن باسا ايتىپ، قاراماعىنداعىلارعا تاپسىرما بەردى.

"قازاندىقتار ماسەلەسىن شەشۋ ەڭ الدىمەن تۇرعىنداردىڭ وزدەرى ءۇشىن قاجەت. قيىن كەزەڭدەردە حالىقتىڭ جىلىنۋ ءۇشىن قازاندىقتاردى اسىعىس ءجۇرىپ وزدەرى ورناتىپ العانىن جاقسى تۇسىنەمىز. دەگەنمەن، ءقازىر جاعداي تۇزەلدى. قاۋىپسىزدىكتى تولىقتاي قامتاماسىز ەتۋگە مۇمكىندىك بار. بۇل ەڭ الدىمەن ءار ادامنىڭ، ءار وتباسىنىڭ جەكە قاۋىپسىزدىگى. سونى حالىق ءتۇسىنۋى كەرەك. ب ا ق ارقىلى تۇرعىندارعا تۇسىنىك جۇمىستارىن جۇرگىزۋدى تاپسىرامىن"، - دەدى وبلىس اكىمى قاراماعىنداعىلارعا.

ەستەرىڭىزگە سالالىق، بۇعان دەيىن ۇكىمەت باسشىسى باقىتجان ساعىنتايەۆ اكىمدەرگە جىلىتۋ ماۋسىمىن ءتيىستى دەڭگەيدە وتكىزۋدى تاپسىرعان ەدى.

قاڭتاردىڭ باسىندا اۆتوماتتاندىرىلعان جىلىتۋ قازاندىعىنداعى اقاۋدىڭ سەبەبىنەن قاراعاندى وبلىسىنداعى شاحان ەلدى مەكەنى مەن شىمكەنت قالاسىندا ءىرى اپات بولىپ، بىرنەشە ادام قازا تاپتى.