سورلى سولداتتارىم-اي.  بىزدەگى بىردە-بىر گەنەرال وسىلاي جىلاي الا ما؟ ءوزىنىڭ قول استىنداعى جاۋىنگەرىنە جانى اشىرلىقپەن جانە قامقورلىقپەن قاراي المايتىن پولكوۆنيك پەن مايوردان، قاھارلى بولسا دا ادىلەتتى دۇشپان ارتىق.

     اۋەلدە ويدا جۇرگەن ءبىراق باسقىم كەلمەي جۇرگەن تاقىرىپ ەدى. امال جوق اۋىزدى اشتىق
      اتتەڭ! اتتەڭ! دەيسىڭ. نەگە ءبىزدىڭ ساربازدار ايدىڭ كۇننىڭ امانىندا اتىلىپ بولماسا اسىلىپ مايىپ بولىپ جاتىر؟ ەل شەتىنە جاۋ تيگەن بولماسا وعى تۇسكەن جوق. اڭىراپ اناسى، زار يلەپ تۋىس-تۋعانى قالعانى. جاپ-جاس، ورىمدەي جىگىتتەر. بىرەۋى ەندى عانا كەلگەن اسكەرگە، بىرەۋى انە-مىنە اي-كۇنىن ساناپ ۇيىنە اسىققان جاس سولدات. ارمانىنا قول سوزىم قالعاندا كوكتەي قىرقىلىپ، اياقاستى اجال قۇشىپ جاتىر. كەسىلگەن عۇمىر، جەلگە ۇشقان ءۇمىت. وسى تاقىرىپ مىڭ جەردەن ايتىلسا دا اسكەردەگى الىمجەتتىك جاساۋ باسىلماي-اق تۇر. ادامعا ادام ەمەس، حايۋان رەتىندە قاراۋ ارميادا شەگىنە جەتتى. اسكەري ءومىردىڭ ەڭ ۇلكەن قاتەلىگى اركىمنىڭ جەكە باس ار-نامىسىنا باسقىنشىلىق جاساۋ. جاس سولداتتىڭ جان دۇنيەسىنە سەبەپسىزدەن-سەبەپسىز قول سۇعۋ. ءبىز ءالى كۇنگە دەيىن قورلاۋدى تاربيەلەۋ دەپ قابىلداپ كەلەمىز. سول ارقىلى باعىندىرۋ، ۇستاۋ، سىندىرۋ دەگەن ورىستىڭ تۇرمەسىنەن تاراعان جامان ادەتتى زاكون ەتىپ كەلەدى.  شىنىمدى ايتسام ءدال وسىنداي قورلىققا توزبەي ءولىپ كەتكەن ساربازداردى ناعىز نامىسشىل ەركەكتەر دەر ەم. ويلاساڭىزدار، كىم-كىم-اق، شىن اشىنعاندا، ءبۇيتىپ مال بولىپ جۇرگەنشە ولگەنىم ارتىق دەمەي مە. ال، ولگىسى كەلمەي امان-ەسەن ۇيىنە كەلگەندەر ەرتەڭ نە ىستەمەك؟ ەگەر قۇداي ساقتاسىن ەلگە جاۋ تيسە، جاڭاعى قورلىق كورگەن سولداتىڭ جاۋدى اتا ما، الدە الدىمەن ءوزىنىڭ نامىسىن تاپتاعان ساپتاسىن اتا ما؟ 

      بىزدەگى قاتەلىك ءسال تومەن شەندى بولسا اراداي تالاي جونەلەتىن، جوعارى شەندىنى كورسە شىبىنداي ۇيمەلەپ ارتىن جالاي قالاتىن ارام تاماقتىعىمىز دا. قوعامدىق ورتاداعى جابايىلاۋ قارىم-قاتىناس، اسكەري ومىردە ودان دا اۋىر تۇردە جۇرگىزىلىپ كەلەدى. ءبىز 21 عاسىر قازاقتارى ءبىرىمىزدى-بىرىمىز قورقىتىپ سىيلاتۋدى قويماساق، قاتارداعى جاۋىنگەرلەردىڭ اجال قۇشۋى ازىر-بۇگىن توقتامايدى. تالاپتانىپ، تالپىنىپ كەلگەن جاس جاۋىنگەردىڭ جان دۇنيەسىن قورلاعانشا، تان دۇنيەسىن ماشىق پەن جاتتىعۋعا اياماي سالىپ نەگە تەمىردەي شىڭدامايمىز؟ نەگە بىرەۋدىڭ ورىمدەي بالاسىن ولىمگە يتەرمەلەپ، وزىمىزدەي ءيىسى قازاق ءناسىلىن تاباننىڭ استىنا سالعانشا، ونىڭ رۋحىن جانىپ، ەلى-جەرى ءۇشىن شاھيت بولۋعا نەگە باۋلىمايمىز؟ ميلليارد قىتايدان ەستىمەگەن سۇمدىقتى 20 ميلليونعا جەتەر جەتپەس حالىقتان ەستىپ، كورىپ جاتىرمىز. ءبىز نە، جۇرەگى جوق حالىققا اينالعانىمىز با؟ نە ءۇشىن بىلىق ەتپەيمىز؟ ءتىپتى كەيىستىك بىلدىرۋگە دە شاما كەلمەي جاتقانداي. ويلاساڭىزدار، بۇل دەگەنىڭىز وتە ۇلكەن تراگەديا، اۋىر ولىمدەر.

جاقسىبەك قاقان