الماتى قالالىق سوتى ءبىرتۇتاس زەينەتاقى جيناقتاۋ قورى (بزجق) باسشىلارىنىڭ تۇتقىندالۋ سەبەبى «بۋزگۋل اۋرۋم» كومپانياسىنىڭ وبليگاسيالارىن ساتىپ الۋعا بايلانىستى ەكەنىن جاريالادى. ۇلتتىق بانك بۇل قاراجات قوردىڭ ءوز اكتيۆى ەسەبىنەن بولىنگەنىن، سالىمشىلاردىڭ اقشاسى ورنىندا ەكەنىن ايتىپ اقتالدى. اۋ، سوندا ميللياردتاعان سوما قوردىڭ اكىمشىلىگىنە قايدان كەلدى؟ ولار سالىمشىلاردىڭ اقشاسىن، ياعني حالىقتىڭ اقشاسىن اينالدىرۋدان تابىلعان تابىس ەمەس پە؟ قور اكىمشىلىگى مەن قور ەكەۋى ەكى باسقا زاڭدى تۇلعا بولاتىن بولسا، بارشا قازاقستاندىقتاردىڭ بۇل كۇنى تريلليوننان اسقان سالىمى يەسىز ەكەن-اۋ، ونىڭ اقشاسىن اينالدىرىپ، قورعا تابىس تۇسىرۋگە ءتيىستى اكىمشىلىك وزىنە تابىس تابا بەرەدى ەكەن-اۋ؟
ماجىلىستەگى قازاقستاننىڭ حالىقتىق كوممۋنيستەرى پارتياسىنىڭ فراكسياسى اتىنان دەپۋتات ايقىن قوڭىروۆ پرەمەر-مينيستر ب.ساعىنتايەۆ پەن ۇلتتىق بانك ءتوراعاسى د.اقىشيەۆكە دەپۋتاتتىق ساۋال جولداپ، مۇندايدىڭ ادىلەتسىزدىك ەكەنىن جەتكىزدى. قور اقشاسىنىڭ اينالۋىنان تۇسكەن تابىستىڭ ءبارى ونىڭ ءوز قامباسىن تولىقتىرۋى كەرەك دەگەن ساۋالدا.
«قازاقستان رەسپۋبليكاسىندا زەينەتاقىمەن قامتاماسىز ەتۋ تۋرالى» زاڭدا زەينەتاقى قورىنىڭ اكتيۆىن اينالدىرۋدان تابىلعان ءتۇسىمنىڭ قايدا كەتىپ، قالاي جۇمسالاتىنى دا كورسەتىلمەگەن. ەگەر وسى زاڭدا ماسەلە ناقتىلانعان بولسا باسقارۋ اكىمشىلىگى تابىستى وزىنە پايدالانباس ەدى. سونىمەن قاتار قور اكىمشىلىگى اي سايىن بارلىق زەينەتاقى اكتيۆىنىڭ 0،025% كولەمىندە سىياقى الادى ەكەن. 2016 جىلدىڭ 11 ايىندا ول 14 ميلليارد 622 ميلليون تەڭگە بولىپتى. وسى دا ادىلەتسىز، ودان دا اكىمشىلىكتى اقشا تابۋ ەمەس، ناقتىلى ەڭبەكاقى الاتىن باسقارما قىلىپ قۇرىپ، ەڭبەكاقى قورىن بەلگىلەپ، سودان عانا اقى الۋعا قويۋ كەرەك ەدى عوي. ويتكەنى، قوردىڭ جانىنان تابىس تاباتىن اكىمشىلىك بولسا ول ءوز قالتاسىنىڭ مۇددەسىن كوبىرەك ويلايدى ەمەس پە؟ دەپۋتاتتىڭ ساۋالىنان وسىنداي وي تۋادى.
س.ەلەۋ، ساراپشى
