ءبىر جارىم جاستاعى اقجول ەسىمدى ءسابي قايتىس بولعان اۋرۋحانادا تەكسەرىس ءجۇرىپ جاتىر. قىزمەتتىك تەكسەرىستى مەديسينالىق جانە فارماسيەۆتيكالىق قىزمەتتى باقىلاۋ كوميتەتىنىڭ وبلىس بويىنشا فيليالىنىڭ وكىلدەرى جۇرگىزۋدە دەپ حابارلايدى قازاقپارات ءتىلشىسى.
وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتى وكىلىنىڭ مالىمەتىنشە، بالانىڭ ولىمىنە نە سەبەپ بولعانى جونىندە تولىقتاي تەكسەرىلەدى. ءتيىستى شارا قولدانىلادى.
بۇعان دەيىن حابارلاعانىمىزداي، وتباسى بالاسىنىڭ ولىمىنە دارىگەرلەردى كىنالاعان بولاتىن. وقيعا كوكسۋ اۋداندىق اۋرۋحاناسىندا بولدى. ءىشى اۋىرىپ اۋرۋحاناعا تۇسكەن بالانىڭ ءۇش كۇندىك ەمنەن كەيىن بەتى بەرى قاراپ، جاعدايى جاقسارادى. ءبىراق، اتا-انانىڭ سوزىنە قاراعاندا، كۇرە تامىرعا سالىنعان سيستەمادان قان توقتاماي، ءسابي قانسىراپ كوز جۇمعان. «بالاعا سيستەما سالعان دارىگەرلەر باقىلاۋ جاسامادى، ەسەسىنە وزدەرى شاي ىشۋگە كەتىپ قالدى» دەگەن اتا-انا ەندى سوتقا جۇگىنبەك.
