ديماش قۇدايبەرگەنوۆتىڭ ميللياردتار مەكەندەگەن اسپان استى ەلىندە بارىنەن ءباسى باسىم ءتۇسىپ، باس جۇلدەنى قانجىعاعا بايلاعانىن بىلەمىز. ءبىرىنشى كەزەڭ بولسا دا، ونىڭ ءوزى ءبىز ءۇشىن ۇلكەن جەتىستىك، ۇلى جەتىستىك دەۋگە دە بولاتىنداي. اۋزىن ايعا بىلەگەن ەلدىڭ "مەن" دەگەن انشىلەرىن شاڭ قاپتىردى سابازىڭ. جۇرەگى قازاق دەپ سوققان ءار ادامنىڭ كوزىنە جاس ءۇيىرىلدى. قازاق بولىپ تۋعانى ءۇشىن ماقتاندى دەپ جازادى massaget.kz. 

كەيبىرەۋلەر "ويباي، شەتەلدى باعىندىرامىز"، "ازيانى تاڭعالدىرۋعا بارايىن دەپ جاتىرمىز" دەپ ىسقىرىقتارى جەر جارىپ جۇرگەندە، ديماش سوزبەن ەمەس، ىسپەن دالەلدەپ، ءۇنسىز بارىپ قاپتاعان جۇڭگو تەلەارناسىنىڭ تورىنەن ءبىر-اق شىقتى. ءمارت ەكەن. جىگىت ەكەن. 

ۇستىندە اۋىر جۇك. قازاقستان اتىنان شىعىپ، قازاق ۇلتىنىڭ نامىسى ءۇشىن بارىن سالدى. كومەيىنە قۇمىر قۇس ۇيالاعان بوزتورعاي ءانشىنى ءتاڭىر بەرگەن تالانتى الىپ شىقتى. 1 پايىز تالانت، 99 پايىز ەڭبەك بولسا، قاراپايىم كورەرمەن تۇسىنە بەرمەيتىن مۋزىكا الەمىنىڭ قىر-سىرىن مەڭگەرگەنى انىق بايقالدى. ماقتانامىز. تەك تىل-كوزدەن امان بولسا ەكەن دەپ تىلەيمىز. تىلەكشىمىز. 

كۇللى قازاقتىڭ عانا ەمەس، بۇكىل ازيانىڭ جارىق جۇلدىزىنا اينالىپ شىعا كەلدى ءبىر ساتتە. ول تۋرالى ءبىز تۇسىنبەيتىن تىلدە جازىپ جاتىر، ايتىپ جاتىر. الەمدىك جۇلدىزعا اينالۋدىڭ الدىندا تۇر. 

كەزىندە ديماش قازاقستان تەلەارنالارىنىڭ بىرىندە انشىلەر بايقاۋىنا قاتىسقاندا ءبىزدىڭ سىنشىسىماقتار نە دەپ ەدى؟ ديماش ول كەزدە ءالى تانىلماي تۇرعان ەدى. تەك قازىلار القاسىنىڭ ىشىنەن مايرا مۇحاممەد قىزى عانا ديماشتىڭ تالانتىن تانىپ وتىردى. قالعاندارى ديماشتى توبەلەرىنە كوتەرمەك تۇگىلى، ءبىر اۋىز جىلى ءسوز دە ايتپاپ ەدى عوي. سول ەسىمە تۇسسە، قاتتى قىنجىلام. قازاق دەسەڭ، وزىڭە تيەدى ەمەس پە؟ قازاق سىنشىلارىنىڭ كاسىبي بىلىكسىزدىگىنە قىنجىلام.

 ءجا، وتكەن نارسە ءوتتى. ديماش "سلاۆيان بازارىنان" باس جۇلدە الىپ كەلىپ بارىپ مويىندالدى. ال ءقازىر ءتىپتى سول كەزدە ديماشقا سىن ايتقانداردىڭ وزدەرى ديماشتى ءبىر كورۋگە، ءبىر تىلدەسۋگە زار بولىپ قالدى. ويتكەنى بۇرىن-سوڭدى بۇنداي دارەجەگە جەتكەن قازاق ءانشىسى بار ما، جوق پا؟! اتاقتى امىرە قاشاۋبايەۆتىڭ فرانسيانى تامساندىرعانىن تاريحتان بىلەمىز. ساۋساقپەن سانارلىق.  

ديماشتىڭ دەڭگەيى ازيانى عانا ەمەس، بۇكىل الەمدى باعىندىرۋعا جەتەدى. وعان كۇمان جوق. تاربيەسى، ساۋاتتىلىعى، بولمىسى، كاسىبي دەڭگەيى، سىرتقى ءتۇرى – ءبارى-بارى ءتورت اياعىن تەڭ باسىپ تۇر. ءبىز قازاقتىڭ قارا بالاسىن توبەمىزگە كوتەرىپ، الاقانىمىزدا ايالاۋىمىز كەرەك. ءجۇز جىلدا ءبىر تۋاتىن تۋما تالانتتى قولدا باردا باعالاۋعا ءتيىسپىز. ميللياردتاعان ادام كوز تىگىپ وتىرعان ەكراننان قازاق تىلىندە سويلەپ، تاۋەلسىز ەلىمىزدى پاش ەتكەن ارەكەتى – زور قۇرمەتكە لايىق.

قاراپ وتىرساق، ءيميدجى وزگەرگەنى سول ەدى، ءبىز تامساناتىن ك-پوپ جۇلدىزىنان اينىماي قالدى. ايدولداردان ارتىق تۇسپەسە، كەم تۇسپەيتىن سىرتقى بەينەسى ءبىراز قىزدىڭ جۇرەگىن جارالاپ ۇلگەرگەن سياقتى ) 

جۇڭگو نە سەبەپتى قازاقتىڭ قارا بالاسىنىڭ جولىن اشىپ وتىر؟! ويتكەنى ولارعا جاڭا ەسىم، جاڭا جۇلدىز كەرەك. ازيا جۇلدىزى كەرەك. 

ديماش قۇدايبەرگەنوۆ – قازىرگى قازاقستان شوۋ-بيزنەسىنىڭ ريەۆوليۋسيونەرى. ءانشىمىن دەپ جۇرگەن ادامنىڭ ءوزى ۇيالىپ، ءان ايتۋدان تارتىنىپ قالعان شىعار. ءاندى ايتقاندا جانىن جەپ ايتاتىنداردىڭ ءوزى جولدا قالىپ، ميكروفوننان التى مەتر الىستا قاشىپ جۇرگەنگە ۇقسايدى. ويتكەنى شالا جانسار ءاننىڭ ءوزىن بيلەۋگە كەلسە بولدى، جۇتا بەرەتىن قازاقتىڭ كوزى بىرتىندەپ اشىلاتىن بولدى. مىناداي كاسىبي جوعارى ءاندى قۇلاعىنا قۇيعان سوڭ، ەندى ءاندى تالعاپ تىڭدايدى دەگەن ۇلكەن ءۇمىتىم بار. اسىرەسە، ءوسىپ كەلە جاتقان جاستار ءۇشىن قۋانام... 

قۋان، قازاق! وسىنداي مىقتىنىڭ قازاقتان شىققانىنا قۋان...