«قامشى» پورتالى – وتاندىق اقپارات كەڭىستىگىندە وزىندىك ورنى بار اقپارات قۇرالى. پورتالدا جاريالانعان اقپاراتتار مەن ساراپتامالار ۇنەمى وقىرماندار تاراپىنان قىزۋ تالقىلانىپ، قوعام قىزىعۋشىلىعىن  تۋعىزىپ جاتادى.

18 قاڭتار كۇنى سايتتا «بايان باقىتىن تاپتى، باقىتبەكتى تۇرمەدەن شىعارۋ كەرەك» اتتى ماتەريال جارىق كوردى. وسىعان بايلانىستى بەلگىلى پروديۋسەر بايان ماقسات قىزى ءوزىنىڭ Instagram پاراقشاسىندا «قامشى» پورتالىنا قاراتىلعان نارازى تالابىن جاريالادى. وندا ب. ماقسات قىزى ءوزىنىڭ العاش رەت «قامشى» پورتالىنا تالاپ جاساپ وتىرعانىن ايتا كەلىپ، باق-تان جەكە ومىرىنە قاتىستى اقپاراتتىق ەتيكا ساقتاۋدى، ايتپەگەندە زاڭعا ساي قۇقىعىن قورعايتىنىن باياندايدى. ول جاريالاعان حاتتا – جەكەمەنشىك ادۆوكاتتار كەڭەسىنىڭ ءبىرى 20 قاڭتاردا ادۆوكاتتىق قىزمەتكە بايان ەسەنتايەۆانىڭ جۇگىنگەنىن جازادى. ەسەنتايەۆا «قامشى» پورتالى جاريالاعان ماتەريال ءوزىنىڭ ار-وجدانى مەن ىسكەرلىك بەدەلىنە نۇقسان كەلتىرگەنىنە شاعىمدانىپ، «قامشى» پورتالىنىڭ كەشىرىم سۇراپ ماتەريال جاريالاۋىن تالاپ ەتكەن.

قۇرمەتتى، بايان ماقسات قىزى!

ءسىز – قازاقستان ونەر الەمىندە اسا تانىمال تۇلعالاردىڭ ءبىرىسىز! ءسىزدىڭ شىعارماشىلىق ءومىرىڭىز كەز-كەلگەن وتانداسىڭىزدى بەيجاي قالدىرمايدى. وعان الەۋمەتتىك جەلىدەگى وقىرماندارىڭىزدىڭ سانى، شىعارماشىلىق ءومىرىڭىز تۋرالى جازىلعان ماتەريالداردىڭ وقىلىمى دالەل! تانىمالدىعىڭىز سونشالىق، سوڭعى كەزدەرى ءسىزدىڭ جەكە ومىرىڭىزدە بولعان وقيعالاردىڭ ءوزى قازاق قوعامىندا قىزۋ تالقىعا ءتۇسىپ، ەلدىڭ ءجىتى نازارىنا ىلىگۋدە.

«قامشى» پورتالى – ەركىن اقپارات الاڭى. سايت بەتىندە مەملەكەتتەگى ماڭىزدى وقيعالار، ساياسي جاڭالىقتارمەن قاتار ەلدى ەلەڭ ەتكىزگەن ماسەلەلەر ءجيى جارىق كورىپ، جاريالانىمدارعا وقىرماندار دا ءۇن قاتىپ، رەداكسياعا حابارلاسىپ جاتادى. سونداي بەلسەندى وقىرماندارىمىزدىڭ بىرىمەن 18 قاڭتار كۇنى پورتالدىڭ كەزەكشى ءتىلشىسى اسەم المۇحانبەت سويلەسكەن. وندا وقىرمان ءسىزدىڭ قازاقستانداعى قىز-كەلىنشەكتەر ۇلگى تۇتاتىن تۇلعا ەكەنىڭىزدى ايتا كەلىپ، ومىرىڭىزدە سوڭعى ۋاقىتتا بولعان وقيعالارعا قاتىستى ءوز پىكىرىن بىلدىرگەن. «قامشى» پورتالى ماتەريالدى اقپارات تاراتۋ ەرەجەلەرىنە سۇيەنە وتىرىپ جاريالادى. ماقالادا وقىرمان ەسىمى ءوز ءوتىنىشى بويىنشا وزگەرتىلىپ بەرىلگەن.

قۇرمەتتى، بايان ماقسات قىزى!

قامشى پورتالى ءسىزدىڭ نارازى تالابىڭىزعا ساي مىنانى حابارلايدى:

بىرىنشىدەن، ءوزىڭىز اتاعان ماتەريالدىڭ اۋديو نۇسقاسى، حابارلاسقان وقىرماننىڭ تەلەفون بايلانىسى بار. ول مالىمەتتەر ءسىز نارازىلىق تانىتىپ وتىرعان ماتەريالدىڭ رەداكسيانىڭ ۇستانىمىنان تۋعان دۇنيە ەمەستىگىنە دالەل بولا الادى.

ەكىنشىدەن، ءسىز نارازىلىق ءبىلدىرىپ وتىرعان ماتەريال ادۆوكاتتار القاسىنىڭ حاتىندا جازىلعانداي ەكى تىلدە ەمەس، تەك قازاق تىلىندە جاريالاندى.

ۇشىنشىدەن، ق ر «ب ا ق تۋرالى» زاڭىنىڭ تالاپتارىنا ساي «قامشى» پورتالى جوعارىدا اتالعان ماتەريالعا قاتىستى جاۋاپ، تەرىستەمەلەر جاريالاۋدان باس تارتپايدى. زاڭناماعا ساي، وسى جاعدايعا قاتىستى ءسىزدىڭ دە كوزقاراسىڭىزدى سايت بەتىندە جاريالاۋعا ءازىرمىز.

تورتىنشىدەن، ءسىزدىڭ نارازىلىعىڭىزدى تۋعىزعان ماتەريال اۆتورىنىڭ پىكىرى جەكە باسىڭىزعا قولايسىزدىق تۋعىزىپ، ار-نامىسىڭىزعا نۇقسان كەلتىردى دەپ ساناساڭىز، اتالعان ماتەريالدى سايتتان الىپ تاستاۋ مۇمكىندىگى قاراستىرىلاتىنىن حابارلايمىز. 

جازيرا بايدالى، «قامشى.kz» پورتالىنىڭ باس رەداكتورى