ۇستىمىزدەگى جىلى قازاقستاندا ەلەكتروموبيلدەر مەن ولاردىڭ ينفراقۇرىلىمىنا ارنالعان ستاندارتتار ازىرلەنەدى. بۇل تۋرالى بۇگىن ماجىلىستە ق ر ينۆەستيسيالار جانە دامۋ ءبىرىنشى ۆيسە-ميينسترى البەرت راۋ ءمالىم ەتتى، دەپ حابارلايدى قازاقپارات.

«ولار جوسپاردا بار. 2017 جىلدان باستاپ ستاندارتتار ازىرلەنەدى. ونداعى شامامەن 13 نەمەسە 17 ستاندارت ءقازىردىڭ وزىندە قالىپتاستىرىلعان. ءبىز بيزنەسپەن كەلىستىك. جەتىسپەيتىن ستاندارتتاردى بيزنەستىڭ ءوزى جاسايتىن بولادى. مەن مەملەكەت ەسەبىنەن ازىرلەنەتىن ستاندارتتاردى ايتىپ وتىرمىن. ەلەكتروموبيلدەر مەن وندىرۋشىلەرگە ارنالعان يفراقۇرىلىمدار ستاندارتى  جايىندا ءسوز بولىپ وتىر»، - دەدى ول ستاندارتتاۋ ماسەلەلەرى جونىندەگى زاڭ جوباسىن تانىستىرۋدان كەيىن قازاقپارات تىلشىسىنە بەرگەن سۇحباتىندا.

ونىڭ ايتۋىنشا، ەلەكتروموبيل ساتىپ الۋ وتە ءتيىمدى. سوندىقتان الداعى ۋاقىتتا ونىڭ قازاقستاندا ساتىلۋ كورسەتكىشىنىڭ ارتاتىندىعى بولجانۋدا.

«ءبىز ءبىر شاقىرىمعا كەتەتىن ەلەكتر ەنەرگياسىنىڭ بەنزيننەن 4 ەسەگە از ەكەندىگىن ەسەپتەپ شىعاردىق. قازىرگى ۋاقىتتا ەلەكتروموبيلدىڭ بىردەي مودەلدەگى جانارمايمەن جۇرەتىن اۆتوموبيلدەن قۇنى 30-دان 50 پايىزعا دەيىن قىمبات بولىپ تۇر. ول 3-4 جىلدىڭ ىشىندە بەنزين مەن ەلەكتر ەنەرگياسى باعاسىنىڭ اراسىنداعى ايىرماشىلىقتان ءوزىن-وزى اقتايدى. ءبىراق، كەز كەلگەن ادام ونى ساتىپ الا المايدى. ەڭ بىرىنشىدەن ءبىز ستاندارتتاردى ازىرلەيمىز. ەكىنشىدەن، بىرتىندەپ ينفراقۇرىلىمىن قالىپتاستىرا باستايمىز. ويتكەنى، قالاي بولعاندا دا قازاقستاندىقتار ەلەكتروموبيلدەردى ساتىپ الادى. مۇنى ءبىز كورىپ وتىرمىز. وتكەن جىلى قازاقستان بويىنشا بىرنەشە ءجۇزى الىندى. بۇل ءبىز ويلاعاننان دا جىلدام داميتىن بولادى»، - دەدى راۋ.

ايتا كەتەيىك، بۇگىن ماجىلىستە «ستاندارتتاۋ تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ولشەم بىرلىگىن قامتاماسىز ەتۋ جانە ستاندارتتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ق ر زاڭى جوبالارىنىڭ تۇساۋكەسەرى ءوتتى. نەگىزگى باياندامانى  ق ر ينۆەستيسيالار جانە دامۋ ءبىرىنشى ۆيسە-ميينسترى البەرت راۋ جاساپ، دەپۋتاتتار تارابىنان تۋىنداعان سۇراقتارعا دا جاۋاپ بەردى.