راسىن ايتسام، ءبىلىم مينيسترلىگىنىڭ قازاق ءتىلى مەن ادەبيەتىن تىزىمنەن الىپ تاستادى دەگەنگە ونشا ءبىر ءمان بەرمەپپىن. "كەزەكتى ءبىر شۋ شىعار، ولاي بولۋى مۇمكىن دە ەمەس قوي" دەگەم دە قويعام. "اكەم اتى شاپقان سايىن ورلەيدى" دەمەكشى، باقسام مىنا اڭگىمە شىنعا اينالىپ بارا جاتقانعا ۇقسايدى عوي ءوزى.
وۋ، ساعادييەۆ مىرزا ابايلاساڭىزشى! ەلباسىنىڭ قاباعىنا قاراماساڭىز دا، ەلدىڭ قاباعىنا قاراڭىز. قازاقتىڭ ءتىلى جوق بولسا، ءسىز دە، ءسىزدىڭ اكەڭىز، بولاشاق ۇرپاعىڭىز دا جوق. ءسىز بالكىم، اكادەميكتىڭ بالاسى، ايتالتاق بوپ وسكەن شىعارسىز. سول سەبەپتى دە ۇلتتىڭ جانىن جان-جۇرەگىڭىزبەن تۇسىنە الماسسىز. مينيستر بولماي جاتىپ-اق، اففشورداعى اقشالىلاردىڭ قارالى تىزىمىنەن اتىڭىز شىققاندا دا ءۇنسىز قالدىق قوي وسى. ەندى كەلدى، جاس ادام جاعاسىنان جارماسپايىق دەپ. "ءبىر اپامنان، ءبىر اپام سوراقى" دەمەكشى، ءسىزدىڭ رەفورمالارىڭىزداعى سوراقىلىقتىڭ بىتەر ءتۇرى بايقالمايدى.ءسىزدى بىلمەدىم، الايدا مىنا قازاقتىڭ ەرتەڭگى كۇننەن ءۇمىتى ۇلكەن. بىلە بىلسەڭىز، ءسىزدىڭ ورىنتاق تا ەڭ ءبىر ۇرىمتال مانساپقا جاتادى. ويتكەنى وندا ەلدىڭ بولاشاعى تۇر. دەمەك، سىزگە دەگەن جاۋاپكەرشىلىك تە ەكى ەسە جوعارى. ءسىز كەرىسىنشە، ءبارىمىزدى ماسقارا قىلدىڭىز عوي. الدە، "اتىڭ شىقپاسا جەر ورتە" دەپ، ەلدىڭ ەسىندە وسىلايشا قالۋ ماقساتىن قويعانسىز با، الدىڭىزعا. ءسىز ەلدىڭ دە، ەلباسىنىڭ دا الدىندا جاۋاپ بەرەسىز ءالى. كوپتىڭ نالاسىمەن ويناماڭىز. وندايلاردىڭ سوڭى ەشۋاقىت جاقسىلىققا اپارعانىن كورمەك تۇرعاي، ەستىگەن پەندە دە جوق. الدە دە بولسا، قالعان-قۇتقان ابىرويىڭىزدى ساقتاپ قالىڭىز. "حالىق كونەدەن سۇرايدى، قايىق كەمەدەن سۇرايدى" دەگەن. اقىل سۇرايتىن كەمەڭىز بار عوي، شۇكىر....

ەلۋباي اۋەزوۆتىڭ فەيسبۋك پاراقشاسىنان