جەرلەسىمىز ابدىعاليدىڭ جاپونيادا تۇرىپ جاتقانىنا 13 جىل بولدى. ول جاپوندىق قىزعا ۇيلەنىپ، سول جەردەن جۇمىس تاپتى. ءقازىر قانات، نۇريا ەسىمدە ەكى بالاسى بار.

ابدىعالي ۋنيۆەرسيتەتتى بىتىرگەننەن كەيىن قىتايعا ءتىل ۇيرەنۋگە بارادى. سول جەردە بولاشاق ايەلىمەن تانىسادى.

ايەلىم ءدارىسحاناعا كىرگەندە مەنىڭ جانىمدا عانا بوس ورىن بولدى. ءبىر كورگەننەن عاشىق بولدىم دەپ ايتا المايمىن. الايدا تەلەفون نومەرىن الدىم. ايەلىم نومەرىن بەرگەنىنە ءوزى تاڭ قالادى. سەبەبى جاپوندىقتار بەيتانىس ادامعا تەلەفون نومەرىن بەرمەيدى ەكەن.

ايكومەن كەزدەسىپ جۇرگەندە ونىڭ اقشانى ۇنەمدەي الاتىنى قاتتى ۇنادى. جاپوندىق ستۋدەنتتەر تۇبىرتەكتەردى جيناپ، شىعىندارىن ەسەپتەيدى. ءقازىر ءبىزدىڭ بالالارىمىز دا اتا-اناسى مەن اتا، اجەسىنەن العان اقشانى جازىپ وتىرادى.

مەنىڭ وقۋعا تولەيتىن اقشام بولماعاندىقتان، وقۋدى تاستاپ ەلگە ورالۋىما تۋرا كەلدى. كەزدەسىپ جۇرگەن قىزىما ونى ايتقاندا بايلانىسىپ تۇرۋدى ۇسىندى. ءبىر كۇنى ايكو ماعان ايتپاستان الماتىعا ۇشىپ كەلدى. اۋەجايدان حابارلاسقاندا قاتتى تاڭ قالدىم. وسىلايشا ايكو ەكەۋىمىز 3 جىلدان كەيىن وتباسىن قۇردىق. ونىڭ دا، مەنىڭ دە اتا-انام قارسى بولدى. الايدا ءبىزدى ەشتەڭە توقتاتا الماۋشى ەدى.  

قازاق داستۇرىمەن وتكەن توي ايكونىڭ تۋىستارىن قاتتى تاڭ قالدىردى. سەبەبى جاپونيادا ءاربىر تىيىن، ءار سەكۋند ەسەپتەۋلى. قوناقتار كوپ دەگەندە جەتىگە دەيىن عانا وتىرادى. بارلىعىنىڭ قولدارىندا 50 مىڭ يەن ($500) سالىنعان كونۆەرت بولادى. تىلەكتەرىن ايتىپ، ۇيىنە قايتادى. ەشقانداي اسابا، بي، كونسەرت بولمايدى.

قوناقتاردىڭ تويدا ىشكەنىن كورىپ تاڭ قالىسىن جاسىرمادى. ناتيجەسىندە ايكونىڭ اكەسى ومىرىندە العاش رەت ەسىن جوعالتقانشا ىشكەنى بار. ەرتەسى كۇنى جاپوندىق قوناقتاردىڭ اسقازاندارى اۋىرىپ، بىرەۋى اۋرۋحاناعا ءتۇسىپ قالدى.

تويدان كەيىن مەن جاپونياعا بارۋدى جوسپارلامادىم. الايدا جاس ايەلىم ءبىر، ەكى جىل جاپونيادا تۇرىپ، ۇناماسا قايتا قازاقستانعا كوشىپ كەلۋدى ۇسىندى. ءبىر، ەكى جىلىم 13 جىلعا سوزىلدى.  

بالالارىم قانات پەن نۇريا جىل سايىن قازاقستانعا كەلىپ تۇرادى. ماعان جاعۋ ءۇشىن قازاقپىن دەيدى، اناسى مەن جاپونياداعى تۋىستارىن رەنجىتپەۋى ءۇشىن جاپوندىقپىز دەپ اتايدى وزدەرىن. بالالارىم قازاق تىلىندە ەركىن  سويلەيدى.

جاپونياعا بارعاندا تىلدەن قاتتى قينالدىم. سول ءۇشىن كۋرستارعا بارىپ، ايىنا 10 مىڭ دوللار تولەۋ كەرەك بولدى. جاپوندىقتار ءۇشىن ەڭ قورقىنىشتىسى قارىزدارىڭنىڭ بولۋى. اقشادان قينالعاندا ايكونىڭ اتا-اناسىنان قارىزعا سۇراۋدى ۇسىنعاندا، ايەلىم ۇزىلدى-كەسىلدى باس تارتتى. مەن دە اقشا جوق نە ىستەيمىن دەگەندە ەستىگەن جاۋابى «جۇمىس ىستە!» بولدى.

ەكى جىل ءتىل ۇيرەندىم. ءبىر جىلدان كەيىن جۇمىسقا تۇردىم. جاپوندىقتاردىڭ ەڭبەكقورلىعىنا تاڭ قالدىم. ەگەر جۇمىسىڭدى ۋاقىتىنان بۇرىن اياقتاساڭ، باسقالارىنا كومەكتەسۋگە ءتيىسسىڭ. ال جۇمىستا قاتەلىك جىبەرسەڭ بارلىق ادامدى جازالايدى. ءبىر كۇنى مەن ارىپتەسىممەن ۇرىسىپ قالدىم. ەكەۋىمىزدى باسشىلىق شاقىرتىپ الدى. ارىپتەسىم ءقازىر وتىرىك ايتاتىن شىعار دەپ ويلادىم. الايدا ول بارلىعىن ناقتى قالاي بولدى سولاي ايتىپ بەردى. جاپوندىقتار ءۇشىن  وتىرىك ايتۋ وتە ۇيات.

كەڭسەدە جۇمىس 8.30-دا باستالادى. مەن ءدال ۋاقىتىسىندا كەلىپ ءجۇردىم. الايدا جۇمىستا بارلىعى ءتورت كوزى تۇگەل وتىراتىن. جارتى ساعات بۇرىن كەلۋدى ۇيعاردىم. ءدال سول جاعداي. ماعان ەشكىم ەسكەرتۋ جاساماسا دا بىردەڭەنىڭ دۇرىس ەمەستىگىن سەزدىم. ءبىر كۇنى تاڭعى التىدا كەلسەم ارىپتەستەرىم قولدارىنا سىپىرتقى، ششەتكا ۇستاپ كەڭسەنى تازالاپ ءجۇر.

جەتى جىل سول كومپانيادا جۇمىس ىستەپ كاسىپكەرلىكپەن اينالىسۋدى ۇيعاردىم. اۋىلشارۋاشىلىققا بايلانىستى كاسىپپەن شۇعىلدانامىن دەپ شەشتىم. ول ءۇشىن اتالمىش سالانى جەتە ءتۇسىنۋ كەرەك دەگەن ۇيعارىمعا كەلدىم. جاپونيانىڭ كاسىپورىندارىنا جۇمىسقا تۇرۋ وتە قيىن. سەبەبى وندا ءوز جۇمىس ىستەۋ ءادىسى مەن ونىڭ قۇپياسى بولادى.  قالاداعى ءىرى فيرمانىڭ باسشىسىنىڭ ارتىنان جارتى جىل جۇگىردىم. وتە قيىن بولدى. ناتيجەسىندە مەنى جۇمىسقا الۋعا كوندىردىم.

وندا ءبىراز جۇمىس ىستەپ قازاقستانعا ءوز فەرمامدى اشۋ ءۇشىن كەلدىم. بىزدە ءوز كاسىبىڭدى اشۋ وتە قيىن دەپ ايتادى. الايدا شاعىمدانىپ وتىرا بەرسەك ەشقانداي ناتيجە بولمايدى. ماعان دا العاشقى كەزدە قيىن بولدى. ال ءقازىر الماتىلىق ءىرى سۋپەرماركەتتەردىڭ 30-40% سۇرانىسىنا جاۋاپ بەرەمىز. ءقازىر مەن باسقا جوبالاردا ءجۇرمىن. ازىرشە اشىپ ايتا المايمىن. ءبىراق ءبىر نارسەنى زور سەنىممەن ايتا الامىن جاپونيادا ۇيرەنگەندەرىمدى قازاقستانعا الىپ كەلەمىن.

كوبىسىن «ايەلىم قازاقستانعا كوشىپ كەلۋگە قارسى ەمەس پە؟» دەگەن سۇراق قىزىقتىرادى. جاپونيادا ەر ادامنىڭ شەشىمى ەش تالقىلاۋعا جاتپايدى. مەن ءتىپتى توزاققا بارسام دا ايەلىم جانىمدا بولادى. دەسەك تە، بۇل تولىقتاي مويىنسۇنۋدى بىلدىرمەيدى. مەنىڭ ايەلىم مىنەزدى ادام. ول اشىق تەكەتىرەسكە بارمايدى. جاپوندىقتار وتە اقىلدى حالىق. «ەر ادام باس، ايەل مويىن. باستى قايدا بۇرعىسى كەلسە، سوندا بۇرادى» دەگەن ءسوز ءدال جاپوندىق ايەلدەر تۋرالى ايتىلعان.

جاپونيادا تۇرعان 13 جىلدا ميلليونەر بولماسام دا، كەدەي ەمەسپىن. وتباسىمدى اسىراپ، تۋىستارىما كومەكتەسەمىن. مەنىڭ بولاشاعىم تەك قازاقستانمەن بايلانىستى. كوكىرەگىمدى ۇرىپ ءوزىمدى كەرەمەت پاتريوتپىن دەپ ايتا المايمىن. دەسەك تە، وتانىمنىڭ ەكونوميكاسىنىڭ دامۋىنا ءوز ۇلەسىمدى قوسقىم كەلەدى. ايەلىم مەنىڭ قازاقستانعا نەلىكتەن سونشالىق بايلانىپ قالعانىمدى تۇسىنبەيدى. مەن قازاقستاندا تۋىلدىم، قازاقستاندا ولەمىن. ءبىر كۇنى بالالارىم مەنىڭ اتا-بابالارىمنىڭ جانىنا كومەر.

شەتەلگە تەك ءبىلىم مەن تاجىريبە ءۇشىن عانا بارۋ كەرەك. سوسىن ەلگە قايتىپ كەلىپ، وندا ۇيرەنگەندەرىڭدى ەنگىزۋ قاجەت.

مالىمەتتەر ءابدىعاليدىڭ  facebook پاراقشاسىنان الىندى

اۋدارعان: اسەم المۇحانبەت