قازاقستاننىڭ جوعارى وقۋ ورىندارىندا وقىتىلاتىن ماماندىقتارعا قاتىستى ءابدۋالى حايدار مەن شورا سارىبايەۆ باستاعان ءبىر توپ زيالى قاۋىم وكىلدەرى ب.ساعىنتايەۆقا، م.تاجينگە، گ.ءابدىقالىقوۆاعا حات جولدادى، دەپ حابارلايدى "قامشى" پورتالى.

«ق ر بعم دايىنداعان جوعارى جانە جوعارى وقۋ ورنىنان كەيىنگى ءبىلىم بەرۋ ماماندىقتارىنىڭ 01.02.2017 جىلى كۇشىنە ەنگەن تىزبەسىندە «قازاق ءتىلى»، «قازاق ادەبيەتى»، «ادەبيەتتانۋ»، «لينگۆيستيكا»، «قازاقستان تاريحى»، «شىعىستانۋ»، «تۇركولوگيا» ماماندىقتارى جوق بولىپ شىقتى»، - دەپ جازىلعان اتالمىش حاتتا.

ءابدۋالى حايدار باستاعان ءبىر توپ زيالى قاۋىم وكىلدەرى ءتىلىمىز بەن ادەبيەتىمىزدىڭ بولاشاعىنا دەگەن الاڭداۋشىلىعىن ءبىلدىرىپ، ولارعا تىكەلەي قاتىستى ماماندىقتاردى جويۋدىڭ سالدارى ادەبيەتىمىزدىڭ قۇردىمعا كەتۋىنە اكەپ سوقتىراتىنىن ەسكەرە كەتكەن.

وسى ماسەلەگە قاتىستى بعم ءمينيسترى ەرلان ساعادييەۆكە قارسى نارازىلىق شارالارى جۇرگىزىلىپ، قوعام بەلسەندىلەرى الەۋمەتتىك جەلىدە ساعادييەۆتىڭ وتستاۆكاعا كەتۋىن تالاپ ەتىپ، ودان ورنىن بوساتۋىن سۇراپ جارىسا جازۋدا. حالىقتىڭ بۇل نارازىلىعىنا مينيستر ساعادييەۆ:

"مۇنداي ارانداتۋشى سۇراقتار قويماڭىزدار. ونى شەشەتىن پرەزيدەنت. پرەزيدەنت ايتسا كەتەمىن"، — دەپ جاۋاپ بەردى.

ەستەرىڭىزگە سالا كەتسەك، ەرلان ساعادييەۆ تىزگىنىن ۇستاپ وتىرعان ءبىلىم جانە عىلىم مينيسترلىگى «قازاقستان رەسپۋبليكاسىنداعى جوعارعى جانە جوعارعىدان كەيىنگى ءبىلىم بەرۋ ماماندىقتارىنىڭ كلاسسيفيكاتورى» دەگەن قۇجاتىنىڭ جاڭا نۇسقاسىن 01.02.2017 جىلى قولدانىسقا ەنگىزگەن ەدى. اتالمىش قۇجاتتا بعم مينيسترلىگى «قازاق ءتىلى» مەن «قازاق ادەبيەتى» ماماندارىن دايىنداۋدان باس تارتقان. اقورداعا حات جازعان ءبىر توپ زيالى قاۋىم مينيستر ساعادييەۆتىڭ بۇل قىلىعىن قازاق ۇلتىن، قازاق ءتىلى مەن ادەبيەتىن جويۋعا باعىتتالعان باستاماسى رەتىندە ءتۇسىنىپ، ءوز تالاپتارى مەن تىلەك-وتىنىشتەرىن العا تارتقان.

«الەمدىك كوشباسشى گارۆارد، كەمبريدج، وكسفورد، كولۋمبيا، امستەردام ۋنيۆەرسيتەتتەرىندە «اعىلشىن ءتىلى»، «ادەبيەتتانۋ»، «لينگۆيستيكا»، «تاريح»، «شىعىستانۋ»، «تۇركولوگيا» ماماندىقتارى مىندەتتى بولىپ تابىلادى.

قازاق ءتىلى، قازاق ادەبيەتى، ادەبيەتتانۋ، لينگۆيستيكا، قازاقستان تاريحى، شىعىستانۋ، تۇركولوگيا، شىعىستانۋ سىندى عىلىم سالالارى – حالقىمىزدىڭ، قوعامىمىزدىڭ رۋحاني قۇندىلىقتارى»، - دەپ حات اۆتورلارى ءوز پكىرلەرىن جەتكىزەدى.

الايدا، مينستر ساعادييەۆ بۇل تۋرالى ەستىمەگەنىن ايتىپ، الىپقاشپا اڭگىمەلەرگە سەنبەۋگە شاقىرادى.