قازاقستاندا 2017 جىلدىڭ 1 شىلدەسىنەن باستاپ بالا تۋۋىنا بايلانىستى بەرىلەتىن ءبىر رەتتىك جاردەماقى مولشەرى ءبىرىنشى، ەكىنشى جانە ءۇشىنشى بالاعا 31،41 اەك-تەن  38 اەك-كە، ءتورتىنشى جانە ودان كەيىنگى بالالارعا 52،35 اەك-تەن 63 ايلىق ەسەپتىك كورسەتكىشكە ارتادى. ياعني، 1-3 بالاعا ءبىر رەتتىك جاردەماقى 86 مىڭ تەڭگە بولسا، ءتورتىنشى جانە ودان كەيىنگى بالاعا 142 مىڭ تەڭگە بەرىلەتىن بولادى دەپ جازادى islam.kz.

بۇدان بولەك قازاقستاندا بالا كۇتىمىنە بايلانىستى 1 جاسقا تولعانشا بەرىلەتىن اي سايىنعى جاردەماقى دا قاراستىرىلعان. ەگەر اناسى جۇمىس ىستەمەگەن بولسا، بالا ءبىر جاسقا تولعانشا شىلدە ايىنان باستاپ اي سايىن ءبىرىنشى بالاعا 13069 تەڭگە، ەكىنشى بالاعا — 15451 تەڭگە، ءۇشىنشى بالاعا — 17811 تەڭگە، ءتورتىنشى جانە ودان كەيىنگەى بالالارعا 20194 تەڭگە تولەنبەك. ال قىزمەتتەگى ايەلدەر بالا ءبىر جاسقا كەلگەنشە سوڭعى ەكى جىلداعى ورتاشا جالاقىسىنا بايلانىستى جاردەماقى الادى. ونى ەسەپتەۋ ءۇشىن ەكى جىلداعى تابىستى  24 ايعا ءبولىپ، 0،4 -كە كوبەيتۋ كەرەك. سونىمەن قاتار جاردەماقى بەرىلگەن كەزدە 10 پايىزى زەينەتاقى قورىنا ۇستالاتىنىن دا ەسكەرگەن ءجون.

الەم تاجىريبەسىنە كوز سالاتىن بولساق، كوپشىلىگىندە بالاعا بەرىلەتىن جاردەماقى ايەلدىڭ تابىسىنا بايلانىستى بولادى. مىسالى، يتاليادا اتا-انانىڭ جىلدىق تابىسى 11422 ەۋرودان تومەن بولسا، بالاعا اي سايىن 250 ەۋرو جاردەماقى بەرىلەدى. بۇل كورسەتكىش 27 693 — 30 403 ەۋرو بولسا، ءار بالاعا ايىنا 38 ەۋرو تولەنەدى. اتا-اناسىنىڭ تابىسى 43 489 ەۋرودان ارتسا، جاردەماقى بەرىلمەيلدى.

وزبەكستاندا ءبىر رەتتىك جاردەماقى  31 041 تەڭگە ( 299 550 سوم). بالا ەكى جاسقا تولعانشا اي سايىن 23 281 تەڭگە (224 665 سوم) تولەنەدى. فينليانديادا بالانىڭ جاردەماقىسىن بەرەتىن كەزدە ايەلدىڭ جۇكتىلىك بويىنشا دەر كەزىندە ەسەپكە تۇرۋىن مىندەتتى تۇردە ەسكەرەدى. بۇل ەلدە بالاعا جاردەماقىدان بولەك «پاكت» قاراستىرىلعان. ول بالاعا قاجەتتى زاتتار مەن كيىم كەشەكتەردى قامتيدى. كەيبىر باسىلىمداردىڭ ايۋتىنشا، ونىڭ باعاسى اقشالاي جاردەماقىدان دا كوپ بولادى ەكەن. ءۇندىستاندا بالا كۇتىمىنە ەشقانداي جاردەماقى قاراستىرىلماعان.

اقش-تا بالا تۋۋىنا جانە كۇتىمىنە قاتىستى جاردەماقى تەك الەۋمەتتىك وسال توپتارعا بەرىلەدى. ال دەكرەتتى دەمالىس كومپانيامەن وتىرعان ايەلدىڭ كەلىسىمشارتىنا بايلانىستى بولادى. شۆەيساريادا دەكرەت تەك ءتورت ايعا بەرىلەدى. وسى ۋاقىتتا ايەلدىڭ سوڭعى 1،5 جىلدا العان ورتاشا جالاقىسى تولەنەدى. ەگەر ايەلدىڭ ەڭبەك ءوتىلى 1،5 جىلعا جەتپەسە، جاردەماقى بەرىلمەيدى. مەملەكەتتىك قولداۋ رەتىندە بەرىلەتىن اي سايىنعى جاردەماقى 200 فرانك. شۆەيساريادا ورتاشا جالاقى 50 مىڭ فرانك ەكەنىن ەسكەرسەك، بۇل وتە از ەكەنىن اڭعارۋ قيىن ەمەس.

سونىمەن، ءبىر رەتتىك جاردەماقى بەرەتىن ەلدەر:

• ەستونيا — 320 ەۋرو. ۇشەم تۋسا، ءار بالاعا 1000 ەۋرو.
• پولشا — ءار بالاعا 120 ەۋرو. (اي سايىنعى تولەم 12 ەۋرو)
• بەلگيا — ءبىر بالاعا 77،05 €، ەكى بالاعا 219،63 €، ءۇش بالاعا 432،50 €
• جاپونيا — ەكى بالاعا 400 دوللار، ءۇشىنشى جانە ودان كەيىنشى بالالارعا 700 دولار.
• گەرمانيا — ءبىرىنشى بالاعا 184 €، ەكىنشى بالاعا 368 €
• گرەكيا — ءبىرىنشى بالاعا  5،87 €، ەكىنشى بالاعا 12،13 €، ءۇشىنشى بالاعا 22 €
• يرلانديا — ءبىرىنشى بالاعا 140 €، ەكىنشى بالاعا 280 €، ۇشىنشىسىنە 428 €
•  يسلانديا — بىرىنشىسىنە 115،25 €، ەكىنشىسىنە 137،17 €. جالعىزباستى انالارعا ءبىرىنشى بالاعا 191،92 €،  ەكىنشىسىنە 196،83 €
• فرانسيا — ءبىرىنشى بالاعا جاردەماقى بەرىلمەيدى. ەكىنشى بالاعا 120 ەۋرو، ءۇشىنشى بالا تۋعاندا اي سايىن 274 ەۋرو

كەيبىر ەلدەردە بالا بەلگىلى ءبىر جاسقا كەلگەنشە اي سايىنعى جاردەماقى قاراستىرىلعان:

• ۇلىبريتانيا — 10 جاسقا دەيىن  اي سايىن 105 ەۋرو؛ 10 جاستان كەيىن — 70 ەۋرو؛
• گوللانديا — ءار بالاعا 6 جاسقا تولعانشا ايىنا 58 ەۋرو، 6-11 جاس ارالىعىندا 70،5 ەۋرو، 12-17 جاس 82 ەۋرو؛
• لاتۆيا — بالا ءبىر جاسقا تولعانشا انانىڭ سوڭعى ءبىر جىلداعى ورتاشا جالاقىسىنىڭ 70 پايىزىن تولەيدى؛
• اۆستريا — 0-3 جاس — 105،40 €، 3-10 جاس  112،70 €؛ 10-19 جاس  130،90 €
• دانيا — 0-3 جاس 145 €، 3-7 جاس 131 €، 7-18 جاس 103 €،
• يسپانيا — 18 جاسقا دەيىن 24،25 €،  مۇگەدەك بالالارعا 48،47 €
• نيدەرلاند — 0-6 جاس 58،11 €، 6-11 جاس — 70،57 €، 12-17 جاس 82،02 €.