Microsoft كورپوراسياسى 1 ساۋىردەن باستاپ رونالد بينكوفسكيدىڭ قازاقستانداعى Microsoft باس ديرەكتورى، سونداي-اق، تمد-داعى وڭىرلىك كەڭسەنىڭ باسشىسى بولىپ تاعايىندالاتىنى جونىندە حابارلايدى. رونالد سوڭعى ءبىر جىل بويى وسى لاۋازىمدى اتقارىپ كەلگەن كونستانتين نازاروۆتىڭ ورنىنا كەلمەك.

رونالد قازاقستان، ارمەنيا، بەلارۋس، موڭعوليا، قىرعىزستان، تۇركىمەنستان، تاجىكستان جانە وزبەكستان سەكىلدى 9 ەل كىرەتىن تمد ايماعىنداعى بيزنەستى دامىتۋعا جاۋاپ بەرەتىن بولادى.

وسى لاۋازىمعا دەيىن رونالد 4 جىل بويى پولشاداعى Microsoft كەڭسەسىن، ال ونىڭ الدىندا 2،5 جىل بويى رۋمىنياداعى كەڭسەنى باسقارىپ كەلگەن.

«بۇگىنگى جانە كەلەشەكتەگى دامۋ الەۋەتى زور وسى ايماقتىڭ، ەلدىڭ ءبىر بولشەگىنە اينالىپ وتىرعانىما اسا قۋانىشتىمىن. بۇكىل بيزنەس سالالارى مەن جالپى ءومىردىڭ ساندىق وزگەرىستەرگە ۇشىراعان داۋىرىندە ءبىز كليەنتتەرىمىز بەن سەرىكتەستەرىمىزگە ادال قىزمەت ەتىپ، ولارعا تەحنولوگيالاردى ەندىرىپ، دامۋعا كومەكتەسۋدى كومانداممەن بىرگە جالعاستىرماقپىز»، - دەپ اتاپ ءوتتى رونالد مىرزا.

رونالد Microsoft-تا 10 جىلدان استام ۋاقىتتان بەرى ەڭبەك ەتىپ كەلەدى، وسى ۋاقىت ىشىندە بيزنەستى باسقارۋ، ساتىلىم، ماركەتينگ، وپەراسيالىق باسقارۋ جانە وزگەرىستەردى باسقارۋ ىسىندە كەڭ تاجىريبە جيناقتاپ ۇلگەرگەن. ول Software AG كومپانياسىندا ورتالىق جانە شىعىس ەۋروپاداعى ايماقتىق مەنەدجەر بولىپ مانسابىن باستاعان، وسىعان دەيىن ءوز بيزنەسىن باسقارىپ كەلگەن.

رونالد پولشانىڭ كراكوۆ قالاسىنداعى ياگەلون ۋنيۆەرسيتەتىندە قولدانبالى ماتەماتيكا فاكۋلتەتىن، سونداي-اق، INSEAD بيزنەس مەكتەبىندە Advanced Management باعدارلاماسىن ءتامامداعان. سونداي-اق، ول گەرمانيانىڭ ماينداعى فرانكفۋرت قالاسىندا گەتە اتىنداعى ۋنيۆەرسيتەتتە ورىس ءتىلىن وقىعان.

Microsoft كورپوراسياسى تۋرالى

Microsoft قازاقستان

1975 جىلى نەگىزى قالانعان  Microsoft كورپوراسياسى باعدارلامالىق جابدىقتامانى ءوندىرۋ، سونداي-اق، ادامدارعا ءوز الەۋەتىن جۇزەگە اسىرۋعا كومەكتەسەتىن قىزمەتتەر مەن شەشىمدەردى ۇسىنۋ سالاسىنداعى الەمدىك كوشباسشى بولىپ تابىلادى.

Microsoft كورپوراسياسى بۇكىل الەمدەگى كورپوراتيۆتىك جانە جەكە قولدانۋشىلارعا ءوز جۇمىسى مەن ۇيىندە جاڭا مۇمكىندىكتەرگە قول جەتكىزۋگە جاعداي جاسايتىن قۇرىلعىلار مەن قىزمەتتەردىڭ كەڭ تۇرلەرىن ازىرلەپ شىعارادى. كورپوراسيانىڭ شىعاراتىن قۇرىلعىلارى مەن قىزمەتتەرى اراسىندا ۇستەلدىك جانە جەلىلىك وپەراسيالىق جۇيەلەر، كليەنت-سەرۆەرلىك ورتالارعا ارنالعان سەرۆەرلىك قوسىمشالار، قولدانۋشىلارعا ارنالعان ۇستەلدىك بيزنەس جانە كەڭسە قوسىمشالارى، ينتەراكتيۆتىك باعدارلامالار مەن ويىندار، ينتەرنەت جەلىسىندە جۇمىس جاساۋعا ارنالعان قۇرىلعىلار مەن باعدارلاما جاساپ شىعارۋعا ارنالعان قۇرالدار بار. سونداي-اق،  Microsoft ينتەراكتيۆتىك (online) قىزمەتتەردى ۇسىنۋمەن، كومپيۋتەر تاقىرىبىمەن بايلانىستى كىتاپتاردى شىعارۋمەن، كومپيۋتەرلەرگە ارنالعان پەريفەريالىق جابدىقتى وندىرۋمەن، زەرتتەۋ قىزمەتىمەن جانە جاڭا كومپيۋتەرلىك تەحنولوگيالاردى جاساپ شىعارۋىمەن اينالىسادى.  Microsoft الەمنىڭ 190-نان اسا ەلىندە قىزمەت جۇرگىزۋدە.  Microsoft ونىمدەرى 45-تەن اسا تىلگە اۋدارىلعان جانە دە دەربەس كومپيۋتەرلەردىڭ كوپشىلىگىمەن ۇيلەسە جۇمىس جاساي الادى.