30-اق جىل عۇمىر كەشىپ، وتتى جىرلارىمەن قازاق ادەبيەتىنە ءور ءىز قالدىرعان تولەگەن ايبەرگەنوۆ ەدى. ادەبيەت الەمىندە مۇحتار شاحانوۆ، فاريزا وڭعارسىنوۆا، جاراسقان ابدىراشيەۆ، ەسەنعالي راۋشانوۆ، تىنىشباي راحىم سياقتى ادۋىندى اقىنداردىڭ ءوزى ۇستاز تۇتقان تولەگەن ايبەرگەنوۆتى 80 جىلدىعىندا ادەبيەت سۇيەر قاۋىم ەسكە الىپ كونفەرەنسيا وتكىزەدى. بۇل تۋرالى ۇيىمداستىرۋ كوميتەتى حابارلادى.

«قۇرمەتتى الاش جۇرتى!

سىزدەردى اقىن تولەگەن ايبەرگەنوۆتىڭ 80 جىلدىعىنا ارنالعان «تولەگەن ايبەرگەنوۆ پوەزياسى جانە قازىرگى زامان» اتتى حالىقارالىق عىلىمي-تەوريالىق كونفەرەنسيانىڭ ءقادىرلى قوناعى بولۋعا شاقىرامىز!

وتەتىن ورنى: الماتى قالاسى، ابىلاي حان داڭعىلى 105 ءۇي، قازاقستان جازۋشىلار وداعىنىڭ عيماراتى 
وتەتىن ۋاقىتى: 2017 جىل، 10 ناۋرىز، ساعات: 10.00

بايلانىس تەلەفونى: 87754787229»، - دەلىنگەن حابارلامادا.

دۇنيەگە ءوزىنىڭ اپپاق، تاپ-تازا پەيىلىمەن كەلىپ، سول كوڭىلمەن كەتكەن ساعىنىشتىڭ اقىنى تولەگەن ايبەرگەنوۆ 1937 جىلى قاراقالپاقستاننىڭ قوڭىرات اۋدانىندا تۋدى. 1959 جىلى تاشكەنت پەداگوگيكالىق ينستيتۋتىن بىتىرگەن سوڭ، 1965 جىلعا دەيىن مەكتەپ ءمۇعالىمى، مەكتەپ ديرەكتورى بولدى.

تولەگەن ايبەرگەنوۆ العاشقى جازعان ولەڭدەرىنەن-اق قازاق پوەزياسىنا تىڭ سەرپىلىس، جاڭا ءبىر ەكپىن اكەلدى. ونىڭ تۋعان جەرگە دەگەن ساعىنىش پەن ءمولدىر ماحابباتقا تولى ولەڭدەرى 1961 جىلى شىققان جاس اقىن.جازۋشىلاردىڭ «جاس داۋرەن» جيناعىنا كىردى.

بۇدان كەيىنگى "ارمان ساپارى"، "ومىرگە ساياحات" (ەكەۋى دە 1963 جىل)، "قۇمداعى مۇنارالار" (1974 جىلى قازاقستان لەنين كومسومولى سىيلىعىن الدى)، "مەن ساعان عاشىق ەدىم" (1970)، "ءبىر تويىم بار" (1981، 1989) جيناقتارىندا زامانداستارىنىڭ بەينەسى، ول ارالاعان قازاقتىڭ ولكەسىنىڭ سىرى مەن كەنى، دالاداعى ۇلى تىرشىلىك اقىننىڭ ءبىر جاپىراق جۇرەگىنىڭ سۇيىسپەنشىلىگىنە بولەنگەن.

1987 جىلى ت.ايبەرگەنوۆتىڭ "مير سوزۆەزديي" اتتى تاڭدامالى جىرلارى ورىس تىلىندە جارىق كوردى.

ارقالى اقىن، ادالدىق پەن اردى تۋ قىپ كوتەرگەن ازامات 1967 جىلى نۇكىس قالاسىندا قايتىس بولدى. بۇگىندە قازاقستان جازۋشىلار وداعىنىڭ جاستارعا ارنالعان پوەزيا سالاسىنداعى ادەبي سىيلىعى تولەگەن ايبەرگەنوۆ اتىندا.