ەۋروپارلامەنت دەپۋتاتىنىڭ سوزىنشە، ەۋروپارلامەنتتەگى تالقىلاۋ قازاقستاننىڭ رەفورمالاردى جۇزەگە اسىرۋدا ايتارلىقتاي ناتيجەگە قول جەتكىزگەنىن كورسەتتى.
ەۋروپارلامەنتتە «جاڭا قازاقستان: كونستيتۋسيالىق رەفەرەندۋمنىڭ قورىتىندىلارى جانە دەموكراتيالىق جاڭعىرۋ جولى» اتتى پىكىرتالاس ءوتتى. جيىندا قاتىسۋشىلار قازاقستانداعى ساياسي رەفورمالاردى جانە ەۋروپالىق وداقپەن الداعى ىنتىماقتاستىقتىڭ كەلەشەگىن تالقىلادى.
ەۋروپارلامەنت دەپۋتاتى توماش زدەحوۆسكي قازاقستاننىڭ ورتالىق ازياداعى ەۋروپالىق وداقتىڭ نەگىزگى سەرىكتەستەرىنىڭ ءبىرى ەكەنىن ايتىپ، بۇل ارىپتەستىك تەك ەكونوميكالىق ەمەس، ستراتەگيالىق جانە ساياسي تۇرعىدان دا ماڭىزدى ەكەنىن اتاپ ءوتتى.
قازاقستان ورتالىق ازياداعى ەۋروپالىق وداقتىڭ باستى سەرىكتەستەرىنىڭ بىرىنە اينالدى. بۇل سەرىكتەستىك ەكونوميكالىق، ستراتەگيالىق جانە ساياسي باعىتتاردا نىعايىپ كەلەدى. الايدا شىنايى ءارى بەرىك ارىپتەستىك تەك ەكونوميكالىق مۇددەلەرگە عانا نەگىزدەلمەيدى. قازاقستان كونستيتۋسيالىق رەفورمالار مەن ساياسي جاڭعىرۋ ۇدەرىسىن جالعاستىرىپ جاتقان كەزدە دەموكراتيالىق باسقارۋ، زاڭ ۇستەمدىگى، اشىقتىق جانە ازاماتتاردىڭ قوعامدىق ومىرگە قاتىسۋى ماسەلەلەرى بويىنشا اشىق ءارى سىندارلى ديالوگتى ساقتاۋ اسا ماڭىزدى، – دەدى توماش زدەحوۆسكي.
ەۋرودەپۋتاتتىڭ ايتۋىنشا، ەۋروپارلامەنتتەگى تالقىلاۋ قازاقستاننىڭ رەفورمالاردى جۇزەگە اسىرۋدا ايتارلىقتاي ناتيجەگە قول جەتكىزگەنىن كورسەتتى. دەگەنمەن، الدا اتقارىلاتىن جۇمىستار ءالى دە بار. ول ەۋروپالىق وداق پەن قازاقستان اراسىنداعى ىنتىماقتاستىقتى ودان ءارى دامىتۋ ەكى نەگىزگى باعىتقا سۇيەنۋى ءتيىس ەكەنىن ايتتى. ولار – ەكونوميكالىق ارىپتەستىكتى نىعايتۋ جانە ورتاق قۇندىلىقتارعا نەگىزدەلگەن ءوزارا ىقپالداستىقتى كەڭەيتۋ.
توماش زدەحوۆسكي پىكىرتالاسقا قاتىسۋشىلارعا مازمۇندى پىكىر الماسقانى ءۇشىن العىس ايتىپ، ەۋروپالىق وداقتىڭ قازاقستانمەن سەرىكتەستىكتى تەرەڭدەتۋگە، سونداي-اق تۇراقتىلىق، وركەندەۋ جانە دەموكراتيالىق جاڭعىرۋ ماسەلەلەرى بويىنشا اشىق ديالوگتى قولداۋعا دايىن ەكەنىن راستادى.
ءىس-شارا بارىسىندا جاريالانعان مالىمەتكە سايكەس، 2024 جىلى ەۋروپالىق وداق پەن قازاقستان اراسىنداعى تاۋار اينالىمى شامامەن 45 ملرد ەۋروعا جەتكەن. ال ەۋروپالىق ينۆەستيسيالاردىڭ كولەمى 54 ملرد ەۋرودان استى.
