«قازاقمىس كورپوراسياسى» ج ش س سيفرلاندىرۋ قىزمەتى بالقاش تەلەكوممۋنيكاسيا ورتالىعىنىڭ بۇرىنعى جەتەكشى ينجەنەرى ءادىل اعىبايەۆ پرەزيدەنتكە، مەملەكەتتىك ورگاندارعا، ب ا ق پەن قوعامعا ۇندەۋ جولدادى. وسى كاسىپورىندا 21 جىل ەڭبەك ەتكەن ول بىرنەشە جىلدان بەرى جالعاسىپ كەلە جاتقان جاعدايعا اراشا ءتۇسۋدى سۇرايدى.

اعىبايەۆتىڭ مالىمدەۋىنشە، 2023 جىلى كورپوراسيا باسشىلىعى ونى جانە تاعى ءۇش قىزمەتكەردى زاڭسىز جۇمىستان شىعارعان. جۇمىسشىلار سوتقا جۇگىنىپ، جۇمىستان شىعارۋدىڭ زاڭسىز بولعانىن دالەلدەپ شىعادى، سودان كەيىن ولار قايتادان جۇمىستارىنا ورنالاسادى.
الايدا، بۇرىنعى ينجەنەردىڭ ايتۋىنشا، جۇمىسقا قايتا ورالعاننان كەيىن قىزمەتكەرلەرگە ۇنەمى قىسىم كورسەتىلە باستاعان. ول ارىپتەستەرىنىڭ ءبىرى مۇنداي پسيحولوگيالىق قىسىمعا شىداماي قايتىس بولعانىن، ال قالعاندارى جۇمىستان ءوز ەركىمەن كەتىپ، باسقا جۇمىس ىزدەۋگە ءماجبۇر بولعانىن العا تارتادى.

2026 جىلى، اعىبايەۆتىڭ ايتۋىنشا، ونى تاعى دا جۇمىستان شىعارعان – بۇل جولى شتاتتى قىسقارتۋ سىلتاۋىمەن. ونىڭ ۇستىنە، كومپانيانىڭ ىشكى قۇجاتتارىن زەرتتەۋ بارىسىندا جاڭا ۇيىمدىق قۇرىلىم تۋرالى نەگىزگى بۇيرىقتا قىزمەتكەرلەردى قىسقارتۋ جونىندە ەشقانداي مالىمەت جوق ەكەنى انىقتالعان. ونىڭ پىكىرىنشە، قىزمەتكەرلەردى جۇمىستان شىعارماي، باسقا لاۋازىمدارعا اۋىستىرۋ كەرەك بولعان.

بۇدان بولەك، اعىبايەۆ ءوزىن جۇمىستان شىعارۋعا قاتىستى بۇيرىقتاعى ءوز قولىنىڭ قولدان قويىلعانىن (قولتاڭبانىڭ قولدان جاسالعانىن) مالىمدەدى.
بۇرىنعى ينجەنەردىڭ سوزىنە سۇيەنسەك، سيفرلاندىرۋ قىزمەتىنىڭ 700-گە جۋىق قىزمەتكەرىنىڭ ىشىنەن تەك ونى عانا قىسقارتقان. سونىمەن قاتار، ول ءوز لاۋازىمىنىڭ ناقتى جويىلماعانىن ايتادى – ونىڭ ورنىنا استانادان جاڭا قىزمەتكەر قابىلدانعان، ءبىراق جۇمىس ورنى بالقاش قالاسىندا ورنالاسقان. اعىبايەۆ جاڭادان كەلگەن قىزمەتكەردىڭ بۇل ورىندا ناقتى جۇمىس ىستەپ جاتقانىنا كۇمان كەلتىرەدى.