الماتى وبلىسىندا مەملەكەت باسشىسىنىڭ اتىنان وڭىردەگى جاعىمدى جاڭالىق جارشىسى بولىپ جۇرگەن قوس بىردەي مامانعا پاتەر كىلتى تابىستالىپ، اقپارات سالاسىنا سانالى عۇمىرىن ارناعان جۋرناليستەر قاۋىمىنا مەملەكەتتىك ناگرادالار بەرىلدى. مارتەبەلى ماراپاتتار مەن باسپانا كىلتتەرىن وبلىس اكىمى مارات سۇلتانعازييەۆ تابىستاپ، ب ا ق وكىلدەرىن كاسىبي مەرەكەسىمەن قۇتتىقتادى، – دەپ حابارلايدى الماتى وبلىسى اكىمىنىڭ باسپا ءسوز قىزمەتى.

سالتاناتتى راسىمدە «الاتاۋ ارايى» گازەتىنىڭ باس رەداكتورى قۋانىش تۇڭعاتار مەن «ولكە تىنىسى» جشس-نىڭ باسپا قىزمەتىندەگى ۇيلەستىرۋشىسى جانات توقانوۆا باسپانا باقىتىنا كەنەلدى. سونداي-اق ارداگەر جۋرناليست، «ولكە تىنىسى» ج ش س باسشىسىنىڭ كەڭەسشىسى كادىربەك قۇنىپيا ۇلى «پاراسات» وردەنىمەن، «ەڭبەكشىقازاق» گازەتىنىڭ ءتىلشىسى يگور تۋرانين «ەرەن ەڭبەگى ءۇشىن» مەدالىمەن، «الاتاۋ ارايى» گازەتىنىڭ جاۋاپتى حاتشىسى شولپان نۇرجاۋوۆا «شاپاعات» مەدالىمەن ماراپاتتالدى. سونداي-اق ءبىرقاتار مەديا مامان «ەڭبەك ارداگەرى»، «اقپارات سالاسىنىڭ ۇزدىگى»، قۇرمەت گراموتاسى مەن العىس حات يەگەرى اتاندى.

مارات ەلەۋسىز ۇلى ماراپات العاندار مەن جاڭا قونىس يەلەرىن شىن جۇرەكتەن قۇتتىقتاي وتىرىپ، بۇل ب ا ق وكىلدەرىنىڭ ەل دامۋىنا، اقپارات كەڭىستىگىنىڭ وركەندەۋىنە قوسقان ەلەۋلى ۇلەسىنىڭ ايقىن كورىنىسى ەكەنىن ايتتى.

«سىزدەر كۇن سايىن ەل ومىرىندەگى ماڭىزدى وقيعالاردى حالىققا جەدەل ءارى شىنايى جەتكىزىپ، قوعام مەن مەملەكەت اراسىنداعى بايلانىستىڭ نىعايۋىنا ۇلكەن ۇلەس قوسىپ كەلەسىزدەر. «قالام ەلدى تۇزەيدى» دەپ بەكەر ايتىلماسا كەرەك. سىزدەردىڭ كاسىبي بىلىكتىلىكتەرىڭىز، تاباندى ەڭبەكتەرىڭىز بەن ازاماتتىق ۇستانىمدارىڭىز قوعامنىڭ دامۋىنا قىزمەت ەتىپ كەلەدى. ۇلت قۇندىلىقتارىن دارىپتەپ جۇرگەن جۋرناليستەرگە حالىق ۇلكەن ءۇمىت ارتادى. وسىنداي قاسيەتتى دە قاستەرلى ىستە قالامدارىڭىز مۇقالماسىن!

مەملەكەت باسشىسى قاسىم-جومارت توقايەۆتىڭ باستاماسىمەن جۋرناليستەرگە كاسىبي مەرەكە قارساڭىندا استانادان باسپانا بەرىلىپ جۇرگەنىن جاقسى بىلەسىزدەر. بيىل بۇل يگى باستاما وڭىرلەردە جالعاسىن تاپتى. الماتى وبلىسى دا وسى قاتاردا. بۇل – سانالى عۇمىرىن ءوڭىرىمىزدىڭ تىنىس-تىرشىلىگىنەن حابار تاراتۋعا ارناپ، قاجىرلى ەڭبەك ەتىپ جۇرگەن جۋرناليستەرگە بەرىلگەن لايىقتى قۇرمەت»، – دەگەن ايماق باسشىسى جۋرناليستەر قاۋىمى ءۇشىن تاعى دا جاعىمدى جاڭالىقتى جاريا ەتتى. ايتۋىنشا، بيىلدان باستاپ «الاتاۋ» وڭىرلىك يپوتەكالىق باعدارلاماسىنا «بۇقارالىق اقپارات قۇرالدارى» ساناتى قوسىلدى. ەندى الماتى وبلىسىندا جۇمىس ىستەيتىن جۋرناليستەر وسى باعدارلاماعا قاتىسا الادى. ودان بولەك، مەديا سالاسىنىڭ ۇزدىكتەرىن ىنتالاندىرۋ ماقساتىندا وڭىرىمىزدە جىل سايىن «سامعاۋ» مەديا سىيلىعى ۇيىمداستىرىلىپ كەلەدى. بيىل دا جىل سوڭىندا «سامعاۋدىڭ» جەڭىمپازدارى ماراپاتتالادى. وسى جولى «تازا قازاقستان»، «زاڭ مەن ءتارتىپ» تاقىرىبىندا جازىلعان ۇزدىك ماقالا، تەلەسيۋجەت جانە بەينەروليكتەرگە باسىمدىق بەرىلەدى. سونداي-اق وبلىستىڭ الەۋمەتتىك-ەكونوميكالىق دامۋىن كەڭىنەن ناسيحاتتاۋعا اتسالىسقان جۋرناليستەر دە نازاردان تىس قالمايدى.

كاسىبي مەرەكە قارساڭىندا سۋ جاڭا پاتەر يەسى اتانعان قۋانىش تۇڭعاتار باسپانالى بولۋ ءاربىر ءجۋرناليستىڭ، ءاربىر ماماننىڭ ارمانى ەكەنىن ايتىپ، سول ارماندى ورىنداعان پرەزيدەنتكە، وبلىس اكىمدىگىنە العىسىن ايتتى.

«قازاق جۋرناليستيكاسىنىڭ جولبارىسى اتانعان شەرحان مۇرتازانىڭ «ءجۋرناليستىڭ ارقالاعانى العىس، جەگەنى جانتاق» دەيتىنى بار. بۇگىن بۇل ءتامسىلدى وزگەرتۋگە تۋرا كەلىپ تۇرعانداي. ويتكەنى ءبىر جىلدا 365 كۇن بولسا، تىلشىلەر ونىڭ 364 كۇنىن وزگەنىڭ جىرىن جىرلاپ، مۇڭىن مۇڭداپ، مۇددەسىن قورعاۋمەن وتكىزەدى. سونىڭ ىشىندە ءبىر كۇن، ياعني بۇقارالىق اقپارات قۇرالدارى قىزمەتكەرلەرى كۇنىندە بارشا تىلشىلەر قاۋىمىنىڭ مەرەيى تاسىپ، ارقالانىپ قالاتىنى بار. الماتى وبلىسى پرەزيدەنتتىڭ جارلىعىمەن ەكىگە ءبولىنىپ، وبلىس ورتالىعى قونايەۆ قالاسىنا كوشىرىلگەننەن بەرگى ءتورت جىل ۋاقىتتا العاش رەت ب ا ق وكىلدەرىنە باسپانا بەرىلىپ تۇر. بۇل ەڭ الدىمەن مەملەكەت باسشىسىنىڭ، ودان كەيىن وبلىس اكىمدىگىنىڭ ناتيجەلى جۇمىسىنىڭ جەمىسى»، – دەدى قۋانىش ابايبەك ۇلى.

حالىق پەن بيلىك اراسىندا التىن كوپىر بولىپ، ەل مۇددەسىن بارىنەن بيىك قويعان جۋرناليستەردىڭ ەڭبەگى ءارقاشان قۇرمەتكە لايىق. ال الماتى وبلىسىنداعى ب ا ق وكىلدەرىنىڭ قۋانىشى مۇنىمەن شەكتەلمەيدى. جوعارىدا اتاپ وتكەندەي، ەندى ولار «الاتاۋ» وڭىرلىك يپوتەكالىق باعدارلاماسىنا قاتىسىپ، باسپانالى بولا الادى. سوندىقتان جۋرناليستەر قاۋىمىن قۋانىشقا بولەيتىن جاعىمدى جاڭالىقتار لەگى ءالى دە جالعاساتىن بولادى.