الماتى وبلىسىنىڭ رايىمبەك اۋدانىندا وتكەن ءوڭىردىڭ 90 جىلدىعىنا ارنالعان «ءحانتاڭىرى قازىناسى» حالىقارالىق ەتنوفەستيۆالى ۇلتتىق مادەنيەتتى ۇلىقتاۋمەن قاتار، «تازا قازاقستان» رەسپۋبليكالىق ەكولوگيالىق اكسياسىنىڭ نەگىزگى الاڭدارىنىڭ بىرىنە اينالدى. ءۇش كۇنگە سوزىلعان مەرەيتويعا 25 مىڭنان استام ادام قاتىسىپ، تابيعاتتى قورعاۋ مەن ەكولوگيالىق مادەنيەتتى حقالىپتاستىرۋعا باعىتتالعان ءىس-شارالارعا بەلسەندى اتسالىستى.
فەستيۆال وتەتىن اۋماقتا تازالىقتى قامتاماسىز ەتۋ ءۇشىن 105 بيودارەتحانا مەن 75 قوقىس كونتەينەرى ورناتىلىپ، 3 ارنايى تەحنيكا جۇمىلدىرىلدى. ەكولوگيالىق اكسياعا 110 ەرىكتى، جەرگىلىكتى تۇرعىندار مەن جاستار بەلسەندى قاتىستى. تازالىق جۇمىستارىنا 1000 قاپ پەن 1000 جۇپ قولعاپ پايدالانىلىپ، ناتيجەسىندە شامامەن 7 توننا قاتتى تۇرمىستىق قالدىق جينالىپ، ارنايى پوليگونعا شىعارىلدى.
سونىمەن قاتار جالپى اۋماعى 116 480 شارشى مەتردى قامتيتىن جەردە 20 اقپاراتتىق باننەر ورنالاستىرىلدى. تۇزكول اۋىلىنان فەستيۆال وتەتىن شالكودە جايلاۋىنا دەيىنگى 28 شاقىرىم جول بويىنا ءار بەس شاقىرىم سايىن قوقىس كونتەينەرلەرى قويىلىپ، كەلۋشىلەرگە قولايلى جاعداي جاسالدى. ۇيىمداستىرۋشىلاردىڭ ايتۋىنشا، بۇل شارالار تابيعي اۋماقتىڭ تازالىعىن ساقتاۋعا جانە كوپشىلىك اراسىندا جاۋاپتى ەكولوگيالىق مادەنيەتتى قالىپتاستىرۋعا مۇمكىندىك بەردى.
«تازا قازاقستان» اكسياسىمەن ۇشتاسقان حالىقارالىق ەتنوفەستيۆالگە قازاقستاننىڭ تۇكپىر-تۇكپىرىنەن جانە شەتەلدەن مىڭداعان قوناق قاتىستى. شالكودە جايلاۋىندا 150-گە جۋىق اقشاڭقان كيىز ءۇي تىگىلىپ، قولونەر، ەتنوديزاين، بەينەلەۋ ونەرى، ۇلتتىق تاعامدار مەن اۋىل شارۋاشىلىعى ونىمدەرىنىڭ كورمەلەرى ۇيىمداستىرىلدى. قازاقستاندىق شەبەرلەرمەن بىرگە جۇڭگو، تۇركيا، رەسەي، ازەربايجان، قىرعىزستان، تاجىكستان، بەلارۋس، ارمەنيا، وزبەكستان جانە گرۋزيادان كەلگەن قولونەرشىلەر ءوز تۋىندىلارىن تانىستىردى.
باعدارلاما اياسىندا ۇلتتىق سپورت جارىستارى، تاريحي-تانىمدىق كورمەلەر، ەتنواۋىلدار مەن مادەني ءىس-شارالار ءوتتى. كوپشىلىكتىڭ ەرەكشە ىقىلاسىنا بولەنگەن «قارقارالى» جايلاۋ كوشى قازاقتىڭ كوشپەلى وركەنيەتىن كەڭىنەن ناسيحاتتادى.
فەستيۆالدىڭ اشىلۋ سالتاناتىنا قازاقستان رەسپۋبليكاسى پرەزيدەنتىنىڭ كەڭەسشىسى مالىك وتاربايەۆ قاتىسىپ، مەملەكەت باسشىسى قاسىم-جومارت توقايەۆتىڭ قۇتتىقتاۋىن جەتكىزدى.
الماتى وبلىسىنىڭ اكىمى مارات سۇلتانعازييەۆ ءوز سوزىندە رايىمبەك اۋدانىنىڭ تاريحي-مادەني مۇراسى مەن تۋريستىك الەۋەتىنە توقتالىپ، ءوڭىردىڭ قازاق رۋحانياتىنداعى ايرىقشا ورنىن اتاپ ءوتتى.
ءۇش كۇندىك مەرەيتوي اياسىندا قاراساز اۋىلىندا ورازالى دوسبوسىنوۆتى ەسكە الۋعا ارنالعان II رەسپۋبليكالىق وقۋشىلار ايتىسى، نارىنقولدا مۇقاعالي ماقاتايەۆ شىعارماشىلىعىنا ارنالعان عىلىمي-تانىمدىق كونفەرەنسيا جانە اۋدان ورتالىعىندا گالا-كونسەرت ۇيىمداستىرىلدى. مەرەكەلىك شارالار شالكودە جايلاۋىنداعى «جولان جۇيرىگى» رەسپۋبليكالىق ات بايگەسىمەن جانە ۇلتتىق سپورت جارىستارىمەن قورىتىندىلاندى.
وسىلايشا، رايىمبەك اۋدانىندا وتكەن «ءحانتاڭىرى قازىناسى» حالىقارالىق ەتنوفەستيۆالى ۇلتتىق مادەنيەتتى دارىپتەۋمەن قاتار، «تازا قازاقستان» باستاماسىنىڭ ناقتى ناتيجەسىن كورسەتكەن ەكولوگيالىق جاۋاپكەرشىلىكتىڭ جارقىن ۇلگىسىنە اينالدى.
