بۇگىن دەموكراتيالىق كۇشتەردىڭ «قازاقستان-2050» جالپىۇلتتىق كواليسياسىنىڭ وتىرىسى ءوتتى. وندا ەلىمىزدەگى جەتەكشى ساياسي پارتيالار مەن قوعامدىق بىرلەستىكتەردىڭ وكىلدەرى قازاقستاننىڭ جاڭا كونستيتۋسياسىنا قاتىستى بىرلەسكەن مالىمدەمە جاسادى. كواليسيا مۇشەلەرى پرەزيدەنتتىڭ اتا زاڭعا قول قويۋىن تاريحي جاعداي دەپ باعالاپ، قۇجاتتىڭ ءوزىن جاڭا ساياسي قۇرىلىمنىڭ ىرگەتاسى رەتىندە قابىلدادى.

شارا بارىسىندا كۇشتى پرەزيدەنتتىك بيلىكتىڭ ساقتالۋى مەن جاڭارتىلعان كونستيتۋسيادا تاۋەلسىز قازاقستاننىڭ نەگىزىن قالاۋشى – نۇرسۇلتان ءابىش ۇلى نازاربايەۆتىڭ ەرەكشە ءرولى ودان ءارى نىعايا تۇسكەنى ايرىقشا اتالىپ ءوتىلدى. مەملەكەت باسشىسى بار بولعانى شيرەك عاسىردىڭ ىشىندە ەلىمىزدى الەمدىك دەڭگەيدەگى وتە قۋاتتى جانە بەدەلدى مەملەكەتكە، سونداي-اق، تۇراقتىلىقتىڭ، بىرلىكتىڭ جانە قارقىندى ەكونوميكالىق دامۋدىڭ ورتالىعىنا اينالدىرىپ، قازاقستاندىق جارقىن جەتىستىكتىڭ اسا كورنەكتى ساۋلەتشىسى اتاندى.

دەموكراتيالىق كۇشتەردىڭ جالپىۇلتتىق كواليسياسى كونستيتۋسيالىق رەفورمانىڭ باستى ماقساتى قازاقستاندىق جەتىستىكتىڭ نەگىزگى تەتىگى رەتىندە قوعامدى ۇيىستىرۋ ەكەنىن ايتتى. «نۇر وتان» پارتياسى ءتوراعاسى ءبىرىنشى ورىنباسارىنىڭ ايتۋىنشا، ەلباسىمىزدىڭ ءۇشىنشى جاڭعىرۋ مەن «قازاقستان-2050» دامۋ ستراتەگياسى اياسىندا الدىمىزعا قويعان مىندەتتەرىنىڭ اۋقىمدىلىعى مەن اسا كۇردەلىلىگى ەسكەرىلىپ، جاڭا كەزەڭدە دە بىرلىك، ءبىرتۇتاستىق جانە تۇراقتىلىق سياقتى نەگىزگى قۇندىلىقتاردىڭ ماڭىزى ارتا بەرمەك. سوندىقتان جاڭادان قابىلدانعان اتا زاڭدى بۇكىلحالىقتىق كەلىسىمنىڭ كونستيتۋسياسى دەپ اتاۋعا تولىق نەگىز بار. «ءبىزدىڭ بۇگىنگى باسقوسۋىمىزدىڭ دا بەيبىتشىلىك جانە كەلىسىم سارايىندا ءوتۋى تەگىن ەمەس»، – دەدى مۇحتار قۇل-مۇحاممەد.

جيىندى قورىتىندىلاي كەلە، «نۇر وتان» پارتياسى ءتوراعاسىنىڭ ءبىرىنشى ورىنباسارى: «پرەزيدەنتىمىز ەلىمىزدىڭ ساياسي ارەناسىندا وسىنداي اۋقىمدى رەفورما جۇرگىزۋ ارقىلى بىزگە ۇلكەن ءۇمىت ارتىپ وتىر. ەندى ءبىز ەلباسى مەن بارشا قازاقستان حالقىنىڭ زور سەنىمىن ابىرويمەن اقتاۋعا ءتيىسپىز»، – دەدى.