1950-شى جىلدارى ءبىر توپ ءۇندى ايەلدەرىنىڭ سول كەزدەگى پرەمەر-مينيستر جاۋاحارلال نەرۋگە حات جازعانى بار ەدى. جاستاردىڭ جىنىستىق ءومىرى ەرتە باستالماۋى ءۇشىن كينوداعى ءسۇيىستى كورسەتپەسە ەكەن دەگەن... بۇل سەبەپتەن دە ەمەس شىعار، ءبىراق 30-40 جىلداي بولليۆۋد ونىمىنەن ءسۇيىستى كورە الماعانىمىز راس. ءقازىر سۇيىستەن ءسۇيىس ول جاقتا دا. ارينە، بۇل سەبەپتەن دە ەمەس شىعار، ءبىراق ۇلتشىل پارتيالارى وسى ەلدەگى ايەل زورلاۋ فاكتىلەرىنىڭ تىم كوبەيىپ كەتكەنىن ەكرانداعى اكتريسالاردىڭ تىم كوپ شەشىنۋىمەن بايلانىستىرىپ، ءبىراز مالىمدەمە جاساعان. بايلانىس جوق تا شىعار، بار دا شىعار، كىم ءبىلسىن.

سودان ءۇندى اكتەرلارى اراسىنان ەرەكشە ۇناتاتىنىم شارۋح حان ەدى، بىلەسىزدەر. ەكرانداعى وبرازدارى عانا ەمەس، ومىردەگى پرينسيپتەرى ۇنايتىن. مىسالى، ول كارەراسى باستالعاننان-اق ەشقاشان ەكراندا سۇيىسپەيمىن دەپ ۋادە بەرگەن-دى. وعان 20 جىلداي بەرىك بولدى دا، ياش چوپرانىڭ سوڭعى فيلمىندە بۇزدى-اي كەلىپ. كاترينا كايفپەن ءسۇيىستى. ال بيىل شىققان Raees فيلمىندە 54 پورنوفيلمگە تۇسكەن شەتەلدىك ەكس-پورنواكتريسامەن بىرگە ءان ايتىپ، پىرتىلداتىپ ءجۇر. سونشاما اتاق-داڭقىمەن كەشە عانا اركىمنىڭ استىندا جاتىپ-ۇستىندە وتىرعان جەزوكشەمەن ويناعانى جۇرەك اينىتادى. پرينسيپىنەن تايدى - قۇرمەتىڭنەن دە كەتەدى ەكەن.

بۇنىڭ ءبارى "بايان ەسەنتايەۆا ون التى جاستاعى قىزدى بەلگىلى اكتەرمەن ءسۇيىستىرىپ قويدى" دەگەن جاڭالىقتى كوزىم شالعان سوڭ، ويىما كەلدى. سول كوزى جاۋدىرەگەن تاۋەكەل ءمۇسىلىم، كامەلەتكە تولماعان قىز، بايان باياعى. ءيا، اركىمنىڭ "بۇل ونەر"، "بۇل جۇمىس" دەگەن سىلتاۋى دايىن تۇر، ءبىراق سالدارىن بىلمەگەن سوڭ، ءتۇبى سەگىزاياقتىڭ سىلەكەي-شىرىشتى اسقازانىنا قول سالعانداي نەپرياتنىي دۇنيە عوي... ساياسات نۇربەك اعامنىڭ يتاليانىڭ بۇرىنعى ۇكىمەتباسىسى سيلۆيو بەرلۋسكونيدى ۇناتپايتىنى بار ەدى وسى. نەگە دەپ سۇراعانىمدا، ول 20-30 جىل بويى قولىنداعى كوممەرسيالىق تەليەۆيدەنيە ارقىلى وتباسىعا بەرىك، قۇدايىنا جاقىن دەگەن يتاليالىقتاردى ۆارەتە-شوۋ مەن ىرباقاي كومەديالار ارقىلى مال قىلدى دەپ ەدى. مال دەگەندە بىلاي، مەنىڭ ءسوزىم عوي، ازعىردى دەپ ءتۇسىنىڭىز. قۇداي اقىرىن بەرسىن..

بۇرىن «ەر ادام ءبىر ايەل ادامعا بارىپ، كوشەدە زينا جاساۋدى ۇسىناتىن كۇن تۋمايىنشا، بۇل ۇممەت قۇرىدىمعا كەتپەيدى. سول كەزدە ولاردىڭ ىشىندەگى ەڭ جاقسىلارى: «تىم بولماسا، كەرەگەنىڭ ارتىنا جاسىرىنبايسىڭدار ما؟»،- دەپ ايتاتىندارى بولادى» دەگەن ءحاديستى بىلگەندە، بۇل مۇمكىن ەمەستەي كورىنەتىن. بۇرىن دەگەنىم، سەگىزىنشى سىنىپتا قاتار وقىعان اۋىل مەدرەسەسىن ايتامىن. ءقازىر وسى حاديس قايتا بارىنشا جۇمساق ايتىلعانداي كورىنەدى...

وركەن كەنجەبەك