بۇل تۋرالى ق ر ينۆەستيسيالار جانە دامۋ ءمينيسترى جەڭىس قاسىمبەك فەيسبۋكتەگى پاراقشاسىندا جاريالادى.

“بۇگىن ۇجىمعا قازاقستان رەسپۋبليكاسى ينۆەستيسيالار جانە دامۋ ءبىرىنشى ۆيسە-مينيسترى بولىپ تاعايىندالعان اليك ايداربايەۆتى تانىستىردىم.

اليك ايداربايەۆ مەملەكەتتىڭ ماڭىزدى سالالارىندا قىزمەت اتقارىپ كەلە جاتقان اسا تاجىريبەلى تۇلعا. ەلباسىنىڭ سەنىمىنە يە بولعان مىقتى ۇيىمداستىرۋشى، ىسكەر باسشى رەتىندە ءوزىن ماڭعىستاۋ وبلىسىنىڭ اكىمى بولىپ تۇرعاندا جانە وعان دەيىنگى قىزمەتتەرىندە جان-جاقتى كورسەتكەن ەدى. ەندىگى رەتتە اليك سەرىكۇلىن تاعى دا ۇلكەن جۇمىستار، جاڭا مىندەتتەر كۇتىپ تۇر.   اسا تاجىريبەلى ماماننىڭ كەلۋىمەن مينيسترلىك جۇمىسى ودان ءارى جاندانىپ، مەملەكەت باسشىسى مەن ۇكىمەت جۇكتەگەن مىندەتتەردى ويداعىداي اتقارامىز دەگەن سەنىمدەمىن” دەيدى مينيستر.

ءومىربايانى

اليك سەرىك ۇلى ايداربايەۆ 1963 جىلى 19 مامىردا الماتى وبلىسىندا دۇنيەگە كەلگەن. ۆ.لەنين اتىنداعى قازاق پوليتەحنيكالىق ينستيتۋتىن بىتىرگەن. 1985 جىلدان بەرى مۇنايگاز سالاسىندا جۇمىس ىستەيدى. مۇنايگاز وندىرىسىندە كاسىبي دامۋدىڭ بارلىق ساتىلارىنان ءوتتى، اعا گەولوگ، كەيىننەن تەحنولوگ، مۇناي جانە گاز ءوندىرۋ شەبەرى، «ماڭعىشلاقمۇناي» ءوب، «جەتىبايمۇناي» مگوب مۇناي جانە گاز ءوندىرۋ سەحى باستىعىنىڭ ورىنباسارى قىزمەتتەرىن اتقاردى. ءارجىلدارى «وڭتۇستىكقازمۇنايگاز» وندىرىستىك بىرلەستىگىندە باسشىلىق قىزمەتتەر اتقاردى. «تورعاي پەترولەۋم» جانە «ماڭعىستاۋمۇنايگاز» اق باس ديرەكتورى قىزمەتتەرىن اتقاردى. 2011 جىلدىڭ ساۋىرىنەن بەرى – «قازمۇنايگاز» ۇلتتىق كومپانياسى» اق بارلاۋ جانە ءوندىرۋ جونىندەگى باسقارۋشى ديرەكتورى. 2011 جىلدىڭ مامىرىندا ديرەكتورلار كەڭەسىنىڭ كەزەكتەن تىس وتىرىسىندا ديرەكتورلار كەڭەسىنىڭ ءتوراعاسى بولىپ سايلاندى. 2011 جىلدىڭ جەلتوقسانىندا «قازمۇنايگاز» بارلاۋ ءوندىرۋ» اكسيونەرلىك قوعامىنىڭ باس ديرەكتورى.. 2013 جىلدان 2017 جىلعا دەيىن ماڭعىستاۋ وبلىسىنىڭ اكىمى بولدى. «قۇرمەت»، «پاراسات» وردەندەرىمەن ماراپاتتالعان.