دۇنيەجۇزى قازاقتارىنىڭ V قۇرىلتايى استانادا ماۋسىم ايىنىڭ 22-25ء-ى كۇندەرى وتەدى. بۇل تۋرالى دۇنيەجۇزى قازاقتارى قاۋىمداستىعىنىڭ ءبولىم مەڭگەرۋشىسى بوتاكوز ۋاتقان حابارلادى.
"دۇنيەجۇزى قازاقتارىنىڭ V قۇرىلتايىنا ۇسىنىس قابىلداۋ بۇگىننەن توقتاتىلدى. 
40 ەلدەن 350 قازاق دياسپوراسىنىڭ جانە دە قاۋىمداستىقپەن تىكەلەي بايلانىستا جۇرگەن حالىقارالىق ۇيىمداردىڭ (تۇرك كەڭەسىنەن، قىپشاقتار قوعامىنان، ازەربايجان ەلى دياسپورولوگيا ءىسى جونىندەگى مەملەكەتتىك كوميتەتتەن، الەم موڭعولدارى كونگرەسىنەن، وزبەكستاننىڭ ۇلتارالىق مادەنيەت ورتالىعىنان) وكىلدەرى شاقىرىلادى. سونداي-اق، الماتى، استانا قالالارىنان، بارلىق وبلىستاردان، ۇكىمەت، پارلامەنت، مينيسترلىكتەر، ءتۇرلى پارتيالار مەن قوعامدىق ۇيىمداردىڭ، باق-نىڭ وكىلدەرى قاتىسادى. 
كوميسسيانىڭ العاشقى وتىرىسىندا بۇرىنعى وتكەن قۇرىلتايلارعا قاتىسقان (قوعام باسشىلارىنان باسقا) ادامدار شاقىرىلمايدى دەپ شەشىلدى، نەگىزىنەن جاستار كوبىرەك قامتىلماق.
قۇرىلتاي استانادا ماۋسىم ايىنىڭ 22-25ء-ى كۇندەرى وتەدى.
قۇرىلتايدىڭ دايىندىق جۇمىسىنا ساتتىلىك تىلەيمىن جانە دە ۇسىنىستار بەرىپ، بەلسەنە قاتىسقان بارلىق اعايىندارعا العىسىمىزدى بىلدىرەمىز"، - دەپ جازدى قاۋىمداستىق وكىلى.

تاۋەلسىزدىكتىڭ العاشقى كەزەڭىندە نۇرسۇلتان نازاربايەۆ تۇركيانىڭ ىستامبۇل قالاسىندا قازاق دياسپوراسى وكىلدەرىمەن كەزدەسكەندە العاش رەت دۇنيە ءجۇزى قازاقتارىنىڭ قۇرىلتايىن وتكىزۋ تۋرالى اڭگىمە بولعان ەكەن. كوپ ۇزاماي، 1992 جىلدىڭ قىركۇيەك ايىندا الماتى قالاسىندا تۇڭعىش رەت دۇنيە ءجۇزى قازاقتارىنىڭ قۇرىلتايى ءوتىپ، ەلباسى مازمۇندى بايانداما جاسادى. سوندا ول: «تورتكۇل دۇنيەنىڭ تۇكپىر-تۇكپىرىنەن قارلىعاشتاي ۇشىپ كەلگەن كوڭىلدەرىڭىز ءۇشىن، قايدا جۇرسەڭىزدەر دە اتامەكەن مەن اتاجۇرتقا دەگەن ساعىنىش پەن سۇيىسپەنشىلىككە تولى پەرزەنتتىك پەيىلدەرىڭىزدى ساقتاعاندارىڭىز ءۇشىن ريزاشىلىق بىلدىرەمىز. سىزدەر ارقىلى بۇكىل الەمدەگى قازاق باۋىرلارىمىزعا ىستىق سالەمىمىزدى جولدايمىز!»، – دەپ تەبىرەنە سويلەگەن بولاتىن.

ءبىرىنشى قۇرىلتايدا شەتەلدەگى قازاق دياسپورالارىمەن جۇمىس ىستەيتىن قاۋىمداستىق قۇرىلدى. وتىزدان استام مەملەكەتتەن كەلگەن دەلەگاسيا مۇشەلەرى ن.ءا.نازاربايەۆتى دۇنيە ءجۇزى قازاقتارى قاۋىمداستىعىنىڭ ءتورالقا ءتوراعاسى ەتىپ سايلادى. ءبىرىنشى قۇرىلتايدان بۇگىنگە دەيىن پرەزيدەنتتىڭ قاتىسۋىمەن 2002 جىلى تۇركىستان قالاسىندا، 2005 جانە 2011 جىلدارى استانا قالاسىندا تاعى ءۇش قۇرىلتاي ءوتتى.

2002 جىلدىڭ 23-24ء-شى قازان كۇندەرى تۇركىستان قالاسىندا وتكەن دۇنيەجۇزى قازاقتارىنىڭ ءىى-شى قۇرىلتايىندا ەلباسى:
"تاعدىرىمىز سولاي بولىپ، اننان قاشقانداردى، مۇننان قاشقانداردى ەۋروپادان دا، ازيادان دا تىڭ جەردى كوتەرەمىز دەپ، قازاقتىڭ سانىن ازايتامىز دەپ، كوپ ۇلتتى بولدىق. ونى كەمشىلىك دەپ ساناماۋ كەرەك. ارتىقشىلىعىمىز دەپ ساناۋ كەرەك! سوندىقتان ءبىز ءار ۇلتتىڭ حالقىن باۋىرىمىزعا باسىپ ۇيرەنگەن حالىقپىز، ال ەندى شەتەلدەن كوشىپ كەلەمىز دەگەن ءوز قازاقتارىمىزدى باۋىرىمىزعا باسا المايمىز با سوندا؟! مەن ويلايمىن، سەگىز جارىم ميلليون قازاق قازاقستاندا. مەنىڭشە، ءقازىر توعىز ميلليونعا جاقىندادى. سەبەبى، وسى جىلداردىڭ ىشىندە جارتى ميلليون قازاق كوشىپ كەلدى. سەگىز ميلليوندى ورتاشا ءۇش جارىمعا، تورتكە بولگەندە، قانشا جانۇيا بولادى؟! ەكى ميلليونعا جاقىن ءبىزدىڭ جانۇيامىز بار. ءتورت ميلليونعا جاقىن جانۇيا ەكى قازاقتان شاقىرىپ اكەپ، اياعىنان تۇرعىزىپ جىبەرسە، سونشا قيىنشىلىق بولماس دەپ ويلايمىن سولارعا. بۇل ءبىزدىڭ ەلدىگىمىز بولىپ سانالار ەدى. دۇنيە جۇزىنە ءبىز وسىنداي ماعلۇمات، مالىمەت، تاجىريبە بەرەر ەدىك!»، - دەپ شاقىردى الەمدەگى بارشا قانداستاردى.