قوستاناي وبلىسىنىڭ ارقالىق قالاسىنداعى 600 ادامدىق مەشىت ساتىلىمعا شىعارىلدى. اقپارات قازاقستاندىق جارناما رەسۋرستارىنىڭ بىرىندە جاريالانعان. بۇل جايىندا kostanaytv.kz حابارلايدى.

ءدىني ورىندى ساتىلىمعا شىعارماق بولعان ادام مەشىت باعاسىن 200-220 ميلليون تەڭگەگە باعالاپ وتىر.

«ارقالىق قالاسىندا 600 ادامدىق مەشىتتى ساتامىن. عيمارات 85-90%-عا ءازىر. جەرى – 300 سوتتىق. جالعا بەرۋ ۇسىنىسىن قاراستىرامىن. جىلىنا 200 مىڭ تەڭگەگە. عيماراتتى وزگە بيزنەسكە وزگەرتۋگە ءازىر سەرىكتەستى دە ىزدەستىرۋدەمىز. قۇرىلىس ماتەريالدارى بار»، - دەپ جازعان مەشىتتى ساتاتىنىن مالىمدەگەن ازامات.

اتىراۋ قالالىق مەشىتىنىڭ يمامى سەرىكجان ەنشىباي ۇلى وسى اقپاراتقا بايلانىستى ءوز ويىن ءبىلدىردى:

«شاريعاتقا سۇيەنسەك، مەشىتتى ساتۋعا بولمايدى. ەرتە زامانداردان بەرى ادامدار مەشىتكە قۇلشىلىق ەتۋ ءۇشىن كەلەدى. بۇرىن-سوڭدى مەشىت ساتۋ نەمەسە بىرەۋگە سىيعا تارتۋ دەگەن دۇنيە ورىن الماعان. مۇمكىن، زاڭ بويىنشا رۇقسات ەتىلگەن شىعار، ءبىراق شاريعات رۇقسات ەتپەيدى»