سولتۇستىك قازاقستان وبلىستىق «سولتۇستىك قازاقستان» گازەتىنىڭ 2017 جىلعى 14 ناۋرىز كۇنگى سانىندا «ەسكى اتاۋلاردان ارىلاتىن ۋاقىت جەتتى» دەگەن ماقالانى وقىعاننان كەيىن، قولىما قالام الىپ وتىرمىن.  قىزىلجار اۋدانىنداعى پەتەرفەلد اۋىلىنىڭ تۇرعىنى، ەڭبەك ارداگەرى ساعات قۋاندىقوۆ كەڭەستىك ءداۋىردىڭ سارقىنشاعى ىسپەتتى ەسكى اتاۋلاردان ارىلاتىن ۋاقىت جەتكەنىن، ءالى دە بولسا  ونوماستيكا ماسەلەسىنىڭ اقساپ تۇرعانى جايىندا ءوز ويىن ءبىلدىرىپ، ماقالا جازعان ەكەن. ماتەريالدان قانداي دا ءبىر وعاشتىق، ارانداتۋشىلىق نە بولماسا جەكە ءبىر تۇلعالاردىڭ ار-وجدانىنا نۇقسان كەلەتىندەي پىكىردى بايقامادىم. سوعان قاراماستان قىزىلجار اۋداندىق ىشكى ساياسات ءبولىمى باسشىسىنىڭ مىندەتىن اتقارىپ جۇرگەن اللا كريۆوروتكو  اۋداندىق «قىزىلجار” گازەتىنە بەتتەلىپ، شىعىپ بارا جاتقان ماقالانى الدىرىپ تاستاپتى.

شەنەۋنىكتىڭ بۇل قىلىعىنا اشىنعان اۆتور «اۋداندىق ىشكى ساياسات ءبولىمى باسشىسىنىڭ مىندەتىن اتقارۋشى ا. م. كريۆورتكو ەلىمىزدىڭ اتا زاڭى كەپىلدىك بەرگەن ازاماتتاردىڭ ءسوز، شىعارماشىلىق بوستاندىعىنا شەكتەۋ قويىپ،  قازاقستان رەسپۋبليكاسىنىڭ “بۇقارالىق اقپارات قۇرالدارى تۋرالى” زاڭىن بەلدەن باسىپ، اۋداندىق گازەتكە سەنزۋرا جاساپ وتىرعانىن اڭعاردىم. بۇل قالاي؟»، دەيدى.

ازاتتىق العانىمىزعا شيرەك عاسىر تولسا دا، ەسكى كوشە اتاۋلارىن ەلىمىزدىڭ ۇلتتىق بولمىسىنا ساي ەتىپ وزگەرتۋگە قارسىلىق ءبىلدىرىپ، اياقتان شالاتىن شەنەۋنىكتەر تابىلىپ جاتادى. ساعات قۋاندىقوۆ ءوز ماقالاسىندا ارتىق اۋىز ءسوز ايتىپ تۇرعان جوق. بار بولعانى ەلىمىزدىڭ ءبىر تۇرعىنى رەتىندە تاۋەلسىز مەملەكەتتىڭ ۇستانعان باعىتىنا ساي كەلمەيتىن كەڭەستىك ءداۋىردىڭ سارقىنشاعى ىسپەتتى بۇل اتاۋلاردى وزگەرتۋ ماسەلەسى ۇزاق جىلداردان بەرى شەشىمىن تاپپاي كەلە جاتقانىنا قىنجىلىس ءبىلدىرىپ، ەسكى اتاۋلاردان ارىلاتىن ۋاقىت جەتكەنى جايىندا ويىن ورتاعا سالعان ەكەن. ءبىزدىڭ وبلىسىمىزدا جەتپىستەن استام ەلدى مەكەن ءالى كۇنگە دەيىن توتاليتارلىق سيپاتتاعى اتاۋلارعا يە ەكەنىن، ءبىر لەنيننىڭ اتىندا 79، سوۆەت اتاۋىن يەلەنگەن 74، كومسومول قۇرمەتىنە قويىلعان 68، وكتيابر دەپ اتالاتىن 52 اۋىل مەن كوشە بار ەكەن وسى ماقالادان ءبىلدىم.  

وسىندايدا مۇحتار اۋەزوۆتىڭ “ەل بولامىن دەسەڭ، بەسىگىڭدى تۇزە”، – دەگەن عيبراتتى ءسوزى ويعا ورالادى. كەڭەس ءداۋىرىن ەسكە سالاتىن كوشە اتاۋلارىن وزگەرتۋگە بيلىك تە، تۇرعىندار دا ىقىلاس تانىتسا، بۇل ماسەلە تولىق شەشىلىپ قالماعانمەن، سەڭ سوگىلەر ەدى، دەپ ويلايسىڭ.

ساعات قۋاندىقوۆ ءوزى  تۇرىپ جاتقان پەتەرفەلد اۋىلىن مىسالعا  الىپ، ول جەردە دە ونوماستيكا ماسەلەسىنىڭ اقساپ تۇرعانىن ءسوز ەتەدى. اۋىلدىق وكرۋگتە وتكەن جينالىستا كۇن تارتىبىنە ەسكىرگەن كوشە اتاۋلارىن وزگەرتۋ ماسەلەسى قويىلعانىن، اۋىلداعى مولودەجنايا، تورگوۆايا، شكولنايا، ۆوستوچنايا، وكتيابرسكايا، كومينتەرنا سىندى كوشەلەردىڭ سوڭعى ەكەۋىنىڭ اتاۋىن اۋىستىرۋ تۋرالى شەشىم قابىلدانعانىن ايتقان ەكەن.  سونداي-اق، اۆتور  كوشە اتتارىن وزگەرتۋگە جەرگىلىكتى تۇرعىندار تاراپىنان  قارسىلىق بايقالمايتىنىن، تەك قۇجات اۋىستىرۋ جۇمىستارى قاراجات ماسەلەسىنە تىرەلىپ، قول بايلاۋ بولىپ تۇر، دەگەن ويىن بىلدىرەدى. 

ال اللا كريۆوروتكو بۇل ماقالانى  گازەت بەتىنەن الىپ تاستاعاننان نە ۇتتى. مەنىڭشە، بۇل ءتىل ساياساتىنا اشىقتان-اشىق قارسىلىق ءبىلدىرۋ. وسىلايشا بەلدەن باسۋ ارقىلى مەملەكەتتىك قىزمەتكەر ءوز مىندەتىنە ادالدىق تانىتىپ تۇر ما، ويلاندىراتىن ماسەلە؟!

جاينا بالتاباي،

پەتروپاۆل قالاسىنىڭ تۇرعىنى.