اقتوبەدەگى قىلمىستىق ىستەر جونىندەگى مامانداندىرىلعان اۋدانارالىق سوتىندا اعايىنداردىڭ اراسىندا بولعان جانجالعا قاتىستى سوت تىڭدالىمى باستالدى. باجاسىن اتىپ ءولتىرىپ، ايدالاعا تاستاپ كەتكەن سوتتالۋشى ءوز كىناسىن ءىشىنارا عانا مويىندايتىنىن ايتتى دەپ حابارلايدى «قامشى» پورتالى وڭىردەگى NUR.KZ تىلشىسىنە سىلتەپ.

وقيعا 2016 جىلدىڭ 3 قازانىندا كۇندىزگى ۋاقىتتا بولعان. حرومتاۋ اۋدانى كوكتاۋ اۋىلى نۇرلى كوش كوشەسىنىڭ تۇرعىنى جەتپىس رشيموۆ تەلەفون ارقىلى باجاسىن مال بازاسىنىڭ ماڭىنا كەزدەسۋگە شاقىرادى. ول ىشىمدىك ىشكەن كۇيى كەزدەسۋگە كەلگەن باجاسىن اڭشى مىلتىعىمەن اتىپ جىبەرىپ، وعان ەشقانداي كومەك كورسەتپەستەن ايدالاعا تاستاپ كەتكەن.

حابلاحات جانزاقوۆ كەۋدەسىنەن جارالانىپ، وكپەدەن كوپ قان كەتۋىنەن وقيعا ورنىندا كوز جۇمادى. سوتقا تالاپ ارىز تۇسىرگەن جابىرلەنۋشىنىڭ اعاسى سوتتالۋشىنىڭ وسىعان دەيىن دە ءىنىسىن ۇرىپ تاستاعانىن ايتتى.

«ەكەۋى دە ءبىرىن ءبىرى بالا كەزدەن تانيدى. قاراسۋ اۋىلىندا تۋىپ ءوستى. كەيىن ءبىر ءۇيدىڭ قىزىن الىپ باجا بولدى. ول ءىنىمدى 1994 جىلى دا ۇرىپ، جاعىن سىندىرعان بولاتىن. ۇيگە ەڭبەكتەپ كەلگەن كۇيەۋىن كورگەن ايەلى جۇكتى ەدى. بوسانعان كەزدە بالاسى سويلەي المايتىن بولىپ تۋدى.

اعايىنشىلىقپەن سوتقا بەرگەن جوقپىز. ەندى «قاشارىمدى جوعالتتى» دەپ ءىنىمدى اتىپ ءولتىردى. وقيعا تۋرالى ءىنىم ولگەننەن كەيىن عانا ەستىدىم. مەنى سول جەرگە اپارعاندا قانسىراپ جاتقان ءىنىمنىڭ ءمايىتىن عانا كوردىم، پوليسيا ءجۇردى. ءارى قاراي ەسىمدە جوق. ادام كورمەسە ايدالادان قۇس تا جەپ كەتەر ەدى»، - دەيدى مارقۇمنىڭ اعاسى.

سوتتالۋشى باجاسىنا وق اتقانىن مويىنداپ، ءبىراق ونى قاساقانا جاساعان جوقپىن دەپ اقتالدى.

«ايىپتى ءىشىنارا مويىندايمىن. اتقانىم راس، ءبىراق قاساقانا اتقان جوقپىن. ولۋىنە سەبەپشى بولعان شىعار... 1994 جىلعى وقيعادا مەن ونى ۇيىنە بارىپ ساباعان جوقپىن. ونىڭ ءوزى ۇيىمە كەلدى»، - دەدى سوتتالۋشى جايبىراقات.

ايىپتاۋدا حابارلانعانداي، سوتتالۋشىنىڭ قارۋ ۇستاۋعا رۇقساتى بولماعان.

سوتتالۋشى جەتپىس رشيموۆ - 1961 جىلعى، بۇرىن سوتتالعان، ءۇشىنشى توپ مۇگەدەگى.

ول سوتتا 6 بالاسى مەن نەمەرەلەرىنىڭ بارىن ايتتى. بۇگىنگى سوت ماجىلىسىنە وقيعا تۋرالى بىلەتىن ەكى كۋاگەر كەلگەن جوق.

جابىرلەنۋشىنىڭ قورعاۋشىسى سوت ءتوراعاسىنا اۋىلدا كۋاگەرلەردى قورقىتۋ وقيعاسىنىڭ بولعانىن حابارلادى. ايتۋىنشا، سوتقا شاقىرىلعان كاۋگەرلەر وزدەرىن قورقىتقاندىعى تۋرالى پوليسياعا حابار بەرگەن.

سوت ءتوراعاسى نۇرلان سۇلتانوۆتان جابىرلەنۋشى تاراپ 10 ميلليون تەڭگە مورالدىق، 520 مىڭ تەڭگە ماتەريالدىق شىعىن وتەپ بەرۋدى سۇرايدى.

سوتقا بارلىق اعايىن-تۋعان جينالعان.