قازاقستان رەسپۋبليكاسى پارلامەنتى سەناتىنىڭ دەپۋتاتى داريعا نازاربايەۆانىڭ ءتوراعالىق ەتۋىمەن رەسپۋبليكالىق كونكۋرستىق كوميسسيانىڭ مەملەكەتتىك 6 جوعارى ورنىنىڭ رەكتورلارىن سايلاۋ جونىندەگى وتىرىسى بولدى دەپ حابارلايدى «قامشى» پورتالى ق ر پارلامەنت سەناتىنىڭ باسپا ءسوز قىزمەتىنە سىلتەي وتىرىپ. ولار ق. جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى، قاراعاندى مەملەكەتتىك يندۋستريالىق ۋنيۆەرسيتەتى، ش.ەسەنوۆ اتىنداعى كاسپيي مەملەكەتتىك تەحنولوگيا جانە ينجينيرينگ ۋنيۆەرسيتەتى، م.قوزىبايەۆ اتىنداعى سولتۇستىك قازاقستان مەملەكەتتىك ۋنيۆەرسيتەتى، تاراز مەملەكەتتىك پەداگوگيكالىق ۋنيۆەرسيتەتى جانە م.ح. دۋلاتي اتىنداعى تاراز مەملەكەتتىك ۋنيۆەرسيتەتى. رەسپۋبليكالىق كونكۋرستىق كوميسسياسىنىڭ قاراۋىنا وسى 6 جوعارى وقۋ ورنىنىڭ بايقاۋشىلار كەڭەسى ۇسىنعان، كونكۋرسقا ءوتىنىش بەرگەن 45 ادامنىڭ 11ء-ى ۇسىنىلدى. ۇمىتكەرلەرمەن اڭگىمەلەسۋ جانە ولاردىڭ جوعارعى وقۋ ورىندارىن دامىتۋ جونىندەگى باعدارلامالارىن تالقىلاۋ قورىتىندىسى بويىنشا ق. جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنە باۋىرجان ەردەمبەكوۆتى، قاراعاندى مەملەكەتتىك يندۋستريالىق ۋنيۆەرسيتەتىنە باقىت جاۋتىكوۆتى، م.قوزىبايەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنە سەرىك ومىربايەۆتى، تاراز مەملەكەتتىك پەداگوگيكالىق ۋنيۆەرسيتەتىنە دارياكۇل قوجامجاروۆانى رەكتور ەتىپ تاعايىنداۋ ۇسىنىلدى. ش.ەسەنوۆ اتىنداعى كاسپيي مەملەكەتتىك تەحنولوگيا جانە ينجينيرينگ ۋنيۆەرسيتەتى جانە م.ح. دۋلاتي اتىنداعى تاراز مەملەكەتتىك ۋنيۆەرسيتەتى بويىنشا كونكۋرس وتپەگەن بولىپ سانالدى جانە ءبىلىم جانە عىلىم مينيسترلىگىنە كونكۋرستى قايتا وتكىزۋ جونىندە ۇسىنىس ايتىلدى. رەكتورلاردىڭ سايلانۋى جانە ەسەپتىلىگى قاعيداسىنىڭ ەنگىزىلۋى جوعارى وقۋ ورىندارىنىڭ اكادەميالىق جانە باسقارۋ دەربەستىگىن كەزەڭ-كەزەڭمەن ۇلعايتۋ اياسىنداعى «100 ناقتى قادام» ۇلت جوسپارىنىڭ 78ء-شى قادامىنا سايكەس كەلەدى.