امەريكالىق رەجيسسەر برەندون لي باتىس موڭعولياداعى قازاقتاردىڭ ءومىرى تۋرالى ۆيدەوروليك ءتۇسىردى. «موڭعوليا كوشپەلىلەرى» اتتى قىسقا مەتراجدى روليك National Geographic اقش-تىڭ ۇلتتىق گەوگرافيالىق قوعامداستىعىنىڭ يۋتۋبتاعى ارناسىندا جاريالاندى، دەپ حابارلايدى قازاقپارات
لي زاماناۋي كوشپەندىلەردىڭ تۇرمىس-تىرشىلىگىن، ءداستۇرلى ويىندارىن، اڭشىلىعىن، قىسقا دايىندىعىن كورسەتتى. «مەن موڭعولياداعى ءتۇسىرىلىمدى ۇمىتپايمىن - بۇل وتە كەرەمەت ءارى قيىن ءتۇسىرىلىم بولدى. كۇننىڭ قاتتى سۋىتۋى قيىندىق تۋدىردى. جاساعان ۆيدەوروليگىمىزدە ءتۇرلى-تۇستى تۇزەتۋلەردى قولدانعاندىقتان كۇن جىلى سياقتى كورىنەدى. ءبىراق اۋا تەمپەراتۋراسى نولدەن تومەن ەدى. ءتۇسىرىلىم كەزىندە قول-اياقتارىم توڭعاننان قيمىلعا كەلمەي قالدى»، - دەدى ول Look.tm باسىلىمىنا بەرگەن سۇحباتىندا.
«سۋىقتان بولەكتەن، ازىق-تۇلىك جاعى دا قينادى - كوشپەلى قازاقتار پىسكەن ەتتەن باسقا كوپ ەشتەڭە جەمەيدى ەكەن. مەن ادەتتە بالىق پەن كوكونىستەردى كوپ جەيمىن، ال مۇنداي كۇندە ەت جەۋگە تۋرا كەلدى. ەتتى شايناپ، جۇتۋعا ءوزىمدى ماجبۇرلەدىم. تەڭىز ونىمدەرىن كورەتىن كۇندى اسىعا كۇتتىم»، - دەپ اتاپ ءوتتى لي.
ونىڭ ايتۋىنشا، موڭعوليا قازاقتارى - قوناقجاي حالىق. «موڭعولياداعى كوشپەلىلەر قالاي ءومىر سۇرەدى؟ كۇن سايىن - اۋىر ەڭبەك. ولار ۇنەمى جۇمىس جاساپ، قيمىل-قوزعالىستا بولادى. وتە كوپ مولشەردە ەت جەيدى. سايىستار ۇيىمداستىرادى - وعان ماشىقتانباي، شىنىقپاي قاتىسۋ مۇمكىن ەمەس. وجەتتىلىك قاجەت. ولاردىڭ شىدامدىلىعى مەنى قايران قالدىردى. بۇركىتشى-اڭشىلار كۇنى بويى ەر-توقىمنىڭ ۇستىنەن تۇسپەي، ساعاتتاپ سۋىقتا وتىرىپ، قويان نەمەسە تۇلكىنى اڭديدى. ولاردىڭ بالالارى دا سونداي. كامەلەتكە تولماعانداردىڭ ءوزى اتتىڭ قۇلاعىندا وينايدى»، - دەپ اتاپ ءوتتى رەجيسسەر.
«كوشپەلىلەر، ارينە، زاماناۋي تەحنيكالاردى قولدانادى. ولاردىڭ كوبىندە تەلەديدارلار مەن ۇيالى تەلەفوندار بار. ولار كيىز ۇيلەرىن جۇك كولىكتەرىمەن كوشىرەدى. ءبىراق، بۇعان قاراماستان، ول جاقتا ءوزىڭدى 19-عاسىرعا ورالعانداي سەزىنەسىڭ»، - دەپ تۇيىندەدى برەندون لي.
پىكىر قالدىرۋ