بۇگىن استانادا پاندىك كوميسسيالاردىڭ جۇمىسىن قورىتىندىلعان باسپا ءسوز ءماسليحاتى ءوتتى، دەپ حابارلايدى baq.kz.

6-13 ناۋرىز ارالىعىندا ەۇۋ-دە پارلامەنت دەپۋتاتتارى، عالىمدار، سالا ماماندارىنان جاساقتالعان ارنايى كوميسسيا مىڭنان استام وقۋلىق، ادىستەمەلىك قۇرال، مەكتەپكە دەيىنگى تاربيە قۇرالىن ساراپتامادان وتكىزدى. تالقىلاۋعا 120-دان استام مامان قاتىستى.

«تاريحتا العاش رەت پاندىك كوميسسيانىڭ قۇرامى 40 ادامعا دەيىن كەڭەيتىلدى. بۇعان دەيىن نە بارى 13 ادام جابىق تۇردە وتكىزىپ، وزدەرىنىڭ شەشىمدەرىن جاريالايتىن. وسى جولعى كوميسسيا قۇرامىندا ءار وڭىردەن كەلگەن ۇستازدار، مەكتەپ ديرەكتورلارى، عالىمدار، ءبىرعانىم ءايتىموۆا، بەكبولات تىلەۋحان، جامبىل احمەتبەكوۆ ت.ب. قاتارلى سەنات پەن ءماجىلىس دەپۋتاتتارى بولدى. ال كىتاپتاردى، وقۋلىقتاردى جارىققا شىعارۋ ءۇشىن وتاندىق تا، شەتەلدىك تە باسپالار اراسىنان 12 باسپا قاتىستى» - دەيدى بعم ورىنباسارى ەلميرا سۋحانبەردييەۆا.

نەگىزگى وزگەرىس 2، 5 جانە 7-سىنىپ وقۋلىقتارىنا ەنگىزىلگەن. بعم بۇعان دەيىن دە ءبىراز رەفورما جاساعان. ولاردىڭ قاتارىندا ءساتتىسى دە، ءساتسىزى دە بولدى. دەگەنمەن بۇل جولعى ءۇش سىنىپقا قاتىستى 197 وقۋلىقتا قانداي ءبىر جاعدايمەن كەمشىلىكتەر بولاتىن بولسا، وعان تىكەلەي مينيسترلىك جاۋاپ بەرەتىن بولادى. بۇل تۋرالى باسپا ءسوز ءماسليحاتىندا عىلىمي پراكتيكالىق وقۋ ورتالىعىنىڭ ديرەكتورى كارىموۆا بيبىگۇل مالىمدەدى.

«جالپى وقۋلىقتار ءتورت جىلدا ءبىر رەت وزگەرتىلىپ وتىرادى. ولار وقۋشىنىڭ جاس ەرەكشەلىكتەرىن ەسكەرە وتىرىپ مەملەكەتتىك ستاندارتتار مەن باعدارلامالارعا تولىق ساي ازىرلەنگەن وقۋلىقتار. ءبىز 1 جىل بويى 2، 5 جانە 7 سىنىپ وقۋلىقتارىنا ساراپتاما جۇرگىزدىك. ال وقۋلىقتاعى قاتەلەر نەمەسە تالعامعا ساي ەمەس ماتىندەر بولسا، مينيسترلىك جاۋاپ بەرەدى» - دەدى ديرەكتور.

پاندىك كوميسسيا بەكىتكەن كىتاپتار مينيسترلىكتەردىڭ سايتىنا بەكىتىلدى. وقۋشىلار، اتا-انالار، عالىمدار، جالپى كەز كەلگەن ادام ونى كورىپ، تالداپ، تالقىلاپ، ءوز ۇسىنىس پىكىرلەرىن بەرۋگە مۇمكىندىك بار.