ەلىمىزگە بەلگىلى جۋرناليست، تەلەجۇرگىزۋشى بيبىگۇل داۋلەتبەك قىزى جۋىق ارادا "مەن ءانشىمىن" بايقاۋىن وتاندىق تەلەارنالاردان كورسەتىلۋىنە قاتىستى ءوز پىكىرىنى Facebook الەۋمەتتىك جەلىسىندەگى پاراقشاسىندا جاريالاپتى، دەپ حابارلايدى "قامشى". 

"ديماشتىڭ قىتايدا ءوتىپ جاتقان "مەن ءانشىمىن" جوباسىن "حاباردان" كورسەتەدى دەپ، سۇيىنشىلەتىپ بولدىڭىزدار ما؟ ءجا، مەنىڭ دە ايتارىم بار، ەندەشە...
قۇدايىم-اۋ، بۇل "حاباردىڭ" قاي ساسقانى؟ تورەلىگىن ايتىڭىزدارشى وزدەرىڭىز؟! 
سوندا ءبارىمىز ەندىگى بارلىعىن يتەرىپ قويىپ، قىتايلاردىڭ شوۋىن كورەمىز بە؟ قىتايلار بۇل جوبانى ارينە تەگىن بەرىپ قويمايدى وتاندىق ارناعا؟ سوندا ميلليونداعان قاراجاتقا ءوتىپ كەتكەن جوبانى ساتىپ الماق پا؟ بۇل جوبا جاقىن كۇندەرى اياقتالادى. تۇك تۇسىنبەدىم. 
ديماشتى الەۋمەتتىك جەلىدە قولداۋشى جۋرناليستەردىڭ ءبىرى ءوزىممىن. جەڭىپ شىقسىن دەپ ءار اپتا سايىن قۇدايدان تىلەپ وتىرامىن (وعان وزدەرىڭىز دە كۋاسىزدەر). الايدا، بۇل جوبانىڭ وتاندىق ارنادا كورسەتىلۋىنە ۇزىلدى-كەسىلدى قارسىمىن! نە دەسەڭىزدەر، و دەڭىزدەر...ءيا، مەن قارسىمىن! 
بۇل جوبا ارقىلى ءبىز قىتايدى ناسيحاتتايمىز. كەزىندە رەسەي مەن ۋكراينانىڭ شوۋلارىن كورسەتىپ الەك بولىپ ەدى ەلىمىزدەگى ارنالار، ەندى قالماعانى قىتايدىڭ جوباسى... 
ديماشتىڭ 8 كەزەڭىن، Youtube امان بولسىن، سول جەردەن كورىپ قويدىق قوي. ەگەر "حابار" سونشالىقتى ديماشتى قولداعىسى كەلسە، ميلليونداعان قاراجاتقا ءدال وسىنداي مەگا-جوبا اشسىن! و نەسى، بارلىعى سۇيىنشىلەتىپ قىتايدىڭ ءوتىپ كەتكەن جوباسى وتاندىق ارنادان كورسەتەدى دەپ شۋلاپ.
ويلانىڭىزدار، ارىپتەستەر، ويلانىڭىزدار! بۇل جوبا ارقىلى ءبىز قىتايعا ەسىگىمىزدى اشامىز. ونسىز دا قازاق قىزدارى قىتايدىڭ جىگىتتەرىنە كۇيەۋگە ءتيىپ، بالا تۋىپ جاتقانىندا بۇل جوبا ولارعا ءتيىمدى بولماق. تەلەارنا ارقىلى ولاردى ناسيحاتتايمىز. قالايشا وسىنى تۇسىنبەيدى؟ سوندا جۇڭگو انشىلەرىنىڭ قيقۋلاتقان ءانىن ءبىر ساعات بويى ءبىزدىڭ قازاق حالقى كورۋ كەرەك پە؟ قاي مەملەكەتتى كوردىڭىزدەر وزگە ەلدىڭ وسىنداي شوۋدى ساتىپ الىپ جاتقانىن؟! ۇيات!!! ماسقارا!!!
قۋانساق، قازاق بالاسىنىڭ سول جوبادا سىناقتان ءوتىپ، داۋىسىن الەم تىڭداعانىنا قۋاندىق. بوياۋشى، بوياۋشى دەگەنگە ءبىزدىڭ ارنالار وسى ساقالىن بوياپ بارا جاتقان جوق پا؟ پارادوكس...
سوندىقتان دا، ءوز باسىم قارسىمىن!" - دەيدى بيبىگۇل داۋلەتبەك قىزى.

ەستەرىڭىزگە سالا كەتسەك، جۇڭگو ەلىندە ءوتىپ جاتقان "مەن ءانشىمىن" جوباسىنا جالپى جۇرتقا تانىمال ءانشى ديماش قۇدايبەرگەنوۆ قاتىسىپ، اقتىق مارە، ياعني فينالعا جولداما العان بولاتىن. ديماشتىڭ ونەرىن قازاق حالقى تەك ينتەرنەت ارقىلى تاماشالاپ ءجۇردى. ەندىگى كەزەكتە سول جوبانى "حابار" ارناسىنان كورسەتەدى دەگەن اقپارات تاراپ، وعان قاتىستى الەۋمەتتىك جەلى قولدانۋشىلارى ءوز پىكىرلەرىن ءبىلدىرىپ جاتىر.