Cولتۇستىك قازاقستان وبلىسىنىڭ اكىمى قۇمار اقساقالوۆ ناۋرىز مەيرامى قارساڭىندا وبلىس جۇرتشىلىعىمەن كەزدەستى، ونىڭ بارىسىندا كونسترۋكتيۆتى سۇحبات ءوتتى.

«مەرەكە الدىندا سىزدىرمەن ارنايى كەزدەسۋىمدى ءجون دەپ كوردىم.  وزدەرىڭىز كورىپ، ەستىپ وتىرسىزدار، ەكى كۇن ىشىندە بۇكىل اۋدان اكىمدەرىن، قالا اكىمدەرىنىڭ ەسەپتەرىن تىڭدادىم، قابىلدادىم ، كەشە باسقارما مەن دەپارتامەنت باسشىلارىمەن ارالاسىپ، ولارمەن دە وي-پىكىرلەسىپ، پروبلەمالاردى تالقىلادىق»، - دەدى وبلىس اكىمى.

وبلىس اكىمى قاتىسقان ءىس-شاراعا ۇوس، ەڭبەك، سپورت ارداگەرلەرى، قازاقستاننىڭ ەڭبەك سىڭىرگەن قايراتكەرى، وبلىستىڭ قۇرمەتتى ازاماتتارى، قوعامدىق كەڭەستەردىڭ ءتوراعالارى قاتىستى.

«مىنەكەي بۇگىن ۇلكەن مەرەكەنىڭ الدىندا قوعامدىق پىكىردى قالىپتاستىراتىن ازاماتتارمەن كەزدەسۋدى ۇيىمداستىرۋدى ءجون ساناپ، ويلارىڭىزبەن ءبولىسىپ، پىكىرلەرىڭىزدى، ۇسىنىستارىڭىزدى تىڭداۋ ءۇشىن الدارىڭىزعا كەلىپ وتىرمىز»، - دەپ اتاپ ءوتتى قۇمار اقساقالوۆ.

ءوڭىر باسشىسى جينالعانداردى ناۋرىز مەيرامىمەن قۇتتىقتاي  وتىرىپ، كوكتەم مەرەكەسىن تەك قالالار مەن اۋىلداردىڭ الاڭدارى مەن كوشەلەرىندە تويلاماي، سونداي-اق، ءار اۋلادا دا تويلاۋدى ۇسىندى. 

 «وسى جىلى بىزدەر ناۋرىز مەيرامىن اۋلالىق اۋماقتار مەن تۇرعىن ءۇي–جايلارىندا قارسى الۋدان باستاساق،  جاقسى ءداستۇر بولار ەدى. اۋلالارداعى كىرە-بەرىستەردى، بالالاردىڭ ويىن الاڭدارىن، تروتۋارلاردى، ارىقتار مەن جاۋىن-شاشىن كارىز جۇيەسىن قاردان تازارتۋ، سوڭىندا، مۇمكىندىگىنشە، بارلىق اۋلامەن مەرەكەلىك  داستارحان جايىپ، كۇش پەن شىدامدىلىقتى تەكسەرەتىن ۇلتتىق ويىنداردى ۇيىمداستىرۋ. وسى بارلىق ىس-ارەكەتتەر بىزدەگى بىرلىك رۋحى مەن ىنتىماقتاستىعىمىزدى ودان ءارى نىعايتاتىنىنا سەنىمدىمىن»، - دەپ اتاپ ءوتتى ءوڭىر باسشىسى.

پەتروپاۆلدا تۇرعىن الابىندا 400-دەن استام  اۋلا بار.

كونە زاماننان بەرى ناۋرىز مەيرامى جاندانۋ مەن تابيعاتتىڭ جاڭارۋىن بىلدىرەدى. سونىمەن بىرگە، بۇرىنعى زاماندا ناۋرىز كەلگەنگە دەيىن ادامدار ءوز ۇيلەرى مەن شارۋاشىلىعىن تازالىق پەن تارتىپكە كەلتىرگەن. ناۋرىز تازا ۇيگە كەلسە، اۋرۋ-سىرقات، ساتسىزدىكتەر، قاسىرەت ءۇي يەلەرىنەن اينالىپ كەتەدى دەپ سەنگەن.

انىقتاما ءۇشىن:

1991 جىلدىڭ 15 ناۋرىزىنان باستاپ  قازاقستاننىڭ پرەزيدەنتى نۇرسۇلتان نازاربايەۆ ءوزىنىڭ جارلىعىمەن 22 ناۋرىزدى، كوكتەمگى كۇن مەن ءتۇننىڭ تەڭەلۋىن، مەرەكەلىك كۇن دەپ جاريالادى. قازاقستان رەسپۋبليكاسىنىڭ «مەرەكەلەر» تۋرالى زاڭىنا سايكەس ناۋرىز مەيرامى - مەملەكەتتىك مەرەكە. ۇستىمىزدەگى جىلى  ۇكىمەتتىڭ قاۋلىسىمەن قازاقستان ازاماتتارى 5 كۇن دەمالۋ مۇمكىندىگىنە يە بولدى.