ەكسپو-داعى وتكىزۋ پۋنكتەرىندە ورناتىلعان بەينەباقىلاۋ كامەرالارى مەن ادام سانىن ەسەپتەۋىش قۇرالدار «استانا ەكسپو-2017» كورمەسىنىڭ ميلليونىنشى كەلۋشىسىن تىركەدى، دەپ حابارلايدى قامشى اقپاراتتىق اگەنتتىگى. ول - استانا قالاسىنىڭ  27 جاستاعى تۇرعىنى گۇلجيحان جانابەرگەنوۆا بولىپ شىقتى. گۇلجيھان كورمەگە جالعىز كەلمەي، جولداسى مەن ءۇش جاستاعى قىزىن ەرتىپ كەلگەن ەكەن.  

«مەن №76 مەكتەپ-ليسەيىندە ءمۇعالىم بولىپ قىزمەت ەتەمىن. مۇندا ەكىنشى رەت كەلىپ تۇرمىن، ءبىراق ول كەزدە ءبىزدىڭ «نۇر الەم» پاۆيلونىنا كىرە الماعان ەدىم. سوندىقتان، بۇل جولى، ءبىرىنشى كەزەكتە،  ءبىز ءوز ەلىمىزدىڭ پاۆيلونىنا ات باسىن بۇرماقپىز. شىنىمدى ايتسام، وسىنداي قۋانىشقا تاپ بولامىن دەپ ويلامادىم، ءتىپتى ەكسپو-عا كەلگەن ادامدار سانى تىركەلىپ وتىراتىنىن دا بىلمەپپىن»، - دەدى گۇلجيحان جاڭابەرگەنوۆا.

سونداي-اق، ايى وڭىنان تۋعان مەيماندى قۇتتىقتاۋ ءۇشىن كورمەنىڭ مەديا-ورتالىعىنا «استانا ەكسپو-2017» ۇق» اق باسقارما ءتوراعاسى احمەتجان ەسىموۆ تە كەلدى.  ۇلتتىق كومپانيانىڭ باسشىسى ميلليونىنشى كەلۋشىمەن جۇزدەسىپ، وعان ەستەلىك سىيلىقتار مەن كورمەگە جانە سيرك ديۋ سولەي قويىلىمىنا ارنالعان بيلەتتەردى تارتۋ ەتتى. احمەتجان ەسىموۆ ءوز قۇتتىقتاۋ سوزىندە حالىقتىڭ كورمەگە دەگەن قىزىعۋشىلىعى كۇن ساناپ ارتىپ كەلە جاتقانىن تاعى ءبىر مارتە اتاپ ءوتتى.

«ءبىز جوسپار بويىنشا جۇمىس ىستەپ كەلە جاتىرمىز جانە بارلىعى ويداعىداي وتكىزىلۋدە. بۇگىندە  ميلليونىنشى كەلۋشى تىركەلدى، بۇل ءبىز ءۇشىن جاقسى كورسەتكىش. نەگىزى ەكسپو-2017 كورمەسىنىڭ جۇمىسى بارىسىندا 2 ملن. كەلۋشى تىركەلەدى دەپ جوسپارلاعان ەدىك. دەگەنمەن، ءبىر اي عانا ءوتتى، ءبىز وسى ۋاقىت ىشىندە  ميلليونىنشى كەلۋشىنى قارسى الۋدامىز. وسىنداي اۋقىمدى جوبا وتكىزىپ وتىرعان سوڭ، ءبىرىنشى كەزەكتە، كورمە قازاقستاندىقتاردىڭ كوڭىلىنەن شىعىپ جاتىر ما دەپ الاڭدايمىز. كورمەگە ەلدىڭ قىزىعۋشىلىعى ارتىپ كەلە جاتقانىنا قۋانىشتىمىز»،-دەپ اتاپ ءوتتى احمەتجان ەسىموۆ.

ەستەرىڭىزگە سالا كەتەيىك، كورمەنىڭ تىركەۋ قۇجاتتاماسىندا ەكسپو-2017 كورمەسىنە 2 ميلليون ادام كەلەدى جانە كورمە نىساندارىندا جالپى سانى  5 ميلليونعا جۋىق كەلۋشى تىركەلەدى دەپ جوسپارلانعان  ەدى. ال، حالىقارالىق پاۆيلونداردى ارالاعان كەلۋشىلەردىڭ سانىن قوسساق، 10 شىلدەدەگى كورسەتكىشكە سايكەس، 5 960 212 ادام تىركەلگەن. كورمە كەشەنىندەگى نەگىزگى نىساندارعا جۇرتشىلىق 834 579 رەت كەلگەن. بۇل رەتتە 303 007 ادام تاماشالاعان «نۇر الەم» پاۆيلونى كوش باستاپ تۇر. ەسەپتەپ كورسەك، بارلىق كەلۋشىلەردىڭ شامامەن130 مىڭى نەمەسە 14 پايىزى شەتەلدىك قوناقتار.

ءبىر اي ىشىندە كورمەنى 160 مىڭ ادام جەڭىلدىكتەر قاراستىرىلعان تاريفپەن تاماشالاعان. ولار – مەكتەپ وقۋشىلارى، زەينەتكەرلەر مەن ستۋدەنتتەر. سونداي-اق، 6 جاسقا دەيىنگى بۇلدىرشىندەر، ۇوس قاتىسۋشىلارى مەن ولارعا تەڭەلگەن تۇلعالار جانە مۇمكىندىگى شەكتەۋلى جاندار.

ايتا كەتەيىك، كورمە اۋماعىندا وسى ۋاقىت ىشىندە 1031 مادەني جانە ىسكەرلىك شارا وتكىزىلگەن، سونداي-اق، مەملەكەت باسشىلارىنىڭ، مينيسترلەر مەن حالىقارالىق پاۆيلون كوميسسارلارىنىڭ  قاتىسۋىمەن 84 حاتتامالىق شارا ۇيىمداستىرىلعان.