گەرمانيا پرەزيدەنتى فرانك-ۆالتەر شتاينمايەر رەسمي ىس-ساپارمەن استاناعا كەلدى. شتاينمايەر پرەزيدەنت بولىپ سايلانعاننان كەيىن استاناعا رەسمي ساپارمەن العاش كەلۋى، دەپ حابارلايدى Qamshy.kz ءتىلشىسى.

شەتەل دەلەگاسياسىن قازاقستان پرەزيدەنتىنىڭ رەزيدەنسياسىندا قارسى الدى.

«قازاقستانعا قوش كەلدىڭىز. پرەزيدەنت بولىپ سايلانعاننان كەيىن قازاقستانعا العاشقى رەسمي ساپارمەن كەلگەنىڭىزگە قۋانىشتىمىن. ءارى ەكسپو-2017 كورمەسىن ارالايمىن دەپسىز. ءسىزدى پرەزيدەنت ەتىپ سايلاعانىنا ءوز باسىم قۋانىشتىمىن»، - دەدى نۇرسۇلتان نازاربايەۆ.  

ال بۇعان دەيىن ول وسى ەلدىڭ سىرتقى ىستەر ءمينيسترى قىزمەتىن اتقارعان. سونداي-اق، ەلباسى ەكى مەملەكەتتىڭ اراسىنداعى تىعىز دوستىق قارىم-قاتىناسىن ايتا كەتىپ، شەتەلدىك ارىپتەسىنە دەگەن قۇرمەتىن ءبىلدىردى.

«ءسىز الەمگە تانىمال ساياساتكەرسىز، كوڭىلدى، سىيلى ادامسىز. مەنىڭ ويىمشا، ءسىزدى پرەزيدەنت ەتىپ سايلاعان گەرمانيا حالقىنىڭ باعى بار»، - دەي كەلە شتاينمايەردىڭ سىرتقى ىستەر ءمينيسترى قىزمەتىندە بولعان ۋاقىتتا كەزدەسىپ، ءتۇرلى ماسەلەلەردى تالقىلاعان كۇندەرىن ەسكە ءتۇسىردى.

پرەزيدەنتتىڭ ايتۋىنشا، بۇگىن قازاقستان مەن گەرمانيانىڭ ىسكەرلىك كەڭەسى اياسىندا 20 كەلىسىم راسىمدەلدى. ءسويتىپ، ەكى باسشى ەكسپو كورمەسىنە بارىپ، پاۆيلونداردى ارالاپ شىقتى.

ءوز كەزەگىندە فرانك-ۆالتەر شتاينمايەر قوناقجايلىق ءۇشىن العىس ءبىلدىرىپ، قازاقستانعا پرەزيدەنت بولىپ كەلگەنىنە قۋانىشتى ەكەنىن جەتكىزدى.

«مەن بۇعان دەيىن دە قازاقستاندا بولعانمىن. الايدا پرەزيدەنت رەتىندە العاش رەت كەلىپ وتىرمىن. بۇل جاققا كەلگەنىمنىڭ سەبەپتەرى كوپ. قازاقستاندى مەن جاقسى بىلەمىن. الايدا بيىلعى جىلدىڭ ءجونى بولەك. سەبەبى گەرمانيا مەن قازاقستان اراسىنداعى ديپلوماتيالىق قارىم-قاتىناستارعا 25 جىل تولىپ وتىر. وسى ۋاقىتتىڭ ىشىندە تالاي جۇمىستار اتقارىلدى. بۇگىندە گەرمانيانىڭ ءبىراز كومپانيالارى ەكسپو كورمەسىنە قاتىسىپ جاتىر. وسىنىڭ ءوزى ەكى مەملەكەتتىڭ اراسىنداعى تىعىز قارىم-قاتىناستىڭ كورىنىسى»، - دەدى شتاينمايەر.

شولۋشى: گۇلىم جاقان