ق ر ءدىن ىستەرى جانە ازاماتتىق قوعام ۆيسە-مينيسترى بەرىك ارىن «ەكسپو-2017» حالىقارالىق مامانداندىرىلعان كورمەسىندە «گانا رەسپۋبليكاسىنىڭ ۇلتتىق كۇنىنىڭ» اشىلۋ سالتاناتىنا قاتىستى دەپ حابارلايدى Qamshy.kz اقپارات اگەنتتىگى.
«گانا رەسپۋبليكاسىنىڭ ۇلتتىق كۇنىنىڭ» اشىلۋىندا ءدىن ىستەرى جانە ازاماتتىق قوعام ۆيسە-مينيسترى بەرىك ارىن گانا مەملەكەتىنىڭ ۇكىمەتىنە «ەكسپو-2017» كورمەسىن وتكىزۋدە استانانىڭ كانديداتۋراسىن قولداعانى ءۇشىن العىس ءبىلدىردى.
««ەكسپو-2017» حالىقارالىق كورمەسىن استانادا وتكىزۋ ءبىزدىڭ ەلىمىز ءۇشىن اسا جاۋاپتى جانە مارتەبەلى ميسسيا. كورمەنىڭ تاقىرىبى ەنەرگيا ۇنەمدەۋدىڭ ەڭ ۇزدىك الەمدىك تەحنولوگيالارىن، سونداي-اق بالاما ەنەرگيا كوزدەرىن الۋدىڭ جاڭا زەرتتەمەلەرىن تارتۋعا مۇمكىندىك بەرىپ وتىر. بىزدە جاڭارتىلمالى ەنەرگيا كوزدەرىن بارىنشا پايدالانۋ قاعيداسىنا نەگىزدەلگەن «جاسىل ەكونوميكاعا» ءوتۋ جۇمىستارى تاباندى جۇرگىزىلۋدە» - دەپ اتاپ ءوتتى بەرىك ارىن.
ءىس-شارا باراسىندا ۆيسە-مينيستر گانا رەسپۋبليكاسىنىڭ ونەركاسىپ جانە ساۋدا ءمينيسترىنىڭ ورانباسارى كينگسلي احەنكور جانە رەسەي فەدەراسياسى مەن قازاقستان رەسپۋبليكاسىنداعى توتەنشە جانە وكىلەتتى ەلشىسى لاۋازىمىن قوسا اتقاراتىن كودزو الابومەن كەزدەستى.
كەزدەسۋ بارىسىندا ەكى ەل اراسىنداعى ەكى جاقتى قاتىناستاردى كەڭەيتۋ ماسەلەلەرى تالقىلاندى.
ۇلتتىق كۇننىڭ رەسمي بولىگىنەن كەيىن ەكى مەملەكەتتىڭ بيزنەس قاۋىمداستىق وكىلدەرىنىڭ قاتىسۋىمەن بيزنەس-فورۋم وتكىزۋ جوسپارلانعان.
ايتا كەتەيىك، اعىمداعى جىلدىڭ 14 تامىز كۇنى قازاقستان مەن گانا اراسىنداعى ديپلوماتيالىق قاتىناستاردىڭ ورناعانىنا 25 جىل تولادى. گانا باتىس افريكاداعى تۇراقتى دامۋشى مەملەكەتتەردىڭ ءبىرى سانالادى.
پىكىر قالدىرۋ