بولگاريادا التىنشى رەت وتكەن سۇلۋلىق فەستيۆالىندە اقتاۋلىق ايانات داۋلەتالينا گران-پري جۇلدەسىن جەڭىپ الدى دەپ حابارلايدى Qamshy.kz اقپارات اگەنتتىگى 24.kz-كە سىلتەمە جاساي وتىرىپ.

الەمنىڭ 20 مەملەكەتىنەن 55 قاتىسۋشى باعىن سىناعان سايىستىڭ بارلىق كەزەڭى بويىنشا التى جاسار ايانات جوعارى ۇپاي جينادى. ۇستازى ديليارا تۋرينانىڭ ايتۋىنشا، قازاق ەلىنىڭ نامىسىن قورعاعان جەتكىنشەك العاشقى كەزەڭنەن باستاپ-اق كورەرمەننىڭ ىستىق ىقىلاسىنا بولەنگەن. قارشاداي قىز قازىلار القاسىن قازاقي ۇلتتىق كيىمىمەن جانە قويىلعان سۇراقتارعا اعىلشىن، بولگار تىلدەرىندە مۇدىرمەي جاۋاپ بەرۋىمەن باۋراپ الىپتى. وسىلايشا جاستايىنان «الەم حانشايىمى» اتانعان ايانات بيىل مەكتەپكە بارادى. كەلەشەك ارمانى – كوركەم گيمناستيكادان وليمپيادا چەمپيونى بولۋ.

«جەتى كۇنگە سوزىلعان ءسان بايقاۋىندا الەمنىڭ كوپتەگەن ەلدەرىنەن جاڭا دوستار تاپقانىنا قۋانىشتىمىن. الدىمەن اقتاۋدا وتكەن كەزەڭدە باس جۇلدەنى يەلەندىم. ال بولگاريادا سۇلۋلىق فەستيۆالىمەن قاتار ۇيىمداستىرىلعان «الەمنىڭ كىشكەنتاي اقىلدى ارۋى» سايىسىنا دا قاتىسىپ، ءۇشىنشى التىندى جەڭىپ الدىم»،- دەدى حالىقارالىق سۇلۋلىق بايقاۋىنىڭ جەڭىمپازى ايانات داۋلەتالينا