مەملەكەت باسشىسى ۇلتتىق قاۋىپسىزدىك كوميتەتىنىڭ 25 جىلدىعىنا ارنالعان سالتاناتتى شارا باستالار الدىندا تمد ەلدەرى ۇلتتىق قاۋىپسىزدىك ورگاندارىنىڭ جەتەكشىلەرىمەن كەزدەستى، دەپ حابارلايدى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ. 

اڭگىمە بارىسىندا قازاقستان پرەزيدەنتى وڭىردەگى قاۋىپسىزدىكتى قامتاماسىز ەتۋ ءۇشىن ارناۋلى قۇرىلىمداردىڭ حالىقارالىق دەڭگەيدە ىنتىماقتاسۋى مەن ءوزارا ءىس-قيمىل جاساۋىنىڭ ماڭىزدىلىعىن اتاپ ءوتتى

– الدىمىزدا ورتاق مىندەتتەر تۇر. ءوزارا ىنتىماقتاستىقتا بولۋىمىز قاجەت. ءقازىر كۇردەلى كەزەڭدە ءومىر سۇرگەندىكتەن، پروبلەمانى جەكە-دارا شەشۋ دە قيىن. ەلدەرىڭىزدىڭ پرەزيدەنتتەرىمەن جاقسى قارىم-قاتىناستامىن، سوندىقتان ءبىز بارلىق ماسەلەنى بىرلەسە شەشىپ كەلەمىز، – دەدى نۇرسۇلتان نازاربايەۆ.

سوڭىندا مەملەكەت باسشىسى تمد ەلدەرى ارناۋلى ورگاندارىنىڭ جەتەكشىلەرىنە سالتاناتتى شاراعا قاتىسقانى ءۇشىن العىس ايتىپ، سول ەلدەردىڭ باسشىلارىنا ءوزىنىڭ جىلى لەبىزىن جەتكىزۋدى سۇرادى.

شولۋشى: ايگەرىم تاۋباي