15 شىلدەدەن باستاپ ەكسپو-2017 كورمەسىنىڭ بيلەتتىك باعدارلاماسىنا وزگەرىستەر ەنگىزىلىپ وتىر، دەپ حابارلايدى Qamshy.kz اقپاراتتىق اگەنتتىگى sputniknews.kz - كە سىلتەمە جاساي وتىرىپ.

«1-10 شىلدە ارالىعىندا استانا كۇنىنە وراي ءبىز ءبىرقاتار اكسيا وتكىزدىك. وسى اكسيالاردىڭ ىشىندە «جاستار بيلەتى» مەن «كەشكى بيلەتكە» سۇرانىس جوعارى بولدى. بۇگىنگە كۇنگە دەيىن جاستار بيلەتىن 50 مىڭنانا استام، ال كەشكى بيلەتتى 40 مىڭعا جۋىق ادام پايدالاندى. كورمەگە كەلۋشىلەر اراسىنداعى قىزىعۋشىلىقتى ەسكەرىپ، ءبىز تاعى دا جەڭىلدىكتەر جاساۋدى شەشتىك»، — دەپ ءمالىم ەتتى بۇگىن باسپا ءسوز ءماسليحاتىندا «ەكسپو-2017 استانا» ۇق  اق كوممەرسياليزاسيا دەپارتامەنتىنىڭ ديرەكتورى داۋلەت ەركىمبايەۆ.

ءاۋ باستان ەكسپو كورمەسىنىڭ 4 بيلەت ءتۇرى قاراستىرىلعان بولاتىن. جۇمىس كۇندەرى 4 مىڭ جانە 6 مىڭ تەڭگەلىك بيلەت، ال دەمالىس كۇندەرى ءۇشىن 6 مىڭ جانە 8 مىڭ تەڭگەلىك بيلەت ءتۇرى بولدى

«ەندى ءبىز تەك 2 بيلەت ءتۇرىن قالدىرامىز — باعاسى 4000 تەڭگەلىك كىرۋ كۇنى بەلگىلى بيلەت جانە 6000 تەڭگەلىك كەز كەلگەن كۇنى كىرۋگە مۇمكىندىك بەرەتىن بيلەت. وسىلايشا، دەمالىس كۇندەرىنىڭ بيلەتى بولمايدى»، — دەدى ول.

بۇدان بولەك، كەشكى بيلەتتەر ساتىلادى، ولاردىڭ باعاسى ەكى ەسە ارزان — 2000 تەڭگە. وسى رەتتە ازاماتتاردىڭ كەيبىر ساناتتارى ءۇشىن قاراستىرىلعان 50 پايىز جەڭىلدىك ساقتالادى. ايتالىق، ەندى مەكتەپ وقۋشىلارى مەن زەينەتكەرلەر 1000 تەڭگەگە كورمەگە كىرە الادى.

سونداي-اق، بۇگىنگە كۇنگە دەيىن 6 جانە 8 مىڭ تەڭگەلىك  دەمالىس كۇندەرىنىڭ بيلەتىن الىپ قويعاندار ءۇشىن دە  جەڭىلدىكتەر قاراستىرىلىپ وتىر.

«كىرۋ كۇنى بەلگىلەنگەن بيلەت العاندار كاسسادا 1000 تەڭگە قوسىمشا تولەپ، كەز كەلگەن كۇنگە ەكىنشى بيلەت ساتىپ الا الادى. ال داتاسى اشىق بيلەت العاندار وسى بيلەت ارقىلى كورمەگە ەكى رەت كىرە الادى. ياعني، سول كۇنى ەكى رەت كورمەگە كىرە الادى نەمەسە بيلەتتى باسقا كۇنى ەكىنشى رەت پايدالانا الادى»، — دەپ حابارلادى ەركىمبايەۆ.

ساتىلىمداعى ابونەمەنتتەردىڭ باعاسى دا ارزانداماق. ولاردىڭ باستاپقى باعاسى 50 مىڭ تەڭگە بولعان. ەندى ەرتەڭنەن باستاپ بۇل ابونەمەنتتەر 25 مىڭ تەڭگەگە ساتىلادى.

«ابونەمەنتكە دە بيلەتكە سەكىلدى 50 پايىز جەڭىلدىكتەر قاراستىرىلعان. وسىلايشا، وقۋشىلار مەن زەينەتكەرلەر ابونەمەنتتى بار بولعانى 12،5 مىڭ تەڭگەگە ساتىپ الۋ مۇمكىندىگىنە يە. بۇگىنگى كۇنى كورمەنىڭ جارتىسى دەرلىك ءوتىپ كەتتى. كورمەنى ساپالى كورىپ شىعۋ ءۇشىن 5 كۇن كەرەك. وسىعان وراي ءبىز وسىنداي ارنايى اكسيالار وتكىزىپ جاتىرمىز»، — دەپ اتاپ ءوتتى دەپارتامەنت ديرەكتورى.