اتاجۇرتقا كوشىپ كەلە جاتىپ، اقپان ايىندا مايقاپشاعاي كەدەن بەكەتىندە 50 مىڭ دوللار شاماسىندا اقشاسىنان ايىرىلعان، كەدەنشىلەر تاراپىنان «كونتراباندامەن» اينالىستى دەپ ايىپتالعان گۇلجان ءماۋىتحاننىڭ ءىسىن پروكۋراتۋرا قىسقارتتى دەپ جازادى Qamshy.kz.

بۇل تۋرالى اتالعان ءىستىڭ باسى-قاسىندا بولىپ، جەسىر اناعا جالپىقازاقستاندىق اقپاراتتىق قولداۋ كورسەتۋگە مۇرىندىق بولعان قوعامدىق وكىلى ۇلاربەك دالەي ۇلى ءوزىنىڭ Facebook پاراقشاسىندا مالىمدەدى.

«اعايىندار، ءسۇيىنشى سۇراي بەرۋگە بولار،
شىعىس پروكۋراتۋراسىنان جاقسى حابار جەتتى. شەكارادا بار قارجىسىنان ايىرىلعان گۇلجان اپايدىڭ ءىسى قىسقارىپتى بۇيىرسا!
پروكۋراتۋرانىڭ ارنايى قاۋلىسىن ەرتەڭ الامىز. 4 اي بويى توككەن تەر، ەتكەن ەڭبەك دالاعا كەتپەگەن سىڭايلى. اقشاسى قولىنا تيسە وشۋگە اينالعان ءۇمىتى قايتا جانىپ، كوڭىلى ورنىنا ءتۇسىپ، قازاق ەلىندەگى تىرلىگىن جالعاستىرا بەرەدى بۇيىرسا. 
بۇل ىسكە اتسالىسقان اعالار Erlan Sairov، مۇحتار تايجان، ابزال قۇسپان، Aizhan Daribaeva قاتارلى كىسىلەرگە، زاڭگەرلەرگە، ازدا بولسا قارجىلاي قول ۇشىن سوزعان رىسبەك ءماۋىت سياقتى ازاماتتارعا، وزگە دە مىڭداعان تىلەۋلەستەرگە ايتار العىس مول!»، - دەپ جازعان ۇلاربەك دالەي ۇلى قۋانىشىن جۇرتپەن ءبولىسىپ.

ەسكە سالا كەتەيىك، 8 اقپان كۇنى قىتايدان قازاق ەلىنە ورالۋ ماقساتىندا كوشىپ كەلە جاتىپ، شقو زايسان اۋدانىنا قاراستى «مايقاپشاعاي» كەدەندىك باقىلاۋ بەكەتىندە 49،900 اقش دوللارى تاركىلەنگەن ءماۋىتحان گۇلجان ەسىمدى جەسىر انانىڭ تاعدىرى قىل ۇستىندە ەدى. كۇيەۋىنەن جاستاي جەسىر قالىپ، ەكى بالاسىن ءومىردىڭ نەبىر تاۋقىمەتىن تارتا ءجۇرىپ ەر جەتكىزگەن گۇلجان قىتايداعى وزىنە تيەسىلى ءۇيى مەن بار دۇنيە-مۇلكىن ساتىپ، ول اقشاعا استانا قالاسىنان ءۇي الۋدى كوزدەگەن ەكەن. الايدا، قيىن جاعدايعا تاپ بولامىن دەپ ويلاماعان.

«مايقاپشاعاي» كەدەندىك باقىلاۋ بەكەتىندە 49900 اقش دوللارىنان ايىرىلعان جەسىر اناعا بايلانىستى ءبىرىنشى سوت وتىرىسى 17 ناۋرىزدا زايسان قالاسىندا وتكەن بولاتىن. سوت ۇكىمى 234-باپ بويىنشا گۇلجان ءماۋىتحانقىزىن ايىپتى دەپ تانىعان. سونىمەن قاتار، 68 مىڭ تەڭگە ايىپپۇل سالىپ، قالعان 40 مىڭ دوللاردى مەملەكەتكە كىرىس رەتىندە اۋدارعان ەدى. الايدا، ءبىرىنشى سوت شەشىمىن ادىلەتسىز دەپ نارازى بولعان جۇرتتىڭ قاراسى كوپ بولدى. 10 ءساۋىر كۇنى گۇلجان ءماۋىتحان قىزى زايسان اۋداندىق سوتىنىڭ شەشىمىنە كەلىسپەي، شقو سوتىنا اپەللياسيالىق شاعىم تۇسىرگەن بولاتىن. وسى شاعىم بويىنشا 1 ماۋسىمعا سوت بەلگىلەنگەن. وعان بايلانىستى 23 مامىردا استانادا كەزەكتى مارتە باسپا ءسوز ءماسليحاتى وتكەن ەدى. ماۋسىم ايىندا وتكەن سوت زايسان قالاسىنىڭ شىعارعان سوت شەشىمىنىڭ تۇگەلدەي كۇشىن جويدى.

ۇلاربەك دالەي ۇلى اتاپ جازعانداي، ەرلان سايىروۆ، مۇحتار تايجان، ابزال قۇسپان، ايجان دارىبايەۆا سياقتى قوعامدىق تۇلعالار زارداپ شەككەن اناعا قۇقىقتىق، زاڭدىق كومەك كورسەتكەن ەدى. سونداي-اق، اتالعان ءىس دۇرىس ناتيجەمەن اياقتالماسا كوشى-قون ساياساتىنا دا سالقىنى تيەتىنىن بيلىك پەن زاڭ ورىنداۋشى ورگاندارعا ەسكەرتكەن بولاتىن.

مايقاپشاعاي كەدەن بەكەتىندە كونتراباندا دەگەن كۇدىكپەن اقشاسى الىنىپ قويعان گۇلجان ءماۋىتحاننىڭ ءىسى كەدەندىك زاڭنىڭ سولقىلداق ەكەنىن پاش ەتتى. اقشاسىنان ايىرىلىپ قالعان انانى قوعام جالعىز قالدىرعان جوق، قالىڭ ەل بولىپ دەمەپ، الەۋمەتتىك جەلىدە دە ۇلكەن قولداۋ كورسەتتى. الايدا ول كىسىنىڭ باسىنداعى جاعداي تاعى دا قايتالانبايدى دەپ ايتۋ قيىن. وسىعان بايلانىستى Qamshy.kz اتاجۇرتقا بەت تۇزەگەن قانداستارعا  قۇقىقتىق كەڭەس جاريالاعان ەدى.