ءتيىستى شارتقا ۇلتتىق پوشتا وپەراتورى دەلەگاسياسىنىڭ قىتايعا ساپارى بارىسىندا «قازپوشتا» اق جانە China Post Group وكىلدەرى بۇگىن قول قويدى دەپ حابارلايدى Qamshy.kz اقپارات اگەنتتىگى.
«ەلەكتروندىق كوممەرسيا نارىعىنىڭ الەمدەگى جىل سايىنعى ءوسۋ قارقىنى 30%-دان استام جانە نەگىزگى ءوسۋ درايۆەرلەرىنىڭ ءبىرى جۇڭگو ينتەرنەت-الاڭدارى. ق ر كىرىس پوشتاسىنىڭ جالپى كولەمىندەگى جۇڭگو سالەمدەمەلەرىنىڭ ۇلەسى 60%-دان ارتىق جانە جىلدان-جىلعا ارتىپ كەلەدى. ەگەر 2014 جىلى ول 2،5 ملن. داناعا جەتكەن بولسا، ال 2015 جىلى 3،6 ملن. داناعا دەيىن ءوستى، بۇل كورسەتكىش وتكەن جىلى 4 ملن. دانانى قۇرادى. ءبىز 2017 جىلدىڭ ءبىرىنشى توقسانىنداعى پوشتا كولەمىنىڭ 2016 جىلعى 1 توقسانمەن سالىستىرعاندا 2 ەسە وسكەندىگىن باقىلادىق (0،8 ملن. دانادان 1،6 ملن.-عا)»، – دەپ اتاپ ءوتتى قازپوشتا باسشىسى ساكەن سارسەنوۆ.
«سالەمدەمەلەردى جەتكىزۋ مەرزىمى تۇرعىسىندا دا دامۋعا نيەتتىمىز جانە الداعى كۇندەرى سەرۆيس ساپاسىن ارتتىرۋ ءۇشىن جۇڭگو تاراپىنا دا مەرزىمدى ەكى ەسە قىسقارتۋعا ۇسىنىس جاسادىق جانە قحر-دا قابىلدانعان ساتىنەن باستاپ، قر-دا بەرىلگەن ساتكە دەيىن شامامەن 18 كۇن بولماق»، – دەدى ول.
سونداي-اق قىتايلىق تاراپقا ترەكينگ سەرۆيسىن جاقسارتۋ جانە ەكى ەل پوشتاسىنىڭ اراسىندا 100% ات-ينتەگراسيا جۇرگىزۋ، EDI وقيعالارى ەلەكتروندىق دەرەكتەرىن جونەلتۋشى مەن الۋشىنىڭ مەكەنجاي دەرەكتەرىمەن الماسۋدى جولعا قويۋ ۇسىنىلدى.
ايتا كەتەيىك، قازپوشتا CPEL (China Post Express Logistic) وكىلدەرىمەن بىرىگىپ، قىتايدان كەلەتىن شاعىن جونەلتىمدەر ءۇشىن ەپاكەت جاڭا ەكسپرەسس-ونىمىن جاساپ شىعاردى، ول DHL، Fedex سياقتى الپاۋىتتارمەن جانە باسقا دا كۋرەرلىك كومپانيالارمەن باسەكەلەسە الادى. بۇل، البەتتە، قازىرگى ۋاقىتتا جونەلتىمدەردىڭ جالپى كولەمىنىڭ 1%-نا دا جەتپەيتىن ەكسپرەسس-جونەلتىمدەرىنىڭ (EMS) ۇلەسىندە وڭ كورىنىس بەرەدى.
سونىمەن قاتار، قازپوشتا باسشىسى ساكەن سارسەنوۆ Alibaba، «Jumore»، E2B (Enterprise to Business) كومپانيالار توبى باسشىلارىمەن، سونداي-اق لوگيستيكا سالاسىنداعى SF Express – قحر-داعى ەڭ ءىرى لوگيستيكالىق كومپانيانىڭ باسشىسىمەن ەكىجاقتى كەزدەسۋلەر وتكىزدى. كەزدەسۋلەر اياسىندا الداعى ەكىجاقتى ىنتىماقتاستىق جونىندەگى ناقتى جوبالار بەلگىلەندى.
ەسكە سالا كەتەيىك، وتكەن جىلى قازاقستان رەسپۋبليكاسىنىڭ پرەزيدەنتى ن.نازاربايەۆ «ۇلكەن جيىرمالىق» ەلدەرى سامميتىندە قحر باسشىسىمەن ەكى ەل ىنتىماقتاستىعىن تەرەڭدەتۋ جونىندە، اتاپ ايتقاندا، جىبەك جولى ەكونوميكالىق بەلدەۋىن قۇرۋ تۋرالى يدەياسىن ايتا وتىرىپ، ەلدەردىڭ ترانزيتتىك-لوگيستيكالىق الەۋەتىن دامىتۋ تۋرالى ەكىجاقتى كەزدەسۋلەر وتكىزگەن بولاتىن. وسى ورايدا ايتىپ وتكەن ءجون، جىبەك جولى بەلدەۋىن جاڭعىرتۋ جونىندەگى وسى باستاما ەلىمىزدىڭ ترانزيتتىك الەۋەتىن تولىقتاي اشۋعا باعىتتالعان قازاقستاننىڭ «نۇرلى جول» جاڭا ەكونوميكالىق ساياساتىنا ۇلاسادى.
