مەملەكەت باسشىسىنا يسپانيا كورولى VI فەليپەنىڭ اتىنان كاتوليكتىك يزابەللا وردەنىن يسپانيا كورولدىگى دەپۋتاتتار كونگرەسىنىڭ ءتورايىمى انا پاستور تابىس ەتتى، دەپ جازادى Qamshy.kz اقپارات اگەنتتىگى. بۇل تۋرالى اقوردانىڭ باسپا ءسوز قىزمەتى حابارلايدى.
«اسا مارتەبەلى قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ مىرزا، جوعارى كورولدىك قۇرمەت رەتىندە، ءسىزدى كاتوليكتىك يزابەللا وردەنىمەن ماراپاتتايمىن»، – دەلىنگەن كورولدىڭ جارلىعىندا.
قازاقستان پرەزيدەنتى يسپانيا كورولى VI فەليپەگە جانە انا پاستورعا جوعارى ماراپاتى ءۇشىن ريزاشىلىق ءبىلدىرىپ، قازاقستان مەن يسپانيا اراسىندا سەنىمدى ءارى دوستىق قارىم-قاتىناس ورناعانىن اتاپ ءوتتى.
– ءبىز تاۋەلسىزدىگىمىزدىڭ العاشقى كۇندەرىنەن باستاپ يسپانيا كورولدىگىمەن بايلانىس ورناتىپ، ءوزارا سەنىمدى ەكىجاقتى قارىم-قاتىناستارعا قول جەتكىزدىك. وسى جىلدار ىشىندە يسپانيا قازاقستانعا ءوز قولداۋىن كورسەتىپ كەلەدى. يسپانيا كورولى VI فەليپە قازاقستانعا رەسمي ساپارمەن كەلىپ، «ەكسپو-2017» حالىقارالىق كورمەسىنىڭ اشىلۋىنا قاتىستى. بۇل ءبىز ءۇشىن زور مارتەبە، – دەدى قازاقستان پرەزيدەنتى.
نۇرسۇلتان نازاربايەۆ قازاقستاننىڭ ساياساتتا جانە ەكونوميكانىڭ ءتۇرلى سەكتورلارىندا يسپانيامەن جەمىستى ىنتىماقتاستىقتى جالعاستىرۋعا نيەتتى ەكەنىن ايتتى.
ءراسىم سوڭىندا قازاقستان پرەزيدەنتى يسپانيا كورولى VI فەليپەگە شىنايى ريزاشىلىعى مەن جىلى لەبىزىن جەتكىزۋدى سۇرادى جانە يسپانيا حالقىنىڭ يگىلىگى ءۇشىن اتقارىپ جاتقان قىزمەتىنە تابىس تىلەدى.
