تۇركيانىڭ «قارا تىزىمىنە» قازاقستان، رەسەي، ساۋد ارابياسى جانە باسقا دا ەلدەردەن 50 مىڭنان استام ازامات ەنگەن.
بۇل تۋرالى Qamshy.kz اقپارات اگەنتتىگى Sputnik مالىمەتىنە سۇيەنىپ حابارلايدى.
تۇركيا «قارا ءتىزىم» جاسادى، وعان الەمنىڭ 146 ەلىنەن 54 مىڭعا جۋىق ازامات ەنىپ وتىر. ولارعا لاڭكەستىك ۇيىمدارمەن بايلانىسى ءۇشىن تۇركيا اۋماعىنا كىرۋگە تىيىم سالىندى.
تۇركيانىڭ ىشكى ىستەر مينيسترلىگىنىڭ دايش-پەن كۇرەس جونىندەگى بايانداماسىنا سۇيەنسەك، “قارا تىزىمگە” قازاقستاننىڭ 1914 ازاماتى ەنگەن. سونىمەن بىرگە تىزىمدە ساۋد ارابياسى، تۋنيس، رەسەي، ماروككو، تاجىكستان، فرانسيا، يراك، ازەربايجان جانە بەلگيا ازاماتتارى بار.
“146 ەلدىڭ 53 781 ازاماتىنا تەرروريستەرمەن بايلانىسىپ، قاقتىعىس ايماعىندا بولۋى مۇمكىن بولعاندىقتان تۇركيا اۋماعىنا كىرۋگە تىيىم سالىندى”، — دەپ ايتىلعان باياندامادا.
تۇركيانىڭ سىرتقى ىستەر مينيسترلىگىنىڭ تۇسىندىرۋىنشە، تىزىمگە ازاماتتارى لاڭكەستىك ۇيىمدارمەن بايلانىسقان جانە سيرياداعى قاقتىعىس ايماقتارىنا بارعان مەملەكەتتەر كىرگەن.
