مەملەكەت باسشىسىنىڭ تاپسىرماسىمەن ق ر پرەمەر-مينيسترى باقىتجان ساعىنتايەۆ جۇمىس ساپارىمەن سولتۇستىك قازاقستان وبلىسىنا باردى، دەپ جازادى Qamshy.kz اقپارات اگەنتتىگى. وندا «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋى مەن «بولاشاققا باعدار: رۋحاني جاڭعىرۋ» باعدارلامالىق ماقالاسىنداعى مىندەتتەردىڭ ورىندالۋ بارىسىمەن تانىسادى. بۇل تۋرالى ق ر پرەمەر-مينيسترلىگىنىڭ باسپا ءسوز قىزمەتى حابارلادى.

جۇمىس ساپارى كەزىندە باقىتجان ساعىنتايەۆ «نۇرلى جەر» باعدارلاماسى اياسىنداعى تۇرعىن ءۇي قۇرىلىسىنىڭ بارىسىمەن، پەتروپاۆلدىڭ «نۇرلى جول» باعدارلاماسى اياسىنداعى الەۋمەتتىك جانە ينفراقۇرىلىمدىق نىساندارىمەن تانىسادى دەپ كوزدەلگەن. ءوڭىردىڭ ونەركاسىپ كاسىپورىندارى مەن مەديسينا مەكەمەلەرىن، اۋىل شارۋاشىلىعى كەشەندەرىن ارالاۋ جوسپاردا بار.

ق ر پرەمەر-مينيسترى باقىتجان ساعىنتايەۆ اوك دامىتۋ مەملەكەتتىك باعدارلاماسىن ىسكە اسىرۋ بويىنشا اقمولا، سولتۇستىك قازاقستان، قوستاناي، قاراعاندى، پاۆلودار وبلىستارىنىڭ اكىمدىكتەرى مەن اۋىل شارۋاشىلىعى قۇرىلىمدارىنىڭ باسشىلارىنىڭ قاتىسۋىمەن رەسپۋبليكالىق كەڭەس وتكىزەدى دەپ كۇتىلۋدە.

«اتامەكەن» ۇكپ وڭىرلىك كەڭەسىنىڭ مۇشەلەرىمەن كەزدەسۋدە شاعىن جانە ورتا بيزنەستى دامىتۋ، كاسىپكەرلىك ورتاسىن قايتا رەتتەۋ، وبلىستا ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىن ىسكە اسىرۋ ماسەلەلەرى تالقىلانادى.

سونداي-اق، جۇمىس ساپارى اياسىندا ق ر پرەمەر-مينيسترى باقىتجان ساعىنتايەۆتىڭ توراعالىعىمەن تەحنولوگيالىق جاڭعىرتۋ، سيفرلاندىرۋ جانە يندۋستريا 4.0 ەلەمەنتتەرىن ەنگىزۋ، ييدمب-2 ىسكە اسىرۋ جانە ينۆەستيسيالار تارتۋ ماسەلەلەرىن تالقىلاۋ بويىنشا جۇمىس كەڭەسىن وتكىزۋ جوسپارلانعان.

ءبىرىنشى كەزەكتە باقىتجان ساعىنتايەۆ «پەتروپاۆل» حالىقارالىق اۋەجايىن جوندەۋ بارىسىمەن جانە ونىڭ ترانزيتتىك الەۋەتىن دامىتۋ پەرسپەكتيۆالارىمەن تانىستى.

باقىتجان ساعىنتايەۆ بيىل كوكتەمدە سۋ دەڭگەيىنىڭ كوتەرىلۋىنەن زالال تارتقان زارەچنىي كەنتىندە سۋ تاسقىندارىن ەسكەرتۋ مەن ولاردىڭ سالدارلارىن جويۋ بويىنشا كوشپەلى كەڭەس وتكىزەدى دەپ كوزدەلىپ وتىر.

وبلىس اكىمىنىڭ ورىنباسارى ا. فەديايەۆ اۋەجاي تەرمينالىنىڭ عيماراتى مەن ۇشۋ-قونۋ جولاعىنىڭ جوندەۋدەن وتكەنىن، بۇل اۋە كەمەلەرىنىڭ كەز كەلگەن ءتۇرىن قابىلداۋعا مۇمكىندىك بەرەتىنىن باياندادى. بۇدان وزگە، اۋەجاي پەررونىن كەڭەيتۋ جانە كىرمە جولدى جوندەۋ جوسپارلانعان.  

پەتروپاۆل اۋەجايىن جوندەۋ رەسەي فەدەراسياسىنىڭ قورعان، تۇمەن جانە ومبى وبلىستارىمەن شەكارالاس سولتۇستىك قازاقستان وبلىسىنىڭ ترانزيتتىك الەۋەتىن تيىمدىرەك پايدالانۋعا مۇمكىندىك بەرەدى.

اۋەجاي باسشىلىعى تۇراقتى جولاۋشىلار اۋە رەيستەرىنىڭ سانىن ارتتىرۋ پەرسپەكتيۆالارىن، ترانزيتتىك رەيستەر مەن جۇك اۋە تاسىمالدارىنا قىزمەت كورسەتۋ مۇمكىندىگىن قاراستىرۋدا.