ق ر جوعارعى سوتىنىڭ ءتوراعاسى قايرات ءمامي ءتورالقا وتىرىسى بارىسىندا قاراعاندى وبلىستىق سوتىنىڭ جۇمىسىن سىنعا الدى. بۇل جايىندا جوعارعى سوت باسپا ءسوز قىزمەتى تاراتقان اقپاراتتا ايتىلعان، دەپ حابارلايدى Qamshy.kz اقپارات اگەنتتىگى جوعارعى سوتقا سىلتەمە جاساپ.

قاراعاندى وبلىسى سوتتارىنىڭ قىزمەتىن زەردەلەۋ ناتيجەسىن جوعارعى سوتتىڭ قىلمىستىق ىستەر بويىنشا سوت القاسىنىڭ ءتوراعاسى، كوشپەلى كوميسسيا بويىنشا جۇمىس توبىن باسقارعان ا.راحمەتۋلين تانىستىردى. ەسەپتى كەزەڭدە ىستەر سانىنىڭ ارتۋى بايقالادى. سوتتار شامامەن 5،5 مىڭ قىلمىستىق ءىستى قاراعان، سوتتارعا 101 مىڭنىڭ شاماسىندا ازاماتتىق ءىس پەن 33 مىڭنان استام اكىمشىلىك ءىس كەلىپ تۇسكەن. جاڭا قۇقىقتىق جاعدايلارداعى سوتتار جۇمىسىن تالداۋ، سونىڭ ىشىندە، جەڭىلدەتىپ ءىس جۇرگىزۋدى كەڭەيتۋ، مەدياسيا قولدانۋ ارقىلى قىلمىستىق جانە ازاماتتىق سوت ءىسىن جۇرگىزۋ تيىمدىلىگىنىڭ ارتقانىن كورسەتتى. 

«دەي تۇرعانمەن، وبلىس سوتتارىندا ءبىرقاتار تۇيتكىلدى ماسەلەلەر دە جوق ەمەس. اتاپ ايتقاندا، بۇلارعا سوت اكتىلەرىن ازىرلەۋ بارىسىنداعى كەمشىلىكتەر مەن ولاردىڭ ۋاقتىلى ورىندالماۋى جاتادى. سوت تالقىلاۋىنا دايىندىقتىڭ ءتيىستى دەڭگەيدە جۇرگىزىلمەۋى سالدارىنان قىلمىستىق ىستەردى قاراۋ مەرزىمدەرىن بۇزۋ فاكتىلەرى انىقتالدى. ازاماتتاردىڭ وتىنىشتەرىنە جاۋاپتى كەشىكتىرىپ بەرۋ، مۇراعات جۇمىسى ساپاسىنىڭ تومەندىگى، سونداي-اق، ءبىرقاتار اۋداندىق سوتتار عيماراتتارى جاعدايىنىڭ تومەندىگى سەكىلدى جاعىمسىز جايتتار دا بار»، - دەلىنگەن اقپاراتتا. 

وتىرىستى وتكىزۋ بارىسىندا جوعارعى سوت ءتوراعاسى قاراعاندى وبلىسىنا ساپار بارىسىندا بۇيرىقتىق ءىس جۇرگىزۋ، اپەللياسيالىق ساتى جۇمىسى، سونداي-اق، جەكەلەگەن سوت پراكتيكاسىنىڭ ءبىرقاتار ماسەلەلەرى بويىنشا انىقتالعان سىني ەسكەرتپەلەردى اتاپ ءوتتى. 

تالقىلاۋ قورىتىندىسى بويىنشا ءتورالقا ءتيىستى قاۋلى قابىلدادى. جالپى العاندا، شىعىس قازاقستان جانە قاراعاندى وبلىستارىنداعى سوت تورەلىگىن جۇزەگە اسىرۋ بويىنشا سوتتاردىڭ جۇمىسى قاناعاتتانارلىق دەپ تانىلدى. وبلىستىق سوتاردىڭ ءتوراعالارىنا، القا ءتوراعالارى مەن سوتتار اكىمشىلەرىنە انىقتالعان كەمشىلىكتەردى جويۋ بويىنشا جۇيەلەر شارالاردى قابىلداۋ قاجەتتىگى ايتىلدى.